Oral qalasynda qaraqshylyq shabýyl jasap, «izin sýytpaqshy» bolǵan kúdiktini polısııa aǵa serjanty quryqtady.
Oral qalalyq IID tergeý basqarmasynyń júrgizýshisi polısııa aǵa serjanty Ǵabıt Nuǵmanov sol kúni qyzmet babymen qalada kólikpen kele jatyp, belgisiz bireýdiń kóshedegi úılerdiń biriniń qaqpasynan yrshyp túsip júgirip bara jatqanyn baıqaıdy. Onyń bul júgirisine kúdikpen qaraǵan tártip saqshysy ony bireýden qorqyp qashyp bara jatyr nemese birdeńe búldirip qoıǵan bolsa kerek dep, izine túsedi. Bir kezde álgi adam úılerdiń janynda ornalasqan garajdardyń arasyna kirip ketedi.
Kenet ol izinen qalmaǵan tártip saqshysyn qolyndaǵy qarýymen atyp jibermekshi bolady. Ǵabıt buǵyp úlgeredi. Sosyn basyn kóterip qarasa, anaý odan ári júgirip barady. Bul da qaıtadan qalmaı artynan júgiredi. Sońynan qýyp jetýge qalǵan polısııa qyzmetkerine álgi kúdikti «Baýyrym, meni jiber, qýma artymnan!» dep odan ári qasha jóneledi. Ǵabıt bul adamnyń qandaı da bir iske dýshar bolǵanyn sezip, artynan qalmaýǵa tyrysady. Biraq bir sátke kúdiktiniń kózinen tasalana qalady. Sosyn onyń osy aınaladan alysqa uzamaıtynyn sezgen tártip saqshysy dereý óz áriptesterin kómekke shaqyrady. Artynan bári anyqtalady.
Kúdikti sol kúni Almazov kóshesiniń boıyndaǵy úılerdiń birine kirip, úı ıesin ańshylyq qarýymen qorqytyp, aqshasy men baǵaly altyn buıymdaryn tonapty. Qashyp bara jatqan kezinde ony polısııa aǵa serjanty Ǵ.Nuǵmanov baıqap qalady. Osylaısha der kezinde kúdikti ustalyp, Oral qalasynyń ýaqytsha ustaý ızolıatoryna qamaldy. Tergeý barysynda 48 jasar kúdiktiniń buryn sotty bolǵany anyqtaldy. Oral qalalyq sotynyń úkimimen aǵymdaǵy jyldyń maýsym aıynda alty jylǵa bas bostandyǵynan aıyryldy.
Al qyzmet atqarý kezinde qyraǵylyq tanytyp, qylmyskerdiń taıanǵan qarýyna taısalmaı, qaısarlyq kórsetken aǵa serjant Ǵabıt Nuǵmanov IID basshylyǵy tarapynan marapattaýǵa usynyldy.
Asylaı Ǵubasheva,
BQO IID baspasóz qyzmetkeri