Qazaqstan strategııalyq zertteýler ınstıtýtyna 25 jyl toldy

Oǵan Prezıdent Ákimshiligi Ishki saıasat bóliminiń meńgerýshisi Aıda Balaeva, «Nur Otan» partııasy Tóraǵasynyń birinshi orynbasary Máýlen Áshimbaev, Qaýipsizdik keńesi Hatshysynyń birinshi orynbasary Marat Shaıhýtdınov, Syrtqy ister mınıstriniń birinshi orynbasary Muhtar Tileýberdi, Qazaqstannyń Belarýs Respýblıkasyndaǵy Tótenshe jáne ókiletti elshisi Ermuhamet Ertisbaev jáne basqalar qatysty.

Konferensııanyń ashylý barysynda Aıda Balaeva Prezıdent Nursultan Nazarbaevtyń ıns­tıtýttyń 25 jyldyq mereıtoıyna oraı joldaǵan quttyqtaý hatyn oqyp berdi. Mem­leket basshysynyń quttyq­taýynda ınstıtýt qyzmet­kerleriniń atqaryp jatqan ju­mystaryna joǵary baǵa berilip, QSZI-dyń 25 jyldyq eńbegi, táýel­siz Qazaqstannyń stra­tegııalyq qujattaryn súıe­meldeýde mańyzdy ról atqarǵany aıryqsha atalyp ótti.

«Qazaqstan strategııalyq zertteýler ınstıtýtynyń damýy Qa­zaqstan táýelsizdiginiń qalyptasý jáne nyǵaıý tarıhymen tikeleı baılanysty. Instıtýt 1993 jyly meniń Jarlyǵymmen joǵary deńgeıde elimizdiń ishki-syrtqy saıasatynda strategııalyq sheshimderdi joǵary deńgeıde bol­jam­dyq-saraptamalyq súıe­meldeýmen qamtamasyz etetin qazaqstandyq al­ǵashqy zertteý ortalyǵy bolyp quryldy. Sol ýa­qyttan beri KAZISS eli­mizdegi be­deldi ǵylymı-saraptamalyq uıymǵa aınalyp, halyqaralyq je­tekshi saraptamalyq ortalarda óz ornyn taýyp úlgerdi. Qurylǵan kúnnen bastap ınstıtýt óziniń eń basty mindetteriniń biri retinde joǵary bilikti mamandardy daıyndaýdy jolǵa qoıdy. Nátıjesinde Prezıdent ákimshiligine, Qaýipsizdik keńesi men Syrtqy ister mınıstrligine, ózge de mem­lekettik basqarý organdaryna jáne konsaltıngilik ortalyqtarǵa qyzmetker daıar­laıtyn jetekshi maman­dardyń ustahanasyna aınaldy.

Búgingi tańda ınstıtýt aldynda táýelsiz Qazaqstannyń turaqtylyǵy men kórkeıýin ǵylymı-saraptamalyq turǵyda súıemeldeý sapasyn arttyrý mindeti tur. KAZISS-tiń búgingi mıssııasy – mem­lekettik basqarýdaǵy ǵylymı-saraptamalyq súıe­meldeýdiń sapasyn arttyrý. Qyzmetterińizge tabys, jańa, aýqymdy jobalarda otandyq saraptaý dástúrin odan ári kúsheıte túsýdi tileımin», delingen quttyqtaý hatynda.

Budan soń ınstıtýtty ár jyldary basqarǵan Máýlen Áshimbaev, Ermu­hamet Ertisbaev, Erlan Qarın, sondaı-aq Shanhaı yntymaqtastyq uıymynyń Bas hatshysy, О́zbek­stan Respýblıkasynyń Pre­zı­denti janyndaǵy Stra­tegııalyq jáne aımaqaralyq zertteýler ıns­tıtýtynyń dırektory Vladımır Norov jáne bir top meıman sóz alyp, ınstıtýttyń róline, tarıhyna toqtalyp, syı-syıapattaryn tartý etti. Al qonaqtarǵa, ınstıtýttyń ardager qyzmetkerlerine 25 jyldyqqa oraı shekteýli sanmen shyǵarylǵan merekelik medaldar tartý etildi.

Plenarlyq otyrystan soń halyqaralyq konferensııa jumys toptaryna bólinip, Ortalyq Azııa elderinde oryn alyp otyr­ǵan áleýmettik-saıası úde­rister týraly pikir al­mas­ty. Konferensııa sarap­shylarǵa aımaqtaǵy ári qa­raıǵy yntymaqtastyqtyń jańa qyrlary men resýrs­taryn baǵalaýǵa jáne ashyp kórsetýge, aımaqtyq damý­dyń negizgi múmkin qaýip-qater­leriniń, saıa­sı jáne áleýmettik-ekonomıkalyq úde­risterdiń kórinisin túı­sinýge múmkindik berdi.

Venera TÚGELBAI,

«Egemen Qazaqstan»