Rysgúl Hasenova Semeı qalalyq Ishki ister Basqarmasynda memlekettik til jáne aqparat bóliminiń jetekshi mamany qyzmetin atqarady. Onyń osy quqyq qorǵaý salasyna qyzmetke kelýine erekshe bir oqıǵa sebep bolǵan eken.
-Ishki ister organyna qyzmetke kelýge tikeleı yqpal etken jaǵdaı, joldasym Serik Tursynuly Túsipovtyń 1993 jyly osy salada jumys istep júrip, qylmyskerler qolynan qaza tapqany sebep boldy,-dedi Rysgúl Rafaelqyzy,-ómirimdi bir kúnde aýmaly-tókpeli qylǵan sol kezeńnen bastap, kúıeýim qyzmet etken mekemeniń bastyqtary, jeke quramdaǵy áriptesteri bizdi nazardan esh qaldyrmaı, árbir meıram saıyn quttyqtap, jáı kúnderi áleýmettik-turmystyq jaǵdaıymyzdy bilip turatyn boldy . Serik Ishki ister Basqarmasynda qyzmette júrip, qylmysker kisi qolynan qaıtqan kezde, meniń basymda túrli qıynshylyqtar bolǵany jasyryn emes. Kishkentaı sábı qyzym ekeýmiz páter jaldap turyp jattyq. Semeı qalalyq ishki ister basqarmasynyń ujymy bizdi únemi qamqorlyǵynda ustady. Sodan ózińiz bilesiz, táýelsizdik alǵan jyldary memlekettik tilge tereń kóńil bólinip, qazaq tiliniń aıasy keńip jatty ǵoı. Osyǵan oraı quqyq qorǵaý salasyna qazaq tili páni muǵalimi kerek boldy. Men Semeıde mektepte jumys istep júrgen em. О́zderine jumysqa shaqyrdy. Sonymen osy Semeı qalalyq ishki ister basqarmasyndaǵy ózge ult ókilderine qazaq tilin úıretýdi tapsyrdy. Túrli ulttardyń qazaq halqyna degen qurmeti sheksiz ekendigin sol joly baıqadym. Barlyǵy birden memlekettik tildi, salt-dástúrdi bilýge erekshe yqylas tanytty. Osylaısha quqyq qorǵaý salasynda ómirin qıǵan marqum jubaıymnyń zaıyby retinde meniń de kóńilim ornyna birtindep túsip, ujymymyzdyń arqasynda ózime ózim kele bastadym. Semeı qalalyq ishki ister basqarmasyna osy qamqorlyǵy úshin myń da bir rahmet!
Kelisim shartpen toǵyz aı jumys istegennen keıin, Semeıdegi mamandandyrylǵan kúzet mekemesiiń kadr bólimine qazaq tilin meńgergen maman kerek bolady da, Rysgúl Hasenova sonda aýysady. 2002 jyldan bastap, quqyq qorǵaý salasynda, Shyǵys Qazaqstan oblysy ishki ister Departamenti Semeı qalalyq ishki ister Basqarmasynyń memlekettik til jáne aqparat bóliminiń ınspektory laýazymymen polısııa kapıtany shenine deıin kóteriledi.
- Ol kezde bizge quqyq qorǵaý salasynyń qyzmetkerleri sııaqty arnaıy forma kıim kıgizip, sonymen júretin edik,-dedi Rysgúl Rafaelqyzy,-keıinirek ishki ister organy salasyndaǵy qosalqy qyzmettegi adamdar attestattalǵan quramnan Úkimet qaýlysymen birjola alynatyn boldy. 10-12 jyl jumys ótilim, arnaıy kapıtan ataǵym bar edi. Biraq, biz qosalqy jumys dep atalatyn bolǵandyqtan, endi qazirde osy jumysymdy tek memlekettik qyzmetshi retinde jalǵap, jumys istep kelemin.
Rysgúl Hasenova bizge óziniń kúıeýi Serik Túsipovtyń qyzmet barysynda qalaı qaza tapqany týraly aıtyp berdi. Qolynda ShQO IID Semeı qalalyq IIB MTAB aǵa ınspektory polısııa maıory D. Qalımuratova degen áriptesiniń osydan kóp jyl buryn jazǵan esteligi bar eken. Estelik Rysgúlge qymbat, óıtkeni ol ótken kúnniń deregi. Sonymen qatar ol qylmyskerdiń qolynan qaza tapqan eri Serik Tursynuly Túsipovtyń fotosýretterin bizge kórsetti. Sýrette ádemishe kelgen jas jigit otaǵasy kishkentaı qyzy úsh jasar Áıgerimdi aldyna alyp, Rysgúlmen úsheýi birge túsipti.
Rysgúldyń aıtýynsha, bul oqıǵa bylaı bolǵan eken. 1993 jyldyń 22 qarashasynda Semeı qalasyndaǵy syrtqy trıkotaj-toqyma fabrıkasy jumysshylarynyń jatahanasynda alkogoldi ishimdikke masańsyp alǵan eki qaranıet sotqar jumysshylardyń berekesin alyp, bylapyt sózder aıtyp, keleńsizdik týǵyzady. Olardy qoǵamdyq tártipti buzbaýǵa shaqyrǵan mılısııa qyzmetkeriniń eskertýine qulaq aspaı, beıpil qylyqtarymen qarsylyq kórsetedi. Arty «úlken áńgimege aınalyp bara jatqanda», oqıǵa bolǵan jerge, ıaǵnı jatahananyń 4-shi qabatyna qatardaǵy mılısıoner Serik Túsipov qoǵamdyq tártip saqtaý maqsatyndaǵy kezekshilikte bolǵan mılısıonermen birge áriptesterine kómekke keledi.
-Shektenshyqqan tentekterdiń bireýi buryn eki ret sotty bolǵan azamat «B», «mılısııa nysandy úlgisinde kıingenderdi» onsha kórmeıtindigin beıpil sózben jetkizip, «jaqyndasańdar óltiremin» dep, syrt kıiminiń qaltasynan sýyryp alyp shyqqan pyshaǵymen qahar kórsete, sytyla qashyp, astyńǵy qabatqa túsetin jaqqa bettegen,-dedi Rysgúl Hasenova,-qaranıet sotqar eshteńeden taıynbaıtyndyqtan osy bette ony jiberýge bolmaıtynyn, óıtkeni onyń jolynda kezikken qandaıda bir kinásiz adamnyń jábir kóretinin sezgen qatardaǵy mılısıoner, meniń kúıeýim onyń izine túsken. Serik 1-shi qabattyń foıesinde ony qýyp jetip, quryqtaı bergende qylmysker qolyn bosatyp alyp, onyń ish tusyna pyshaǵyn suǵyp alǵan.
Seriktiń jaraqat alǵanyn áriptesteri baıqap qalyp, artynan jetedi. Olar buzaqylardy jataqhanany aınala bergende kóshe qıylysynda quryqtaıdy. Osylaısha 1993 jyldyń 25 qarashasynda Semeı oblysy ishki ister basqarmasy Áýezov aýdandyq ishki ister bólimi janyndaǵy kúzet bólimshesiniń mılısıoneri, qatardaǵy mılısıoner Serik Tursynuly Túsipov buzaqylyqtyń jolyn kesýde jaraqat alyp, oblystyq aýrýhanada úsh táýlik boıy óz-ózine kelmesten, qyzmettik boryshyn oryndaý kezinde alǵan jaraqaty nátıjesinde qaıtys bolady. Qazaqstan Respýblıkasy Prezıdentiniń 1996 jylǵy 24 qazandaǵy Qaýlysymen qatardaǵy mılısıoner Túsipov Serik Tursynuly «Erligi úshin» medalimen marapattalady.
Balalyq shaq esteligi búkil ǵumyrǵa jetetin qazyna emes pe? Ákesi qaıtys bolǵan kezde úsh jastan endi ǵana asqan sábı aýrýhana terezesiniń shetinen bir qolymen tyrmysa ustaı umtylyp, ekinshi qolymen «papalap», tereze áınegine qol sozady...,dep sol sátti berile sýrettep jazady D. Qalımuratova óz esteliginde. Sábıdi arqasynan demep turǵan anasynyń oıy – úsh táýlik boıy jasandy dem alý quraly arqyly ómir súrý úshin kúresip jatqan joldasynyń amandyǵy edi. Ornynda bar ońalar degen, sol sábı Áıgerim Serikova qazirgi kúnde Shákárim atyndaǵy Semeı memlekettik ýnıversıtetiniń stýdenti atanyp, ony úzdik támamdady.
-Serik Túsipovtyń janqııarlyq erligin biz qashanda qurmetpen eske alamyz,-dedi qalalyq ishki ister basqarmasy qyzmetiniń baspasóz jetekshisi Elýbek Ospanov,-jubaıy Rysgúl Hasenovany 23 maýsymda Qazaqstan polısııasynyń kásibı meıramy qarsańynda, basqa da merekelerde Semeı qalalyq ishki ister basqarmasy únemi qatardan qaldyrmaı, qamqorlyq jasap otyrady. Rysgúl Hasenova sııaqty jubaıy qapylysta qaza tapqan polısııa qyzmetkerleriniń otbasy árdaıym bizdiń ujymnyń basty nazary men qamqorlyǵynda bolady.,
Raýshan Nuǵymanbekova, sýrettersavtorǵa tıesili
SEMEI