«Nur Otan» partııasynyń «balalarǵa arnalǵan tegin IT synyptar» jobasy boıynsha Jańaózen gımnazııa-mektebinde IT-synyby ashyldy. Atalmysh synyptyń tusaýkeserine «Nur Otan» partııasy Mańǵystaý oblystyq fılıaly tóraǵasynyń birinshi orynbasary N.Týmyshev, «Nur Otan» partııasy Jańaózen qalalyq fılıalynyń tóraǵasy, qala ákimi Á.Daýylbaev, qalalyq partııa fılıaly tóraǵasynyń orynbasary T.Tájibaeva sonymen qatar máslıhat depýtattary, BPU tóraǵalary, BAQ ókilderi, gımnazııa ujymy jáne ata-analar qatysty.
Memleket basshysy Nursultan Ábishuly Nazarbaev 2017 jyldyń qarasha aıynda partııa Saıası keńesiniń keńeıtilgen otyrysynda partııa aldyna sıfrlandyrýǵa qatysty tapsyrmalar bergen bolatyn. Osyǵan sáıkes, Qazaqstannyń ekonomıkalyq, saıası jáne rýhanı jańǵyrýyna jan-jaqty qoldaý kórsetýdiń jańa tetigin qalyptastyrý baǵytynda Partııa jańa jobalardy júzege asyrýdy qolǵa aldy. Olardyń qatarynda búgin ózimiz ashylýyna kýá bolyp otyrǵan «balalarǵa arnalǵan tegin IT-synyptaryn» ashý jobasy da bar.
Qalalyq partııa fılıaly tóraǵasynyń orynbasary Tájibaeva IT-synyptardyń maqsatyn túsindire ketti.
-Negizgi maqsat – elimizdiń aqparattyq-sıfrlyq áleýetin damytý, jańasha oılaıtyn zııatkerlik ortany qalyptastyrý, joǵary deńgeıdegi IT mamandaryn daıyndaýǵa úles qosý, oqýshylardyń IT tehnologııaǵa qyzyǵýshylyǵyn arttyrý jáne jazǵy demalystaryn tıimdi ótkizý. Mekteptegi IT sabaqtaryn ınformatıka páni muǵalimi nemes IT mamandary júrgizedi, dedi ol.
Joba «Love to Cade» baǵdarlamalarymen jumys isteýdi balalarǵa úıretý arqyly baǵdarlamalaýǵa, óz betinshe saıt qurastyrýǵa úıretedi. Bul bastamalar mektepterde fakýltatıv páni retinde engizilip, 3-6 aılyq kýrs retinde oqytylady. Oqytý prosesi modýldik júıe boıynsha júrgiziledi jáne oqýǵa 8-16 jas aralyǵyndaǵy balalar tartylady. Kýrs aıaqtalǵannan keıin balalar ınjenerlik oı qalyptastyrýǵa, ózgeshe oılaýǵa, ýaqytty durys josparlaýǵa, iri tapsyrmalardy kishigirim bólikterge bólip sheshýge mashyqtanyp, óz betinshe sheshim qabyldaýǵa úırenip shyǵady dep kútilýde.
IT mamandar daıyndaý boıynsha baǵdarlamalaýdy úıretýge jobany iske asyra alatyn IT mamandar, muǵalimder tańdalyp, aldyn ala daıyndyq kýrstarynan ótedi. Sondaı-aq, Jańaózen qalasynda IT-synyptaryn ashý júıeli túrde, josparǵa sáıkes jalǵasyn tabady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy