Keshe UBT birinshi kúniniń qorytyndysy shyǵaryldy. «Ulttyq testileý ortalyǵy» RMQK dırektory Ramazan Álimqulovtyń aıtýynsha, 20 maýsym kúni elimiz boıynsha 13 897 túlek ulttyq biryńǵaı testileýge qatysqan. Alǵashqy kúnniń qorytyndysyna sáıkes, 11 795 túlek shekti mánnen, ıaǵnı 50 baldan artyq jınaǵan.
«Bul – jalpy qatysýshylardyń 84,8 paıyzy. Al 50 baldy almaǵandardyń sany – 2 102. Bul jalpy tapsyrýshylardyń 15,2 paıyzy. Shekti baldy jınaı almaǵan túlekter tamyz aıynda qaıta tapsyrady. Eger tamyz aıyndaǵy synaqtan da súrinetin bolsa, onda oqý bitirýshi túlektiń qyrkúıek aıynda aqyly túrde bir semestrge oqýǵa tapsyrýyna bolady. Bir semestrden keıin qańtar aıynda úshinshi ret tapsyrýǵa múmkinshiligi bar. Jáne de aıta ketetin taǵy bir jaıt, qajetti baldy jınaı almaǵan túlektermen, olardyń ata-analarymen bizdiń psıholog mamandar jumys istep, kerekti keńesterin berýde», dedi ol.
Atalǵan jańashyldyqtyń nátıjesinde 2017 jyly elimiz boıynsha 30 myńdaı adam joǵary oqý ornyna túsýge múmkindik alǵan.
«UBT-nyń alǵashqy kúninde 33 testileý pýnkti jumys istedi. Jalpy, test tapsyrýǵa 14 250 túlek ótinish berdi. Olardyń naqty tapsyryp shyqqany – 13 897. Bul – ótinish bergen túlekter sanynyń 97,5 paıyzy. Bir túlektiń nátıjesi esepke alynbady. Oqıǵa elimizdiń ońtústik óńirinde tirkeldi. Ol test tapsyrý erejelerin buzǵan», dedi R.Álimqulov.
Bes pán boıynsha respýblıkadaǵy ortasha ball 80,9 paıyzdy kórsetken. «Bul ótken jylǵy UBT-nyń birinshi kúniniń qorytyndysymen salystyrǵanda 4 balǵa artyq. Eske sala keteıik, byltyr birinshi kúnniń qorytyndysy boıynsha respýblıkadaǵy ortasha ball 77,5-ti quraǵan edi. Testileýdiń alǵashqy kúni tirkelgen eń joǵary ball – 138. Ázirshe 140 upaıdyń bárin jınaǵan oqýshy tirkelmedi. Aldaǵy kúnderi eń joǵary baldy jınaıtyn shákirtterimiz shyǵady dep senemiz», dedi R.Álimqulov.
Sonymen qatar Qazaqstan boıynsha 46 túlek testi aǵylshyn tilinde tapsyrýǵa ótinish bergenimen, olardyń bireýi ǵana óz tańdaýyn ózgertpegen. Aǵylshyn tilinde tapsyrǵan túlek – Almaty qalasynyń ókili ekenin aıta ketsek deımiz.
«Koll-ortalyqqa 105 qońyraý kelip tústi. Olardyń kóbi – UBT-ny ótkizý erejesine qatysty shalynǵan qońyraýlar. Bıylǵy jańashyldyqtyń biri – testileý barysyn onlaın-rejimde baqylaý. Osy oraıda, aýdıtorııalardyń 85 paıyzy beınebaqylaý kameralarymen jabdyqtalǵanyn atap ótken jón. Alǵashqy kúnniń qorytyndysy boıynsha apellıasııalyq organǵa ótinish bergender bolǵan joq», dedi ulttyq testileý ortalyǵynyń dırektory. Onyń sózinshe, apellıasııalyq organǵa ótinish bergisi kelgen túlek test tapsyrǵan kúnniń erteńinde túski 13:00-ge deıin úlgerýi kerek.
Raýan QAIDAR, «Egemen Qazaqstan»