19 jastaǵy Reseı tennısshisi Elena Rybakına endi Qazaqstannyń týy astynda óner kórsetedi. Bul aqparat Halyqaralyq tennıs fedarsııasynyń resmı saıtynda jarııalanyp otyr.
Elena 1999 jyldyń 17-maýsymynda Máskeýde týǵan. Bes jasynan beri sporttyń osy túrine den qoıǵan ol óz qurbylary arasynda birqatar týrnırlerde jaqsy nátıje kórsetip, túrli jarystarda júldeli oryndardy ıelendi. Jasóspirimder arasyndaǵy «Úlken dýlyǵa» sanatyndaǵy týrnırlerge qatysyp, 2017 jyly Melbýrndegi Avstralııanyń ashyq birinshiligi men Parıjdegi «Rolan Garrostyń» jartylaı fınalyna deıin jetti. Sonymen qatar, 18 jasqa deıingi Eýropa birinshiliginiń komandalyq saıysynda Rybakına bas júldeni oljalaǵan.
Áıelder arasyndaǵy jarystarda da Elena Rybakına ózin jaqsy qyrynan kórsetýde. Atap aıtsaq, 2015-2017 jyldar aralyǵynda ol Antalııa, Helsınkı jáne Ferganada uıymdastyrylǵan týrnırlerdiń fınaldyq saıysynda óner kórsetti. Qazirgi kezde 19 jastaǵy oıynshy WTA reıtınginde 191-oryndy ıelenýde.
Ǵalym SÚLEIMEN,
«Egemen Qazaqstan»