Búgin QR Prezıdenti Nursultan Nazarbaevtyń tapsyrmasy boıynsha Premer-Mınıstr Baqytjan Saǵyntaev pen Prezıdent Ákimshiliginiń basshysy Ádilbek Jaqsybekov jańadan qurylǵan Túrkistan oblystyq máslıhatynyń sessııasyna qatysty.
Otyrys barysynda Premer-Mınıstr Baqytjan Saǵyntaev Túrkistan oblysynyń ákimi laýazymyna Janseıit Qanseıituly Túımebaevty taǵaıyndaý týraly usynysy jazylǵan Memleket basshysynyń oblystyq máslıhat depýtattaryna joldaǵan hatyn oqyp berdi. Daýys berý qorytyndysy boıynsha depýtattar Prezıdent usynǵan kandıdatýrany biraýyzdan qoldady.
J. Túımebaev 1958 jyly dúnıege kelgen. S. M. Kırov atyndaǵy Qazaq memlekettik ýnıversıtetin jáne Máskeý memlekettik áleýmettik ýnıversıtetin támamdaǵan. Fılologııa ǵylymdarynyń doktory. Ár jyldary QR Prezıdenti Hattamasynyń jetekshisi, QR Prezıdentiniń keńesshisi, QR-nyń RF-tegi Tótenshe jáne О́kiletti Elshisi, QR bilim jáne ǵylym mınıstri, QR-nyń Túrkııa Respýblıkasyndaǵy Tótenshe jáne О́kiletti Elshisi qyzmetterin atqarǵan. 2016 jylǵy qazan aıynan bastap Ońtústik Qazaqstan oblysynyń ákimi laýazymyn atqarǵan.
Budan keıin Premer-Mınıstr Baqytjan Saǵyntaev pen QR Prezıdenti Ákimshiliginiń basshysy Ádilbek Jaqsybekov Túrkistan oblysynyń aktıvimen kezdesip, jańa ákimdi tanystyrdy.
Baqytjan Saǵyntaev keshe Memleket basshysynyń tarıhı sheshimimen elimizde jańa Túrkistan oblysy qurylǵanyn eske saldy.
«Túrkistan kóptegen ǵasyrlar boıy tek Ortalyq Azııanyń emes, sondaı-aq búkil túrki áleminiń saıası ári rýhanı ómiriniń ortalyǵy boldy. Memleket basshysynyń kıeli Túrkistandy oblys ortalyǵy retinde belgileýi týraly sheshimi óńirdi odan ári damytýǵa septigin tıgizedi. Elbasynyń osy tarıhı sheshimi jergilikti halyqtyń ómirin jaqsartýǵa, sondaı-aq jalpy óńirdiń áleýmettik-ekonomıkalyq damýyna oń yqpal etedi», — dedi B. Saǵyntaev.
Memleket basshysynyń tapsyrmalaryn oryndaý maqsatynda QR Premer-Mınıstriniń birinshi orynbasary A. Mamınniń tóraǵalyǵymen Túrkistan qalasynyń túrki áleminiń mádenı jáne rýhanı ortalyǵy retinde damýyna yqpal etetin Bas jospardy ázirleý boıynsha Úkimettik komıssııa quryldy.
Tanystyrý barysynda Baqytjan Saǵyntaev J. Túımebaevtyń túrli jaýapty basshylyq qyzmetterdegi úlken jumys tájirıbesin atap ótti.
Sondaı-aq, kezdesý aıasynda jergilikti jurtshylyq ókilderi de sóz sóıledi. Jazýshy Marhabat Baıǵut, qoǵam qaıratkeri Sh. Myrzahmetov óńir atynan Memleket basshysyna halyqtyń rýhanı kúsh-jigerin kóteretin jáne óńirdi damytýǵa jańa serpin beretin sheshim qabyldaǵany úshin alǵys birdirdi.
Aıta keteıik, 19 maýsymda Prezıdenttiń «QR ákimshilik-aýmaqtyq qurylysynyń keıbir máseleleri týraly» Jarlyǵymen Ońtústik Qazaqstan oblysy Túrkistan oblysy dep qaıta atalyp, ákimshilik ortalyǵy Túrkistan qalasy boldy.