Qazaqstan Respýblıkasynyń ákimshilik-aýmaqtyq qurylysynyń keıbir máseleleri týraly
«Qazaqstan Respýblıkasynyń ákimshilik-aýmaqtyq qurylysy týraly» 1993 jylǵy 8 jeltoqsandaǵy Qazaqstan Respýblıkasy Zańynyń 9-babyna sáıkes QAÝLY ETEMIN:
1. Shymkent qalasy respýblıkalyq mańyzy bar qalalardyń sanatyna jatqyzylsyn.
2. Ońtústik Qazaqstan oblysynyń ákimshilik ortalyǵy Shymkent qalasynan Túrkistan qalasyna kóshirilsin.
3. Ońtústik Qazaqstan oblysy Túrkistan oblysy dep qaıta atalsyn.
4. Qazaqstan Respýblıkasynyń Úkimeti:
1) Qazaqstan Respýblıkasynyń Joǵarǵy Sotymen, Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdarmen birlesip:
bir aı merzimde osy Jarlyqty iske asyrý jóninde uıymdastyrý is-sharalarynyń josparyn (jol kartasyn) bekitsin;
2018 jylǵy 1 qyrkúıekke deıin Qazaqstan Respýblıkasynyń zańnamalyq aktilerin osy Jarlyqqa sáıkes keltirýdi qamtamasyz etetin sharalar qabyldasyn;
osy Jarlyqty iske asyrý jóninde ózge de sharalar qabyldasyn;
2) Túrkistan qalasyn túrki áleminiń mádenı-rýhanı ortalyǵy retinde damytý boıynsha bas jospardy ázirleýge konkýrs uıymdastyrý jáne ótkizý jónindegi komıssııa qursyn.
5. Ortalyq memlekettik organdar jáne Shymkent qalasy men Túrkistan oblysynyń jergilikti memlekettik organdary tıisti jergilikti memlekettik organdar men uıymdardyń irkilissiz ári tıimdi jumys isteýin qamtamasyz etý jóninde sharalar qabyldasyn.
6. Túrkistan oblysynyń jergilikti ókildi jáne atqarýshy organdary, sondaı-aq ortalyq memlekettik organdardyń aýmaqtyq bólimsheleri men vedomstvolyq baǵynysty mekemeleri Túrkistan qalasyna kóshkenge deıin Shymkent qalasynda ornalasady dep belgilensin.
7. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.
8. Osy Jarlyq resmı jarııalanǵan kúninen bastap qoldanysqa engiziledi.
Qazaqstan Respýblıkasynyń Prezıdenti N.Nazarbaev
Astana, Aqorda, 2018 jylǵy 19 maýsym, № 702