2018 jyldyń 21 maýsymynda «KazRoboProject-2018» 10-21 jas aralyǵyndaǵy balalar men jastar arasynda bilim berý robototehnıkasy boıynsha ǵylymı-zertteý jáne shyǵarmashylyq jobalar baıqaýynyń fınaly ótti.
Baıqaýdyń maqsaty: Qazaqstanda balalar men jasóspirimder arasynda bilim berý jáne sport robototehnıkasyn damytý jáne dáripteý. Is-sharanyń uıymdastyrýshylary aldyna qoıǵan mindetteri - óńirlerdegi úzdik jobalardy anyqtaý jáne respýblıkalyq konkýrsqa qatysý úshin úzdik komandalardy qalyptastyrý, sondaı-aq daryndy mektep oqýshylaryna profıldik ýnıversıtetter men kompanııalardyń nazaryn aýdarý bolyp tabylady.
QR Tuńǵysh Prezıdenti – Elbasy qorynyń atqarýshy dırektorynyń orynbasary Sultan Aıtjanov: «Búgingi kezdesýimiz úzdik tehnologııalar mekeni bolyp tabylatyn Nazarbaev ortalyǵynda ótkizilip otyrǵanyna qýanyshtymyn. QR Tuńǵysh Prezıdenti Qory qyzmetiniń negizgi baǵyttarynyń biri daryndy balalardy qoldaý bolyp tabylady. Qor seriktesterimen birge kóptegen jyldar boıy jastarǵa arnalǵan ár túrli jobalardy júzege asyryp, balalar men jasóspirimderdiń ıntellektýaldy jáne shyǵarmashylyq áleýetin ashýǵa úles qosyp keledi. Jas daryndardy qoldaý - bul jalpyulttyq mańyzy bar is-shara.Búgin bizdiń jas ónertapqyshtarymyz qazylar alqasyna óziniń úzdik robottaryn usynady. Balalarǵa sáttilik tileımin!»
Aıta keteıik, 29 mamyr - 9 maýsym aralyǵynda elimizdiń barlyq oblystarynda baıqaýdyń irikteý kezeńderi ótti, onda 200-ge jýyq joba usynyldy. Chempıonat eki jas kategorııasynda ótti: birinshi top: 10-15 jasar balalar, ekinshi top - 16-21 jas arasyndaǵy jastar. Baıqaýǵa qatysýshylar - 2 adamnan turatyn toptar. Jobalar erkin taqyrypta boldy, biraq basty shart - jobanyń qoǵam úshin paıdaly bolýy tıis.
Barlyq jobalardyń tusaý keseri ótkennen keıin ádil qazylar alqasy jeńimpazdardy anyqtady.
10 – 15 jas aralyǵyndaǵy topta:
- 1 oryn - Malyh Artem men Syzdyqova Aıpara «Pancakebot» quımaqtardy jasaıtyn roboty úshin (Pavlodar oblysy);
- 2 oryn – Qunanbaev Bekbolat pen Toqbergen Nuralı «Robot arba» jobasy úshin (Almaty q.)
- 3 oryn – Sergeev Mark pen Panfılov Valerıı neıro-ınterfeısi bar ýnıversaldy protezi úshin («jasandy qol») (Mańǵystaý oblysy).
16 - 21 jas aralyǵyndaǵy topta:
- 1 oryn - Dýdchenko Lıýbov «Oqyp ko’r» jobasy úshin (kórý qabileti tómen adamdarǵa arnalǵan kez-kelgen mátindi jedel túrde Braıl shrıftine aýdaratyn qurylǵy) (Almaty q.);
- 2 oryn - Dıkın Aleksandr men Maksýtov Mıhaıl elektroenergııany esepteý quraldaryn avtomatızasııalaý jobasy úshin (Astana q.);
- 3 oryn - Sábıtov Oljas pen Hafızova Alına «Aeroponic» ósimdikterdi topyraqsyz ósirý tehnologııasy úshin (Soltústik - Qazaqstan oblysy).
Baıqaýdy qazaqstandyq bilim berý jáne sporttyq robototehnıka «Kazrobotıks» federasııasy uıymdastyrdy. Is-sharanyń bas seriktesi – QR Tuńǵysh Prezıdenti – Elbasynyń Qory.
Baıqaýdyń fınaldyq kezeńiniń resmı seriktesi – «Infokommýnıkasııalyq tehnologııalardy damytý qory» KQ.
О́ńirler boıynsha irikteý kezeńderi barysynda «Nur Otan» partııasynyń «Jas Otan» jastar qanaty, «Qazposhta» AQ, ««Zerde» ulttyq ınfokommýnıkasııa holdıngi» AQ, ««Astana EXPO-2017» ulttyq kompanııasy» AQ qoldaý bildirdi