Endi ońtústik megapolıstegi eńbek mıgranttary memlekettik qyzmetterdi halyqqa qyzmet kórsetý ortalyqtarynyń standartyna saı ala alady. Búgin «Azamattarǵa arnalǵan úkimet» memlekettik korporasııasy QR IIM-men birlesip, Shymkent qalasynda mıgrasııalyq halyqqa qyzmet kórsetý ortalyǵyn (MHQO) ashty. Bul elimizdegi kóshi-qon qyzmetterin kórsetetin ekinshi ortalyq, alǵashqysy osy jyldyń basynda Astanada ashylǵan bolatyn.
Aıta ketý kerek, sońǵy jyldary elimizdiń úshinshi megapolısinde sheteldik jumysshylardyń eleýli aǵyny baıqalýda. MHQO-da sheteldik azamattar memlekettik qyzmetterdi «bir tereze» qaǵıdaty boıynsha bekitilgen standartqa saı ala alady: elektrondyq kezek, arnaıy jabdyqtalǵan jumys oryndary, profıldi mamandar jáne yńǵaıly jumys kestesi. Qyzmet alýshylar 1-2 saǵattyń ishinde medısınalyq tekseristen, daktıloskopııadan óte alady. Sondaı-aq saqtandyrý polısin rásimdep, jeke sáıkestendirý nómirin (JSN) ala alady. Buryn barlyǵyn tapsyrý úshin birneshe kún ketetin.
«Buryn sheteldikter jumys isteýge ruqsat alý úshin qajetti qujattaryn rásimdep, birneshe kún júretin. JSN alyp, salyq máselesin sheship, saqtandyrý anyqtamasyna qol jetkizý úshin birneshe mekemeni aralaýshy edi. Endi sheteldikter qujattardy bes kún boıy emes, bir kúnniń ishinde rásimdeý múmkindigine ıe boldy. Bul mıgranttar úshin ǵana emes, jumys berýshi úshin de óte qolaıly», - deıdi «Azamattarǵa arnalǵan úkimet» memlekettik korporasııasynyń Túrkistan oblysy boıynsha fılıalynyń dırektory Erjan Jeńisbekov.
Jańa MHQO jumys barysyn jeńildetip qana qoımaı, sybaılas jemqorlyq áreketteriniń aldyn-alýǵa jol ashady. Jyl basynan beri Qazaqstanda kóshi-qon baǵyty boıynsha 267 287 memlekettik qyzmet kórsetilgen.
Jańa front-ofıs Shymkent qalasyndaǵy Nursat yqshamaýdany, Baıterekov kóshesi, 89 úı mekenjaıynda ornalasqan. Kólemi 1500 sharshy metrdi quraıtyn, 100 kólikke arnalǵan avtoturaǵy bar zamanaýı ǵımarat qyzmet alýshylarǵa tańǵy saǵat 09-dan keshki saǵat 18.30- deıin, túski úzilissiz qyzmet kórsetedi.