«Qazmedıa» ortalyǵynda Qazaqstan Respýblıkasy Premer-Mınıstriniń orynbasary – Aýyl sharýashylyǵy mınıstri О́mirzaq Shókeevtiń halyqqa esep berý kezdesýi ótti.
«Osy kezeń ishinde shyǵarylǵan jalpy aýylsharýashylyq ónimderi 3,9 paıyzdy, ıaǵnı 745 mlrd teńgeni qurady. О́ndirilgen tamaq ónimderi 6,3 paıyzǵa artty. Qazaqstannyń qol jetkizgen básekege qabilettilik deńgeıin qoldaý jáne onyń odan ári keńeıýi úshin agroónerkásiptik keshendi memlekettik retteýdiń tásilderi qaıta qaralyp, ishki naryqtyń qorǵalýyna, syrtqy saýda naryǵyn keńeıtýge, saýda-logıstıkalyq ınfraqurylymdy damytýǵa jáne agroónerkásiptik keshen sýbektilerin qarjylandyrýdyń qoljetimdiligin arttyrýǵa basa nazar aýdaryldy.
Aýyl sharýashylyǵy ónimderiniń eksporty 3 aıda 47 paıyzǵa, onyń ishinde óńdelgen ónimder eksporty 26 paıyzǵa ulǵaıdy. Aýyl sharýashylyǵyna salynǵan ınvestısııalar kólemi 1,4 paıyzǵa ósip, 88 mlrd teńge boldy. 2018 jyly egistik jerler kólemin 50,2 paıyzǵa (11,4 mln ga) qysqartý josparlanyp otyr. Mal sharýashylyǵynda ótken kezeńde mal men qus sany orta eseppen 4,1 paıyzǵa ulǵaıdy», dedi О́.Shókeev.
Ol sondaı-aq óndirilgen et kólemi 4,8 paıyzǵa (345,1 myń tonnadan 361,6 myń tonnaǵa deıin), sút 2,5 paıyzǵa (1942,9 myń tonnadan 1992,5 myń tonnaǵa), jumyrtqa 15,7 paıyzǵa (1896,1 mln danadan 2194,4 mln danaǵa deıin) artqanyn atap kórsetti. Elbasy halyqqa Joldaýynda agroónerkásiptik keshen aldynda eńbek ónimdiligin túbegeıli ulǵaıtý jáne qaıta óńdelgen aýyl sharýashylyǵy ónimi eksportynyń ósimin 5 jyl ishinde keminde 2,5 esege arttyrý mindetin qoıǵany belgili.
Bul mindetti sheshý salany damytýda múlde jańa kózqarasty talap etedi. Qazirgi ýaqytta azyq-túliktiń negizgi 30 túriniń 25-i boıynsha qamtamasyz etilýi 80 paıyz, al keıbir túrleri boıynsha 100 paıyzdy qurap otyr. Ishki naryq osy ónim túrlerimen qamtamasyz etilýde. Importqa táýeldi qus eti, alma, irimshik jáne súzbe, shujyq, qant, balyq bul tizimge kirmeıdi. Joǵaryda atalǵan mindetterdi eskere otyryp, Qazaqstan Respýblıkasy Aýyl sharýashylyǵy mınıstrligi agrobıznes jáne úkimettik emes uıymdardyń ókilderin tarta otyryp, 2017-2021 jyldarǵa arnalǵan Qazaqstan Respýblıkasy agroónerkásiptik keshenin damytýdyń memlekettik baǵdarlamasyna túzetýler engizý boıynsha jumys júrgizgen.
О́.Shókeevtiń sózinshe, baǵdarlamanyń túıindi kórsetkishteri men is-sharalary negizinde, jobalyq basqarý standarttaryna sáıkes agroónerkásiptik keshenniń negizgi baǵyttary boıynsha uzaq merzimdi salalyq baǵdarlamalar ázirlenip, olardy iske asyrý merzimi 10 jáne odan da kóp jyldy quraıdy eken. Bular – et jáne sútti mal sharýashylyǵyn, qus sharýashylyǵyn, sýarmaly jerlerdi damytý baǵdarlamalary. Sonymen qatar Memlekettik baǵdarlama aıasynda salany sıfrlandyrýǵa, tehnıkalyq retteýge, aýyldyq aýmaqtardy damytý jáne salyq salý máseleleri qarastyrylatyn bolady.
Jalpy, Memlekettik baǵdarlamada 10 mindetti oryndaý kózdelipti. Bul – azyq-túlik qaýipsizdigin qamtamasyz etý, qarjylandyrýdyń qoljetimdiligi, tıimdi salyq salý, jer jáne sý resýrstaryn tıimdi paıdalaný, naryqtarǵa qol jetkizý jáne eksportty damytý, agrarly ǵylym, tehnıkalyq jabdyqtaý men óndiristi jandandyrý, memlekettik qyzmet kórsetý sapasy men sıfrlandyrý, aýyldyq jerlerdi damytý. Osylaısha, memlekettik baǵdarlama agroónerkásiptik keshen salalaryn damytýdyń negizgi sharttaryn qamtamasyz etedi.
Aıta ketetin taǵy bir jaıt, Memleket basshysynyń Qytaı Halyq Respýblıkasyna jasaǵan memlekettik sapary aıasynda Beıjiń qalasynda Qazaqstan Respýblıkasy Aýyl sharýashylyǵy mınıstrligi men Qytaı Halyq Respýblıkasynyń Bas keden basqarmasy arasynda Qazaqstannan Qytaıǵa eksporttalatyn sıyr etine arnalǵan ınspeksııa, karantındik jáne veterınarlyq-sanıtarlyq talaptar týraly hattamaǵa qol qoıylǵan bolatyn. Bul hattama muzdatylǵan súıeksiz sıyr etin Qytaıǵa eksporttaýǵa múmkindik beredi.
Jıyn sońynda Premer-Mınıstrdiń orynbasary – Aýyl sharýashylyǵy mınıstri О́mirzaq Shókeev jıynǵa qatysýshylardyń jáne aımaqtardan kelgen jurtshylyqtyń san túrli suraqtaryna jan-jaqty jaýap berdi.
Raýan QAIDAR,
«Egemen Qazaqstan»