Qazaqstan Respýblıkasy Memlekettik qyzmet isteri organdarynyń 20 jyldyǵy qarsańynda ótken baıqaý bıyl ekinshi ret ótkizilip otyr. Oǵan elimizdiń ár óńirinen úmitkerler qatysty.
«Qazaqstan Respýblıkasynyń úzdik memlekettik qyzmetshisi» respýblıkalyq baıqaýyna Mańǵystaý óńirinen 4 úmitker qatysqan bolatyn. Olar – Amanǵalı Nurdáýletov, Ramır Alekperov, Baýyrjan Tuıaqov jáne Renat Shamýhanov.
Aıta ketý kerek, buǵan deıin ótken óńirlik komıssııa otyrysynda belgili bolǵandaı baıqaýǵa qatysýǵa 27 úmitker nıet bildirgen. Onyń 16 basqarma men bólim basshylary bolsa, 11 – bas mamandar.
Baıqaý memlekettik qyzmetti nasıhattaý, oń ımıdjin qalyptastyrý, mártebesin artyrý jáne otansúıgishtikke tárbıeleý maqsatynda uıymdastyrylǵan.
Elimiz boıynsha 20 qatysýshy jeńimpaz dep tanylsa, onyń ekeýi mańǵystaýlyqtar. Olar – Baýyrjan Tuıaqov jáne Ramır Alekberov.
32 jastaǵy sheneýnik Baýyrjan Tuıaqov 2012 jyldyń qarasha aıynan «Mańǵystaý oblysynyń jastar saıasaty máseleleri basqarmasy» memlekettik mekemesiniń basshysy laýazymyn atqaryp keledi. L.Gýmılev atyndaǵy Eýrazııa Ulttyq ýnıversıtetin «halyqaralyq qatynastar» mamandyǵy boıynsha bitirgen. Bıyl QR Prezıdentiniń «Bolashaq» halyqaralyq baǵdarlamasy aıasynda Ulybrıtanııanyń Nottıngem ýnıversıtetinde oqyp, «memlekettik saıasat» magıstri ataǵyn alǵan. Memlekettik qyzmettegi ótili 9 jylǵa jýyqtaǵan. Qazaq, orys, aǵylshyn jáne ıtalıan tilderinde sóıleıdi.
Ekinshi jeńimpaz Ramır Alekperov 27 jasta. Memlekettik qyzmette júrgenine 5 jylǵa jýyqtapty. 2012 jyldyń qarashasynda «Mańǵystaý oblysynyń qarjy basqarmasy» memlekettik mekemesine jumysqa turyp, búginde bıýdjettiń atqarylýyn úılestirý jáne monıtorıng bóliminiń basshysy laýazymyn atqaryp keledi. Aqtaýdaǵy «Yessenov University» joǵary oqý ornynda zańger mamandyǵy boıynsha bilim alǵan. Orys, aǵylshyn, lezgın jáne ázirbaıjan tilderin meńgergen.
Respýblıkalyq baıqaýdyń jeńimpazdaryn QR Memlekettik qyzmet isteri jáne sybaılas jemqorlyqqa qarys is-qımyl agenttiginiń Mańǵystaý oblysy boıynsha departamentiniń basshysy, Ádep jónindegi keńes tóraıymy Nurgúl Jannazarova qabyldap, óziniń quttyqtaý tilegin jetkizdi.
-Bul baıqaýǵa ótken jyly Mańǵystaýdan birde-bir memlekettik qyzmetshi qatyspaǵan edi. Al bıyl qyzyǵýshylyq tanytqandar kóp boldy. Menińshe bul úrdis kelesi jyly da jalǵasyp, jerlesterimiz áli de jaqsy nátıjelerge qol jetkizetinine senimdimin. Memlekettik qyzmetke jańadan qabyldanǵan jastar Baýyrjan men Ramır aǵalarynan úlgi alyp, osyndaı jeńisterimen qýantyp, respýblıkalyq deńgeıde talaı jeńimpaz shyǵary sózsiz. Jalpy burynǵyǵa qaraǵanda memlekettik qyzmetke degen qyzyǵýshylyqtyń artqanyn baıqaýǵa bolady, bul árıne qýantarlyq jaǵdaı», - dedi departament basshysy.
Al respýblıkalyq baıqaýdyń jeńimpazdary bolsa, óz isine adal ári kúndelikti qyzmetinde óziniń fýnksıonaldyq mindetterine jaýapkershilikpen qaraǵan adam oń nátıjege qol jetkizeri sózsiz deıdi. Eń bastysy memlekettik qyzmet degenimiz halyqqa qyzmet, elińe degen qyzmet ekendigin jadynan shyǵarmaý tıis ekendigin aıtady Baýyrjan men Ramır.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy