Ortalyq kommýnıkasııalar qyzmetiniń aqparattyq alańynda Energetıka mınıstri Qanat Bozymbaevtyń halyq aldynda esep berý kezdesýiniń qorytyndysyna arnalǵan baspasóz máslıhaty ótti.
О́ziniń baıandamasynda vedomstvo basshysy energetıka salasynda atqarylǵan jumystar, jetistikter jáne bolashaq josparlar, sonymen qatar ótken jylda iske asyrylǵan jumystardyń nátıjesine toqtaldy. Munaı-gaz salasynyń barlyq sektoryndaǵy kórsetkishter 2017 jyldyń sáıkes kezeńimen salystyrǵanda ósimdi kórsetetinin kóldeneń tartty.
«Jer qoınaýy týraly kodekske sáıkes jer qoınaýyn paıdalaný quqyǵyn berý aıtarlyqtaı jeńildetildi, merzimder qysqartyldy, ákimshilik kedergiler tómendetildi, kelisimshart 40 jumys kúnine deıin, quqyqtyq, ekonomıkalyq saraptamalar, kelisimshartqa qol qoıý úshin jobalyq qujat qysqartyldy. Osy jyly jer qoınaýyn paıdalaný quqyǵyna konkýrstar jalǵastyrylatyn bolady, birinshi 5 óńirde (Qostanaı, Qaraǵandy, Qyzylorda, Jambyl, Mańǵystaý oblystarynda) 11 jer qoınaýy ýchaskeleri usynyldy.
Konkýrstyń nátıjeleri boıynsha kelisimsharttarǵa Jańa kodekstiń normalary boıynsha qol qoıylady. Aıta ketetin taǵy bir jaıt, 2018 jyly Shymkent zaýytyndaǵy jańǵyrtý jumystary aıaqtalady. 2018 jyly munaı óńdeýdiń jalpy kólemi 1 mln tonnaǵa ósip, 16 mln tonnany quraıdy. Sonymen qatar 2018 jyldyń basynan bastap, Keden odaǵynyń Tehnıkalyq reglamenti kúshine endi. 2018 jyldyń shildesinen bastap motor otyndarynyń sapasy K-4 jáne 5 ekologııalyq klastaryna sáıkes kelýi tıis», dedi Qanat Bozymbaev.
Sonymen qatar mınıstr elektr energııasyn óndirý kólemi 46,4 mlrd kVt. saǵatty qurap, bul 2017 jyldyń sáıkes kezeńine qaraǵanda 7,7 paıyzǵa óskenin tilge tıek etti jáne Energııa óndirýshi kompanııalardyń shekti tarıfterin qaıta qaraý boıynsha jumystar júrgizip jatqanyn aıtty.
Raýan QAIDAR,
«Egemen Qazaqstan»