Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Advokattyq qyzmet jáne zań kómegi týraly» zań jobasy qaraldy.
Zań jobasy bilikti zań kómegin alýǵa konstıtýsııalyq quqyqty iske asyrý, halyqtyń áleýmettik osal toptaryna, qıyn ómirlik jaǵdaıǵa tap bolǵan adamdarǵa tegin negizde zań kómegin alýǵa qol jetkizýdi qamtamasyz etý jáne advokattyq qyzmet pen zań kómegin kórsetý júıesin keshendi túrde jetildirý maqsatynda ázirlendi.
Zań jobasymen advokattar alqasynyń jáne zań konsýltanttary palatasy basqarý organdarynyń qurylymy, olardy qalyptastyrý tártibi jáne olardyń quzyretteri aıqyndalady. Bul rette advokattar alqasy prezıdıýymynyń tóraǵasy men músheleri úshin tórt jyldan aspaıtyn, al alqalyq basqarý organy men zań konsýltanttarynyń atqarýshy basqarý organy úshin – olardyń jarǵysymen ókilettik merzimi belgilenedi.
Advokattar alqasyna jáne zań konsýltanttary palatalaryna olarǵa múshelikke qabyldaý sharttary, zań kómegin kórsetý standarttary jáne olarǵa múshelikke qabyldaý kezinde kirý jarnalaryn tóleýge tyıym salý belgilenedi.
Zań jobasymen:
- zań kómegin kórsetý jónindegi qyzmetti retteý jáne óz músheleriniń Qazaqstan Respýblıkasynyń advokattyq qyzmet jáne zań kómegi týraly zańnamasynyń, zań konsýltanttary palatasynyń qaǵıdalary men standarttarynyń, Kásiptik ádep kodeksiniń talaptaryn saqtaýy bóliginde olardyń qyzmetin baqylaý maqsatynda qurylǵan, zań konsýltanttary palatalarynyń tizilimine engizilgen, múshelik sharttarynda keminde elý zań konsýltantyn biriktiretin, mindetti múshelikke negizdelgen ózin-ózi retteıtin uıym zań konsýltanttarynyń palatasy bolyp tanylatyny;
- joǵary zań bilimi bar, zań mamandyǵy boıynsha keminde eki jyl jumys ótili bar, attestattaýdan ótken, zań konsýltanttary palatasynyń múshesi bolyp tabylatyn jáne zań kómegin kórsetetin jeke tulǵa zań konsýltanty bolyp tabylatyny belgilengen.
Zań konsýltantynyń sottarda tulǵalardyń múddelerin bildirý túrinde zań kómegin kórsetý úshin zań konsýltanttary palatalarynyń biriniń múshesi bolý mindeti de reglamentteledi.
Ýákiletti organ zań kómegin kórsetý salasynda zań konsýltanttary palatalarynyń Qazaqstan Respýblıkasynyń advokattyq qyzmet jáne zań kómegi týraly zańnamasynyń, zań konsýltanttary palatasy qaǵıdalarynyń jáne standarttarynyń, Kásiptik ádep kodeksiniń talaptaryn oryndaýyna baqylaýdy júzege asyrady.
Zań jobasymen 2020 jylǵy 1 qańtardan bastap úshinshi tulǵalarǵa keltirilgen zııandy óteý úshin zań konsýltanttarynyń qyzmetin mindetti saqtandyrý ınstıtýty qoldanysqa engiziledi.
Senatorlar sondaı-aq «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobasyn birinshi oqylymda qarady.
Zań jobasymen zańdary men zań aktilerine ózgerister men tolyqtyrýlar engizý kózdeledi.
Qylmystyq-prosestik kodeksinde jáne «Adamdardy qoǵamnan ýaqytsha oqshaýlaýdy qamtamasyz etetin arnaýly mekemelerde ustaý tártibi men sharttary týraly» zańynda advokattyq orderdi qoldaný alyp tastalady.
Ákimshilik quqyq buzýshylyq týraly kodeksinde advokattyń suraý salýy boıynsha málimetterdi belgilengen merzimderde usynýdan bas tartqany úshin jaýaptylyqqa tartylatyn adamdardyń tizbesine zańdy tulǵalar engizildi.
Zań jobasymen «Notarıat týraly» zańyna:
- notarıýs lısenzııasynyń qoldanysyn kásipkerlik nemese aqy tólenetin ózge qyzmetpen aınalysqan, merzimdi áskerı qyzmetti ótkergen jáne notarıýs óziniń ótinishi negizinde ókilettikterin oryndamaǵan kezeńde toqtata turýdy;
- notarıýstyń tórelik talqylaýda tóreshi bolyp saılanýǵa (taǵaıyndalýǵa) quqyǵyn;
- jeke praktıkamen aınalysatyn notarıýstyń tártiptik jaýaptylyǵyn kózdeıtin tolyqtyrýlar engiziledi.
Zań jobalary Palatanyń qaraýyna usynyldy.