Katonqaraǵaı aýdanynyń Solonovka aýylyndaǵy 30 jylǵa jýyq ýaqyt qaraýsyz qalǵan alma baǵy qaıta qalpyna keltirilmek. Kezinde bul jerde alma, qaraqat pen tańqýraı jaıqala ósip, aýyl turǵyndarynyń kóz qýanyshyna aınalǵan eken.
«Men bul baqta 1969-1978 jyldary jumys istedim. Myńǵa jýyq jemis aǵashtary jaıqala ósken tamasha baq edi. Kolhoz almalardy kúzge taıaý kólikpen aýdandaǵy ártúrli mekemelerge aparyp satatyn. Baqtyń negizi 1952 jyly Solonovka aýylynyń turǵyny Fılımon Berdıýgınniń bastamasymen qalanǵan. Ol kezde kolhozda deni durys tehnıka da bolǵan joq. Sondyqtan Fılımon uldary Nıkolaımen jáne Vladımırmen birge qolyna kúrek alyp, birneshe shaqyrym aryq qazdy. Ol alma baǵyndaǵy árbir talǵa óz balalaryndaı úlken qamqorlyq jasady», dep eske alady osy aýyldyń turǵyny, zeınetker Lıdııa Korotkova.
«Baqpasa mal ketedi» degendeı, F.Berdıýgın 1980-jyldardyń aıaǵynda zeınetkerlikke shyqqannan keıin alma baǵy da qaraýsyz qalyp, aǵashtary shabylyp, mal jaıylatyn jerge aınalady. Bıyl jyl basynda Katonqaraǵaı aýdanynyń ákimi Ahmetqalı Nurǵojın ótkizgen esepti kezdesýde aýyl turǵyndary alma baǵyn qalpyna keltirý jóninde usynys aıtypty. Usynys qoldaý taýyp, kóktemde jergilikti mektep, ákimdik qyzmetkerleri men aýdan ortalyǵy – Úlken Narynnan kelgen eriktiler kómegimen baqta birneshe márte senbilik uıymdastyrylyp, aýmaq tolyq tazartylyp, artyq aǵashtar kesilipti.
Urpaqqa úlgi bolarlyq ıgi iske osy aýyldyń týmasy, aýdandyq emhananyń bas dárigeri Sáýle Baıgereeva da atsalysqan.
«Biz bıyl Solonovkadaǵy baqtaǵy onshaqty alma aǵashyna jańa alma butaqtaryn baılap, jalǵadyq. Egý jumystary deımiz ǵoı. 40-qa jýyq aǵashty kelesi jylǵa daıyndap jatyrmyz. Svınchatka degen aýylda almalar jaqsy ósedi. Sol jerden osynda ákelip otyrǵyzsaq pa degen oıymyz bar», deıdi týǵan aýylynyń erteńine beıjaı qaramaıtyn dáriger.
Azamat QASYM, «Egemen Qazaqstan»
Shyǵys Qazaqstan oblysy,
Katonqaraǵaı aýdany