Qazaqstan azamattary úshin Shengen vızasynyń quny 60 evrodan 80 evroǵa deıin qymbattaýy múmkin.
Eýropalyq odaqqa múshe-memleketterdiń elshileri EO Keńesiniń atynan EO Vızalyq kodeksine ózgertý engizý usynysy boıynsha kelissózderdi júrgizýge mandat berý týraly sheshimdi qoldady. Bul týraly EO Keńesiniń arnaıy ótinishinde aıtylǵan. «Kóshi-qon prosesterin tıimdi basqarý kelýge qaqysy joq azamattardy qaıtarýymyzǵa múmkindik beredi. Vızalyq kodekstiń jańa erejeleri óz azamattaryn qaıtarǵysy kelmeıtin úshinshi jaqtaǵy memleketterge jaýap qaıtarý úshin taǵy bir tetik beredi»,- dedi Bolgarııanyń premer-mınıstri Valentın Radev. Josparly ózgeristerge sáıkes, ótinishter jol júrýden 6 aıǵa deıin jáne 15 kúnnen keshiktirilmeı engiziletin bolady. Sondaı-aq, ótinishterdi elektrondy nusqada toltyrý múmkindigi qarastyrylyp jatyr.
EO Vızalyq kodeksinde bolatyn ózgertýler vızalardy rásimdeý barysyn jyldamdatyp, naqtylap beredi. Sondaı-aq, Shengen vızasynyń baǵasy 80 evroǵa deıin nemese QR Ulttyq bankiniń baǵamy boıynsha 31 411 teńgege kóteriledi degen boljam bar. Eske salaıyq, Qazaqstan azamattary úshin Shengen vızasynyń quny qazirgi tańda 60 evrony quraıdy, 6 jasqa deıingi balalarǵa - tegin.