Ákimdikte qaldyqtardy basqarý júıesin jetildirý týraly memlekettik organnyń ókilderi men «Operator ROP», Qazaqstan ekologııa uıymy qaýymdastyǵynyń» qatysqan jumys tobynyń otyrysy bolyp ótti, dep habarlaıdy elorda ákimdiginiń resmı saıty qorshaǵan ortany qorǵaý jáne tabıǵat paıdalaný basqarmasyna silteme jasap.
Jıynǵa «Syctom» qaldyqtardy basqarý boıynsha fransýz agenttiginiń ókilderi de qatysty. «Syctom» kompanııasy EKSPO-2017 halyqaralyq mamandandyrylǵan kórmesine qatysýshy jáne qaldyqty óńdeý boıynsha eń úzdik ınnovasııalyq tehnologııany usyndy.
Otyrysta «Syctom» agenttiginiń ókilderi Astana qalasyna arnalǵan «Qatty turmystyq qaldyqtardy qaıta óńdeý boıynsha sheber-jospar jobasyn damytý salasyndaǵy ózara árekettestik» jobasyn tanystyrdy. «Operator ROP» JShS qatty turmystyq qaldyqtar (QTQ) fraksııasy boıynsha organıkalyq óńdeý barysynda tehnologııanyń ońtaıly joldaryn izdeýdegi atqarylǵan jumystaryn tanystyryp shyqty.
Elordanyń klımattyq jaǵdaıyn esepke ala otyryp, halyqaralyq tájirıbemen QTQ quramyn zerttedi, jumys tobynyń músheleri tehnıkalyq kompost óndirisi arqyly QTQ boıynsha organıkalyq (tamaq) qordalandyrý jolymen qaldyqtardy óńdeý ádisin tańdady. Basqasha aıtqanda, «sýly» qaldyqtar – ıaǵnı ıistenip ketken tamaq qaldyqtaryn arnaıy tehnologııanyń kómegimen organıkalyq tyńaıtqyshqa (kompost) aınaldyrady. Nátıjesinde kompost jerdi tyńaıtýǵa, karerdi rekýltıvasııa jasaýǵa, polıgondar men qurtylyp bara jatqan landshaftylardy qalpyna keltirýge paıdalanady.
Esterińizge sala keteıik, astanada qaldyqtardy bólek jınaıtyn júıeni engizýdiń pılottyq jobasy iske asyrylyp jatyr. Qatty turmystyq qaldyqtar bólek jınalyp, olar eki fraksııaǵa bólinedi, «qurǵaqqa» (plastık, qaǵaz, shyny, metall) jáne «sýly» degenine organıkalyq zattar. «Qurǵaq» qaldyqtardy jınaý úshin osy jyly 6276 sary evrokonteıner ornatyldy. Bularǵa 25 jańa «Iveco» markaly qaldyq tasymaldaıtyn kólik qyzmet kórsetedi.