Elordada Mádenıet jáne sport mınıstri Arystanbek Muhamedıulynyń halyq aldynda esep berý kezdesýi ótip, onda jurtshylyq mádenıet, óner, sport, tilderdiń damýy, jáne týrızm salasyndaǵy ózderin qyzyqtyratyn suraqtarǵa mınıstrden tikeleı jaýap aldy.
Kezdesý barysynda Arystanbek Muhamedıuly mınıstrliktiń qyzmeti týraly baıandap, vedomstvoǵa qatysty salalarda atqarylyp jatqan jumystar men aldaǵy ýaqytqa josparlanǵan is-sharalarmen bólisti.
О́z baıandamasynda mınıstr «Rýhanı jańǵyrý» baǵdarlamasyn júzege asyrý Astana qalasynyń 20 jyldyǵyn merekeleýge daıyndyq, mádenıet, sport jáne týrızm salalarynyń damýy máselelerin qamtydy.
A.Muhamedıuly ótken jyly «Rýhanı jańǵyrý» baǵdarlamasy aıasynda mınıstrlik táýelsiz Qazaqstannyń tarıhynda alǵash ret elimizdiń kıeli jerleriniń biryńǵaı beldeýin – Qazaqstannyń kıeli jerleriniń geografııasyn qurýǵa kiriskenin atap ótti.
«Alǵash ret Ulttyq mýzeı janynan «Qasıetti Qazaqstan» ortalyǵy quryldy. Búgingi kúni «Qazaqstannyń kıeli jerleriniń geografııasy» arnaıy jobasy boıynsha 2 aýqymdy respýblıkalyq forým, alǵash ret mádenıet jáne óner qyzmetkerleri kásibı merekesi aıasynda «Rýhanı qazyna» atty festıval ótti. Búgingi kúnge deıin Qazaqstannyń barlyq rýhanı qundylyqtaryn, biregeı tarıhı oryndary men tabıǵı eskertkishterin tolyq bir júıege keltirý boıynsha aýqymdy jumystar júrgizildi. «Týǵan jer» ǵylymı qaýymdastyǵyna birikken jetekshi ǵalymdardyń, ólketanýshylardyń, arheologtardyń arqasynda Jalpyulttyq (185 obekt) jáne jergilikti (456 obekt) mándegi obektilerdiń tizimi qalyptastyryldy. О́ńirlerdegi tarıhı-mádenı mura jáne negizgi obektiler týraly biregeı ǵylymı materıaldardy jınaqtaǵan «Kıeli Qazaqstan» ensıklopedııasynyń birinshi tomy shyǵaryldy», dedi mınıstr.
Kezdesý barysynda qazaqstandyq kıno salasynyń damý máseleleri de keńinen talqylandy. Vedomstvo basshysynyń bergen aqparaty boıynsha, ulttyq kınematograftar búginde elimizdiń biregeı tarıhı-mádenı murasyn, tarıhı oqıǵalar jáne kórnekti qaıratkerlerdi nasıhattaýǵa bet burǵan. Sonymen qatar mınıstr eldegi týrızm salasynyń IJО́-degi úlesin arttyrý týraly mańyzdy maqsat qoıylǵanyn aıtyp ótti.
«EKSPO nátıjesinde oń tájirıbemiz bar, Qazaqstanǵa 7 mıllıonnan astam adam keldi, bul aldyńǵy jyldarǵa qaraǵanda 18 paıyzǵa artyq. Ishki týrızm aǵymy 20 paıyzǵa artty. Tıimdilikti qoldaý maqsatynda jyldyń basynan bastap elektrondy vızalardy engizý boıynsha jumys júrgizilýde – 67 eldiń azamattary týrıstik maqsat úshin Qazaqstanǵa vızasyz kirýge quqyly. Búginde týrızm salasy otyn-energetıka, agroónerkásip kesheni, kólik, saýda sııaqty ekonomıkanyń mańyzdy salalarynyń qatarynda. Qazaqstandaǵy týrızmdi damytýdyń qazirgi jáne yqtımal draıverlerin anyqtaý úshin óńirlermen jáne «Atameken» palatasymen birge 60 týrıstik pýnkt belgilendi. Olardy shartty túrde ekige bólip qarastyrýǵa bolady. Birinshisi, Medeý, Shymbulaq, Ahmet Iаsaýı kesenesi jáne basqa da tanymal týrıstik nysandar bolsa, ekinshisi, Alakól, Balqash, Túrgen jáne t.b. Osylardyń negizinde Qazaqstannyń respýblıkalyq týrızm kartasy quryldy. Biz bul joba týrıster sanyn jylyna 13 mıllıonǵa deıin ulǵaıtyp, 5,8 mlrd dollar tikeleı ınvestısııa tartýǵa, 64 myń turaqty jumys ornyn qurýǵa múmkindik beredi dep boljap otyrmyz», dedi A.Muhamedıuly.
Mádenıet jáne sport mınıstriniń pikirinshe, salamatty ómir saltyn belsendi nasıhattaýdyń jáne sport salasyn júıeli túrde qoldaýdyń arqasynda búgingi tańda 5 mln adam – elimizdiń árbir úshinshi turǵyny (onyń jarty mıllıonynan astamy – balalar men jasóspirimder) elimizde júıeli túrde sportpen shuǵyldanady.
Sportshylarymyz 2017 jyly 206 altyn, 242 kúmis, 312 qola medal jeńip aldy. Respýblıka boıynsha 11 myńnan astam sporttyq ǵımarat jumys isteıdi, jyl saıyn demeýshiler qarajaty esebinen barlyq óńirlerde dene shynyqtyrý-saýyqtyrý keshenderi qalpyna keltirilýde, túrli sport túrleri boıynsha 700 myńnan astam oqýshy shuǵyldanatyn 35 myń sport seksııasy qyzmet etedi. Qazirgi tańda Qazaqstan Respýblıkasy Tuńǵysh Prezıdentiniń jyl saıynǵy jazǵy jáne qysqy sport túrleri boıynsha testerin tapsyrý barsha qazaqstandyqtar úshin aıqyn biriktirýshi faktorǵa aınalyp otyr», dedi Mádenıet jáne sport mınıstri.
Raýan QAIDAR, «Egemen Qazaqstan»