Relsten shyǵyp ketken poıyzdyń barlyq 832 jolaýshysy Shý stansııasyna jetkizildi, dep habarlaıdy «Qazaqstan temir joly» AQ baspasóz qyzmeti.
832 jolaýshynyń 200-i alǵan bıletterine sáıkes Shý stansysynda túsip qalǵan. 488 jolaýshy Almaty qalasyna jóneltilse, qalǵandary temirjol kóligimen jetkizip tastaý usynysynan bas tartyp, belgilengen pýnktterge avtokóliktermen óz betterimen ketken. «QTJ» UK» AQ jedel shtabynyń aqparatyna sáıkes, №10 jolaýshylar poıyzy vagondarynyń relsten shyǵyp ketýi saldarynan 14 adam zardap shekti.
Qazirgi ýaqytta úsh adam - Shý aýdandyq aýrýhanasynda, al 11-i Shý qalalyq aýrýhanasynda jatyr. «Astanadan Almatyǵa ketip bara jatqan №10 poıyzdyń vagondary Krıýkov jáne Tver vagon qurastyrý zaýyttarynan 2012-2014 jyldary shyqqan.
Vagondar talap etiletin tehnologııalyq zertteýlerden ótken, normatıvti-tehnıkalyq qujattamalarǵa sáıkes keledi. Normatıvti-tehnıkalyq talaptarǵa sáıkes, №10 poıyzdyń vagondary reısaldy tehnıkalyq qyzmet kórsetýden ótken. Temir joldardy tehnıkalyq reglament boıynsha tekserý jumystary aıyna eki márte júrgiziledi. Jolólsheýish vagondardyń joldary sońǵy ret 2018 jyldyń 6 maýsymynda ólshengen. Kemshilikter anyqtalmaǵan», - delingen QTJ aqparatynda.
«Almaty-1» vokzalynda kómek kórsetý úshin jaǵdaı jasalyp otyr. Naqtyraq aıtqanda, №10 poıyzdyń jolaýshylaryna medısınalyq qyzmet kórsetý, qosymsha aqparattyq-anyqtamalyq aýmaqta temirjol bıletteriniń qunyn qaıtarý boıynsha keńes berý qarastyrylǵan.
Bılettiń qunyn qaıtarýǵa qatysty barlyq suraqtar boıynsha «Jolaýshylar tasymaly» AQ-ǵa 8(7172) 600-244; 933-617 nómirine habarlasýǵa (Astana qalasy) bolady.
«NSK» AQ saqtandyrý kompanııasynan shyǵyndy óteý máselesi boıynsha saǵat 20:00-ge deıin 8(7172) 600-235; 600-128 nómirine qońyraý shalý kerek.