Mańǵystaý oblysynyń ákimi Eraly Toǵjanov Dubai Port World (BAÁ) iri port operatorynyń basqarýshy dırektory Rızvan Soomarmen (Rizwan Soomar) kezdesti.
Eki jaqty kezdesý barysynda Mańǵystaý oblysynyń aımaǵynda qoldanystaǵy teńiz aılaqtaryn basqarý tıimdiligin arttyrý maqsatynda kompanııamen yntymaqtastyq, kólik-logıstıkalyq júıeni jańǵyrtý jáne damytý salasyndaǵy birlesken ınvestısııalyq jobalardy iske asyrý máseleleri talqylandy. Dubai Port World kompanııasynyń ozyq tehnologııalary men tájirıbesi 80-nen astam álemdik porttar men termınaldarda qoldanylady. «Qorǵas-Shyǵys qaqpasy» arnaıy ekonomıkalyq aımaǵyn basqarý salasynda da atalmysh kompanııanyń tájirıbesin engizilgen.
Mańǵystaý oblysynyń tranzıttik áleýetin logıstıkalyq hab retinde damytý úshin bıylǵy jyldyń naýryz aıynda «Aqtaý teńiz porty» AEA men DP World kompanııasynyń arasyndaǵy strategııalyq áriptestik týraly ekijaqty kelisimge qol qoıyldy.
Kezdesý barysynda oblys basshysy sapardyń mańyzdylyǵyn atap ótti. Sonymen qatar, Eraly Toǵjanov iri emırattyq kompanııamen birlesken ınvestısııalyq jobalardy júzege asyrýǵa daıyn ekenin aıtty.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy