Qaraǵandy oblystyq beıneleý óneri murajaıy men qaladaǵy №1 balalar kórkemóner mektebiniń arasynda biraz jyldan beri «Túlek» dep atalatyn joba boıynsha shyǵarmashylyq áriptestik ornaǵan. Taıaýda óner mektebiniń túlekteri atalǵan murajaı tórine óz týyndylaryn qoıyp, kýrstastary men ata-analar aldynda shyǵarmashylyq synaqtan ótti.
Bıylǵy jyldyń túlekteri kórermen nazaryna «Kompozısııa» jáne «Músin» pánderi boıynsha qorytyndy jumystaryn usyndy. Bolashaq sýretshiler men músinshilerdiń týyndylary birin-biri qaıtalamaıdy, túrli texnıka men mánerde oryndalǵan.
– Bizdiń murajaıda kórkemóner mektebiniń túlekteri shyǵarmashylyq jobalaryn qorǵady. Birinshiden, mundaı pishim mektepte alǵan bilimniń qorytyndy kezeńine erekshe mańyz beredi. Al ekinshiden, ol ónermen tikeleı baılanys ornatýǵa múmkindik beredi, – deıdi oblystyq beıneleý óneri murajaıynyń ǵylymı qyzmetkeri Nazerke Jartyn.
Túlekterdiń kórmedegi jumystary kóbine týǵan ólke taqyrybyn qamtyǵan. Munyń ózi ónerli jastardyń elge, týǵan jerge degen shynaıy súıispenshiligi men qurmetinen habar berse kerek. Bul ıgi isten ustazdar qaýymy da tys qalmaǵan. «Ár týyndyda ustazdardyń kásibı qoldaýy men yqylaspen jetekshilik etkeni baıqalady», – deıdi Nazerke Jartyn.
Kórme aıaqtalǵannan keıin túlekterge kórkemóner mektebin bitirgeni týraly kýálikter saltanatty túrde tabys etildi.
Qaırat ÁBILDA,
«Egemen Qazaqstan»
QARAǴANDY