Álem chempıonatynyń 2-týr oıyndary bastaldy. Kóptegen quramalar endi ózderiniń josparlaryna sáıkes pleı-offqa joldama ala bastaıdy. Top ishinde 2 jeńiske jetkender birden kelesi kezeńge ótedi. Al olardyń qaı orynǵa jaıǵasatyny jáne kimderge qarsylas atanatyny 3-týrda belgili bolady.
Deneli Dzıýba rekord jańartty
Reseı quramasy Mysyrdan 3:1 basym túsip, pleı-offqa shyqqan alǵashqy komanda desek bolady. Jarysty uıymdastyryp jatqan eldiń komandasy endi Ýrýgvaımen oıynda 1 upaı alsa da jetkilikti. Al Mysyr jáne onyń kóshbasshysy Muhammed Salah úshinshi oıynnan soń, ota- nyna qaıtady. Sol oıynda Reseı shabýylshysy Artem Dzıýba 55 ret dopqa talasypty. Bul Álem chempıonatynyń rekordy. Alyp deneli orys shabýylshysy sol 55 ret talasqan doptarynyń 23-in ózine qaldyrǵan. Munyń ózi de rekord bolyp tur. Bul jaǵynan ekinshi oryn Ýrýgvaı qorǵaýshysy Dıego Godınde. Ol 19 ret qarsylastan dop tartyp alǵan.
«Grızman Messıdiń kómekshisi bolmaıdy»
«Atletıko» Madrıd komandasynyń basshysy Mıgel Marın dál osylaı málimdedi. «Antýan Grızmannyń ózi de joǵary deńgeıdegi fýtbolshy. Ol bireýdiń kómekshisi bolyp júre almaıdy» dedi. Jaqynda ǵana Antýan «Atletıko» klýbymen kelisimin 2023 jylǵa deıin uzartyp edi. «Barselona» komandasy Fransııa quramasynyń oıynshysyna usynys tastap, ony satyp alǵysy kelgen. Al Grızman bolsa Messıdiń kómekshisi bolyp júrýden bas tartypty.
«Realǵa» qaqpashy kerek
«Real» Madrıd klýby bolsa qaqpashy tappaı sharq urýda. Kosta-Rıka quramasynyń qaqpashysy Keılor Navastyń klýbtan ketetini jaıly kóp aıtylýda. Osy aralyqta «Real» basshylary Belgııa quramasynyń negizgi qaqpashysy Tıbo Kýrtýamen kelisimge kelýdi kózdeıdi. Sebebi ıspan klýby «Roma» qaqpashysy Alıssondy kóndirgenimen, klýbtyń ózimen kelise almady. «Real» 50 mıllıon usynsa, ıtalııalyq ujym 80 mıllıon surap otyr. Álem chempıonaty kezinde fýtbol bazary naǵyz qyzǵan shaǵynda.
Ronaldýdyń kezekti rekordy
Nemis telearnasy qyzyqty aqparatty jarııalady. Ispanııa-Portýgalııa arasyndaǵy oıynda Krıshtıaný Ronaldý saǵatyna 38,6 shaqyrym jyldamdyqpen júgiripti. О́z aıyp alańynan De Hea qorǵaǵan qaqpaǵa qaraı dopsyz júıitkigen portýgal shabýylshysy buryn-sońdy fýtbolda tirkelmegen jyldamdyq kórsetipti. Áriptesi Gonsalo Gýedeshke keremet pas shyǵaryp berip, qaýipti sát jasady. Alaıda áriptesi bul múmkindikti golǵa aınaldyra almady.
Jankúıerdi tonap ketti
Máskeýdegi «Kosmos» qonaqúıine ornalasqan Marokko quramasynyń názik jandy jankúıerin urylar tonap ketipti. Bul jaıynda «Interfaks» agenttigi jazady. Qaraqshylar 6 myń eýro jáne baǵaly tehnıkalardy qoldy qylǵan. Mundaı oqıǵaǵa Argentına men Qytaı azamaty da ushyraǵan bolatyn. Osyndaı keleńsiz jaıttardyń kóbeıýine baılanysty tártip saqshylary qyzmetterin odan ári kúsheıtip jatyr.
Neımar jaraqat aldy
Álem chempıonatynyń favorıti Brazılııa quramasy ekeni daýsyz. Al «selesao» ujymynyń basty juldyzy Neımar keshegi jattyǵý jumystary kezinde jaraqattanypty. Baspasóz ókilderiniń jazýynsha, Neımar tobyǵyn aýyrtyp, jattyǵýdy jalǵastyra almaǵan. Qurama komandanyń dárigerleri ony jasyl alańnan jetektep alyp ketipti. Qazir onyń kelesi oıynǵa qatysý, qatyspaýy anyqtalyp jatyr. Aıta keteıik, Brazılııa kelesi oıynyn 22 maýsym kúni Kosta-Rıkaǵa qarsy ótkizedi.
Ermuhamed MÁÝLEN,
«Egemen Qazaqstan»