Búgin Úkimet úıinde QR bilim jáne ǵylym vıse-mınıstri Bıbigúl Asylovanyń, QR BǴM «Ulttyq testileý ortalyǵy» RMQK dırektory Ramazan Álimqulovtyń qatysýymen «Prezıdenttiń Bes áleýmettik bastamasyn» iske asyrý aıasynda stýdent jastardyń baspana jaǵdaılaryn jaqsartý týraly» baspasóz konferensııasy ótti.
Memleket basshysynyń tapsyrmalaryn oryndaý aıasynda stýdent jastardyń úı-jaı jaǵdaılaryn jaqsartý boıynsha birqatar mańyzdy sharalar atqarylýda, sonyń ishinde zańnamalyq turǵydan jetildirýler bolyp jatyr.
«Biz jataqhana oryndaryna qajettilikterdi anyqtadyq. Búgingi tańda qajettilik shamamen 83 myń oryndy quraıdy. Eń úlken úlesi boıynsha Ońtústik Qazaqstan oblysyna – 11 myń orynnan, Astana qalasyna – 17 myń jáne Almaty qalasyna – 23 myń orynnan keledi», — dedi QR bilim jáne ǵylym vıse-mınıstri Bıbigúl Asylova.
Budan ózge, ákimdiktermen birlese otyryp, jataqhanalardy salýǵa jer telimderin bólý jumystary júrgizildi. Qazirgi tańda bilim berý mekemeleriniń aýmaǵynda nemese olarǵa jaqyn mańdaǵy jerlerden 134 jer telimi bólingen.
«Sondaı-aq, biz jataqhanalar qurylysynyń mehanızmin anyqtadyq. Ol aıtarlyqtaı qarapaıym ári túsinikti. Qurylys salýshy jataqhana jobasyn ázirleıdi. Keıin Qarjy ortalyǵymen memlekettik tapsyrysty alý úshin kelisimshart jasasady. Budan soń bankten qaryz alady. Jataqhanany paıdalanýǵa bergennen soń memleketten ótemaqy tólemderin alady», — dep málimdedi vıse-mınıstr.
Jataqhanalar jobalaryn ázirleý rásimin jeńildetý úshin Qurylys jáne turǵyn úı-kommýnaldyq sharýashylyq isteri komıteti úlgilik joba ázirledi, ol búginde barlyq ákimdikterge taratylǵan.
Sonymen qatar QR BǴM múddeli memlekettik organdarmen birlese otyryp, Bıznestiń jol kartasyna jataqhanalar qurylysyn qosý arqyly bankterde nesıeler boıynsha paıyzdyq mólsherlemeni tómendetý máselesin pysyqtap jatyr.
«Atalǵan mehanızmdi bıznes qaýymdastyǵy men bilim berý uıymdary maquldaǵan. Mınıstrlik, «Atameken» UKP, Astana qalasynyń ákimdigi negizinde birneshe ret keńester ótkizildi.
Buǵan qosa, barlyq qajettilikter eskerilgen Interaktıvti karta ázirlenip, búginde jumys istep tur. Ol www.fincenter.kz saıtynda onlaın rejımde qoljetimdi. Bul karta bilim berý uıymdary men óńirler turǵysynan jataqhanalar jóninde barlyq málimetti – tósek oryndarynyń sany, tıisti jer telimderiniń bar-joǵy, olardyń sıpattamasy jaıynda aqparat alýǵa múmkindik beredi», — dedi B. Asylova.
Bul mehanızmdi iske asyrý úshin Parlament Májilisi depýtattarynyń qoldaýymen JOO-lardyń akademııalyq jáne basqarýshylyq derbestigin keńeıtý máseleleri týraly Zań jobasy aıasynda zańnamaǵa túzetýler usynylǵan.
Jýrnalısterdiń suraqtaryna jaýap berý kezinde, B. Asylova búginde elimizde 204 myń basqa qalalardan kelip oqıtyn stýdentter baryn, olardyń 101 myńy jataqhana ornyn qajetsinetinin atap ótti.
«Eger Parlament zańǵa túzetýlerdi tamyzda qabyldasa, onda mınıstrliktiń normatıvtik-quqyqtyq aktilerin retteýge taǵy bir aı ketedi. 2019 jyldyń qyrkúıek aıyna qaraı 5 000 oryndy paıdalanýǵa berýdi kózdep otyrmyz. Bul bizdiń optımıstik boljamymyz», — dep túıindedi B. Asylova.