Elordamyzdyń 20 jyldyǵyna oraı Mádenıet jáne sport mınıstrliginiń qoldaýymen Astanadaǵy «Saryarqa» velotreginde tuńǵysh ret «Voice of Astana» I halyqaralyq festıvali ótti.
Estrada ánshileri arasynda uıymdastyrylǵan óner baıqaýynyń álemniń túkpir-túkpirin qamtyǵan geografııalyq aýqymynyń keńdigimen qatar, festıval baǵdarlamasynyń qazaqtyń birtýar daryny, ánshi Batyrhan Shúkenovti eske alýǵa baǵyttalýy kópshilik qaýymnyń kóńilin erekshe serpiltti.
– Búginde Astana – beıbitshilik pen toleranttylyqtyń sımvoly. Osynaý 20 jyldyń ishinde elordamyz ónerdiń san túrin bir arnada toǵystyrǵan eýrazııalyq keńistiktegi asa iri mádenı ortalyqqa aınalyp úlgerdi. Bas shahar tórinde tuńǵysh ret ótip jatqan «Voice of Astana» I halyqaralyq festıvaliniń kórkemdik hám mazmundyq deńgeıi sonyń aıǵaǵy. Bul festıval arqyly jaqyn jáne alys shet elderdiń úzdik oryndaýshylary men mádenıet qaıratkerleri arasyndaǵy shyǵarmashylyq yntymaqtastyqtyń jańa formalaryn damytý qajet», – dep atap kórsetti A.Muhamedıuly.
2018 jyldyń 25 mamyryna deıin jalǵasqan irikteý kezeńinde «Voice of Astana» baıqaýyna 20-dan astam shet elden 18 ben 35 jas aralyǵyndaǵy barlyǵy 600-ge jýyq ánshi men túrli mýzykalyq toptan quralǵan úmitkerlerdiń ótinimi qabyldandy. Olardyń ishinde otandyq qatysýshylardan bólek, Reseı, Ázerbaıjan, Grýzııa, Ulybrıtanııa, Italııa, Bolgarııa, Estonııa, Qyrǵyzstan, Qytaı, Úndistan, Túrkııa, Tatarstan, Izraıl, Armenııa, О́zbekstan elderiniń talantty ónerpazdary bar. Bul jóninde atalǵan baıqaýdyń qazylar alqasynyń múshesi, Qazaqstannyń eńbek sińirgen ártisi, belgili mýzykant Baıǵalı Serkebaev: «Mýzykamen ómir súretin daryndy jastarmen árdaıym qýana tanysamyn. Ári jańa esimderdi únemi baqylap júremin. «Juldyzdar fabrıkasynda» biz Jigits tobyn jınadyq. Osy joly da kóptegen jańa esimder týatyndyǵyna senimdimin» – dep baıqaý bolashaǵynyń jarqyn ári ǵumyrly bolatynyna zor senim bildirdi.
Baıǵalı Ermekulynyń aıtýynsha, «Voice of Astana» baıqaýynyń bıyldan bastap jyl saıyn uıymdastyrylatyny kóptegen talantty jas oryndaýshylardyń juldyzynyń janyp, óner álemine batyl qadam basýyna úlken múmkindik syılaıdy. Ondaı mysaldar álemdik mýzyka tájirıbesinde az emes. Máselen, tarıhy 1951 jyldan bastaý alatyn «San-Remo» ıtalııa ánderiniń festıvali, sol sekildi 1956 jyldan beri úzdiksiz uıymdastyrylyp kele jatqan «Evrovıdenıe» men 2002 jyldan beri TMD aýmaǵyna asa tanymal óner dodasy – «Novaıa volna» án baıqaýlary mýzyka mamanynyń joǵaryda keltirgen pikirin tolyqtaı qýattaıdy.
«Voice of Astana» baıqaýynyń jartylaı fınalynda qatysýshylar osy sharaǵa arnaıy jazylǵan elimizdiń bas qalasy – Astana týraly avtorlyq ánderdi shyrqasa, aqtyq dodada óz repertýaryndaǵy úzdik týyndylardy kópshilik qaýym men mýzyka mamandarynyń talqysyna usyndy. Mádenıet jáne sport mınıstri Arystanbek Muhamedıuly, Qazaqstannyń eńbek sińirgen ártisi Baıǵalı Serkebaev, Reseı Federasııasynyń eńbek sińirgen ártisi Valerıı Meladze, 31 arnanyń bas dırektory Baǵdat Qojahmetov, halyqaralyq «Evrovıdenıe» jáne balalar «Evrovıdenıe» baıqaýlary basqarmasynyń múshesi Nıkola Kalıgıore jáne Discover Silk Road Star-dyń bas dırektory bastaǵan óner maıtalmandary qazylyq etken baıqaýda vokalısterge oryndaý sheberligi men ártistik óner, sahnalyq tartymdylyq hám zaldy ıgerý talaptary turǵysynan baǵa berildi.
Baıqaý qorytyndysy boıynsha, qazylar alqasynyń sheshimimen III oryn men baıqaý laýreaty ataǵy ázerbaıjandyq ónerpaz Ilham Nazarovqa tabys etildi. II oryndy qytaılyq Lın Bao men Ýkraınadan kelgen qatysýshy Tatıana Dokanına teńdeı bólisse, I oryn men baıqaý laýreaty ataǵy Goldstone (Ulybrıtanııa) men Berdibek Qulǵaraevtyń (Qazaqstan) qanjyǵasyna baılandy. Al festıvaldiń basty júldesi – Gran-prı men «Astana daýysy» qurmetti ataǵy jáne qomaqty qarjylaı syılyqqa Grýzııadan kelgen talantty ónerpaz Avıtandıl Abeslamıdze laıyq dep tanyldy.
Sondaı-aq «Voice of Astana» I halyqaralyq festıvaliniń aıasynda Valerıı Meladze, Leonıd Agýtın, Vladımır Presnıakov, Alekseı Chýmakov, Iýlıanna Karaýlova, Elına Chaga, «A-Studio» toby, Roza Rymbaeva, Karına Abdýllına, Meırambek Besbaev, Jubanysh Jeksenuly, Dilnaz Ahmadıeva, JCS toby, Aıqyn Tólepbergen, Dınara Sultan, Álı Oqapov, The Jigits, aǵaıyndy Júginisovter, Vox Acapella toby bastaǵan qazaqstandyq jáne reseılik belgili estrada ánshileriniń qatysýymen ótken Batyrhan Shúkenovti eske arnalǵan konsert pen Qazaqstannyń eńbek sińirgen ártisi Baıǵalı Serkebaevtyń shyǵarmashylyq keshi de óner dýmanynyń kórigin qyzdyryp, qala turǵyndary men qonaqtaryna merekelik kóńil syılady.
Nazerke JUMABAI,
«Egemen Qazaqstan»