Qazaqstan Respýblıkasynyń Memlekettik hatshysy Gúlshara Ábdiqalyqova Halyqaralyq III «Uly Dala» gýmanıtarlyq ǵylymdar forýmyna qatysty. Bul týraly akorda.kz habarlady.
Basqosýǵa, sondaı-aq Túrkııa Prezıdentiniń keńesshisi A.Attar, Qyrǵyzstan Prezıdentiniń keńesshisi S.Raev, Monǵolııa Ǵylym akademııasynyń prezıdenti R.Dúgerıın, halyqaralyq uıymdar basshylary, dıplomatııalyq korpýs, memlekettik organdar ókilderi, qoǵam qaıratkerleri jáne kórnekti ǵalymdar qatysty.
Gúlshara Ábdiqalyqova quttyqtaý sózinde Elbasynyń: «Bizdiń qasıetti jerimizdi yqylym zamandardan Uly Dala dep, al babalarymyzdy Uly Dalanyń urpaqtary dep ataǵan. Biz – solardyń jalǵasymyz, Uly Dalanyń muragerlerimiz», – degen sózine toqtaldy.
– «Uly Dala» – búkil túrki áleminiń basyn biriktiretin mazmuny tereń, aıasy keń kıeli uǵym. Osy qasıetti ataý Eýrazııanyń keń-baıtaq keńistigin mekendegen kúlli halyqtardyń taǵdyryn qamtıdy, – dedi Memlekettik hatshy.
Qazir Qazaqstanda «Rýhanı jańǵyrý» baǵdarlamasy júzege asyrylyp jatyr. Sonyń aıasynda qazaq tili álipbıin kırıllısadan latyn grafıkasyna kóshirý jumysy bastaldy. «Jańa gýmanıtarlyq bilim. Qazaq tilindegi 100 jańa oqýlyq» jobasyn iske asyrý maqsatymen alǵashqy 18 eńbek qazaq tiline aýdaryldy. «Kıeli nysandardyń 3d týrymen qamtylǵan vırtýaldy kartasy» ázirlendi.
2018 jyl – túrki dúnıesi kúntizbesindegi erekshe beles. Bıyl táýelsiz Qazaqstannyń sımvoly – Astananyń 20 jyldyǵy merekelenedi. Sondaı-aq musylman álemindegi tuńǵysh zaıyrly memleket – Ázerbaıjan Demokratııalyq Respýblıkasy qurylýynyń 100 jyldyǵy, túbi bir túrki halqynyń tuǵyrly tulǵalary – qazaqtyń aqıyq aqyny Maǵjan Jumabaevtyń – 125, qyrǵyzdyń zańǵar jazýshysy Shyńǵys Aıtmatovtyń 90 jyldyǵy toılanýda.
Memlekettik hatshy Halyqaralyq III «Uly Dala» gýmanıtarlyq ǵylymdar forýmynyń adamzat damýyndaǵy Túrki áleminiń orny men mádenı-rýhanı qundylyqtary, jahandyq jáne aımaqtyq ózekti máseleler talqylanatyn ıntellektýaldy suhbat alańy mártebesine ıe bolyp úlgergenin aıtty.
Forým 6 seksııa boıynsha ótedi. Oǵan 250-den astam qazaqstandyq ǵalymdar men olardyń Ázerbaıjan, Germanııa, Qyrǵyzstan, Qytaı, Mońǵolııa, О́zbekstan, Reseı, Tájikstan, Túrkııa jáne basqa da elderden kelgen áriptesteri qatysady. Sondaı-aq, Halyqaralyq Túrki akademııasy shyǵarǵan kitaptardyń kórmesi bolady.
Forým aıasynda Memlekettik hatshy Gúlshara Ábdiqalyqova jıynǵa qatysýshy elder delegasııalarynyń basshylarymen de kezdesti.