Almatyda rýhanııatymyzdyń qara shańyraǵy – Ulttyq kitaphanadaǵy Ǵylymı qyzmetkerlerge arnalǵan zalǵa kórnekti ǵalym, fızıka-matematıka ǵylymdarynyń doktory, Qazaqstan ǵylym akademııasynyń akademıgi, professor О́mirzaq Sultanǵazınniń esimi berildi.
Qazaq ǵylymyna ólsheýsiz úles qosqan О́mirzaq Mahmutulynyń esimi fızıka-matematıka salasyndaǵy sırek ári mańyzdy zertteýlermen tyǵyz baılanysty. Ásirese, Qazaqstannyń ǵarysh salasyna qatysty ilgerindi zertteýleri elimiz ǵana emes, postkeńestik elder men alys-jaqyn shetelderde joǵary baǵalanǵany belgili. О́mirzaq Mahmutulynyń ǵylymı jetekshiligimen 6 doktorlyq jáne 25 kandıdattyq dıssertasııa qorǵalyp, eki júzden astam ǵylymı jáne ǵylymı-kópshilik maqalalary, monografııalary men oqýlyqtary búginde elimizdiń joǵary oqý oryndary stýdentteri úshin qundy eńbekter bolyp tabylady.
Aıtýly sharaǵa qatysqan Almaty qalasy ákimdigi Mádenıet jáne arhıvter basqarmasy basshysynyń orynbasary D.A. Álıev Ulttyq kitaphana qolǵa alǵan ıgi sharanyń mańyzdylyǵyna toqtalyp ótti. Búginde jeti mıllıonǵa jýyq kitap qory bar rýhanııat ordasy bilim, ǵylym jolynda júrgen qaýymǵa ǵana emes, mádenı qundylyqtarymyzdy erteńgi urpaqqa syny men syryn buzbaı jetkizýde kóptegen jobalardy júzege asyryp keledi. Danııar Abzalıdenuly elimizdiń Ǵylym akademııasynyń basshylyǵynda qyzmet etip, otandyq ǵylymnyń damýynda aıryqsha úles qosqan О́mirzaq Mahmutulynyń eren eńbekterine toqtalyp ótti. Osy ıgi sharany qolǵa alyp, úzege asyryp otyrǵan ǵalymnyń otbasyna, Ulttyq kitaphana dırektory J.T.Seıdýmanovqa alǵys bildirip, kitaphanaǵa arnaıy syılyq tabys etti.
Al qıyn-qystaý jyldarda ǵalymnyń ǵylymı izdenisteri jolynda eńbek etýine qoldaýshy, qamqorshy bola bilgen jary Raıhan Ǵanıqyzy О́.Sultanǵazın esimimen atalatyn Ǵylymı qyzmetkerlerge arnalǵan zalǵa matematıka, fızıka salasyna qatysty ǵylymı kitaptardy syıǵa tartyp, osy ıgi sharaǵa atsalysyp otyrǵan azamattarǵa alǵysyn bildirdi. Sonymen birge ǵalymnyń artynda qalǵan urpaqtary ǵylym jolyna túspegenimen, elimiz ekonomıkasynyń damýyna óz úlesterin qosyp júrgenin aıtyp ótti. Qyzy Janat halyqaralyq deńgeıdegi bıznesterge atsalysyp júrse, uly Almaz О́mirzaquly «Sulpak» kompanııasynyń aksıoneri.
Kelesi kezekte sóz alǵan ǵalymnyń shákirti, Abaı atyndaǵy QazUPÝ rektory T.O. Balyqbaev О́mirzaq Mahmutulynyń ǵylymdaǵy ólsheýsiz eńbegi týraly aıtyp ótip, ustazdyq etken jyldardaǵy estelikterimen bólisti. «Qazaqstan ǵylymynda aıshyqty orny bar О́.Sultanǵazın esiminiń Ulttyq kitaphana tórinen alýy qazaq ǵylymyna degen úlken qurmet. О́.Sultanǵazın esimi atalǵanda ǵarysh salasynda jasaǵan ilgerindi eńbekteri sózsiz eske túsedi. Ǵalymnyń bastamasymen Ǵarysh zertteýleri ınstıtýty qurylǵanynyń ózi О́.Sultanǵazınniń bútindeı qazaq ǵylymyna qosqan eńbeginiń ólsheýsiz ekendigin bildiredi»,- dep atap ótti sharaǵa qatysqan professor I.T.Pak.
Elvıra Serikqyzy,
«Egemen qazaqstan»
ALMATY