Oblys ortalyǵyna jumys saparymen kelgen «Nur Otan» partııasynyń hatshysy Tamara Dúısenova №37 orta mektepte muǵalimdermen kezdesip, zamanaýı bilim berý júıesin damytý jaıynda pikirlesti.
Sıfrlyq tehnologııalar mekteptiń kúndelikti tynys-tirshiligine engen. Oqýshylar mektepke arnaıy karta nemese saýsaq izi arqyly kirip-shyǵady. Ata-analarǵa arnaıy habarlama joldanady. Bul ata-analardyń balalaryn baqylap otyrýyna múmkindik. Sıfrlandyrý salasyndaǵy mekteptiń kelesi jetistigi onlaın-tamaqtaný júıesi. Bul júıe arqyly da ata-analar balalarynyń ne iship-jegenin qadaǵalaı alady. Oqýshylar tapsyrys beredi. Muǵalimder bólmesi de sońǵy úlgide jabdyqtalyp, ustazdar qaýymy sıfrly tehnologııanyń múmkindikterin paıdalanýda.
О́ńirde jańa partııalyq jobalar pılottyq bastama retinde júrgizilýde. «Nur Otan» partııasy men jergilikti memlekettik organdar, óńirlik kásipkerler palatasy jáne bıznes qaýymdastyq arasynda birqatar memorandýmǵa qol qoıyldy. Bul jobalardy júzege asyrý arqyly balalarǵa arnalǵan tegin IT synyptar ashýǵa, arnaıy IT mamandardy daıarlap, halyqtyń sıfrlyq saýattylyǵyn arttyrýǵa, óńirlik kitaphanalar júıesin transformasııalaýǵa jáne kitaphanalardy qazirgi zamanǵy bilim ortalyǵy retinde qaıta qurýǵa jol ashylýda.
Osyndaı jańashyl jobalarmen tanysqan Tamara Dúısenova oblys ákiminiń orynbasary Meıram Begentaevpen birge balalarǵa arnalǵan ortalyq qalalyq kitaphanada ashylǵan kovorkıng-ortalyǵy qazirgi zamanǵa saı IT tehnologııalarmen, 3D formatty teledıdarmen jáne jumsaq jıhazdarmen jabdyqtalǵan ortalyqty aralap kórdi. Kovorkıng-ortalyqtarda arnaıy balalar alańy, shyǵarmashylyq jumyspen shuǵyldaný alańy jáne doıby, shahmat, asyq oıyny syndy oılaý qabiletterin jetildiretin oıyndar oınaıtyn, ıaǵnı demalý alańy bar.
«Nur Otan» partııasy jergilikti fılıaly bastaǵan «Balalarǵa arnalǵan tegin IT-synyptar» jobasynyń birinshi kezeńi aıaqtalýǵa jaqyn. «YBYRAI» Jas programmıster Lıgasy» Qoǵamdyq qorynyń dırektory Ázıza Shójeevanyń aıtýynsha, qalalar men aýdandarda 15 IT-synypta oqytý bastaldy. Synyptarda elimizdiń joǵary oqý oryndaryn tehnıkalyq mamandyqtar boıynsha bitirgen túlekteri jumys jasaıdy. Bolashaq IT-mamany, jobaǵa qatysýshy Almas Nurahmetov. Ol aýtızmmen aýyratyn balalarǵa arnalǵan mobıldik qosymsha jasaýmen aınalysýda.
Jergilikti fılıal tóraǵasynyń orynbasary I. Terenchenkonyń aıtýynsha, «Nur Otan» partııasynyń jobasy qalada, aýyldarda turatyn balalardy IT-bilimge baýlý úshin júrgizilýde. Oqýshylar jastaıynan tehnologııa tilin meńgerip, saıttar, qarapaıym algorıtmder, kompıýterlik oıyndar qurý, eýropalyq standarttarǵa saı keletin anımasııalar jasaýdyń qyr-syryn meńgeredi. Biri hımııa pániniń kúrdeli esepterin sheshýge kómektesetin joba qurastyrsa, biri aýtızm aýrýyna shaldyqqan balalarǵa járdemdesetin jobasyn usyndy.
-Biz Pavlodarǵa kelgende IT-synyptardyń jumys barysymen tanystyq. Informatıka negizderin tereńdetip oqý arqyly oqýshylar endi IT-synyptarda bilimderin is júzinde kórsetýde. Bul qanatty joba retinde sizderdiń oblysta bastaldy. Kitaphanalarda ashylǵan kovorkıng-ortalyqtar qazirgi kúngi jańashyldyǵy, balalar jasalǵan úlken múmkindik. Oqýshylar saraıynyń astronomııa, jas jýrnalısterdi, dıktorlardy, kınemotografısterdi daıyndaıtyn ortalyǵy meni tańqaldyrdy. Bul basqa óńirlerge de qajet, úlgi eter, jalǵasyn tabar jarqyn jańalyq,-dedi Tamara Dúısenova.
Farıda BYQAI,
«Egemen Qazaqstan»
Pavlodar
Sýretti túsirgen: Konstantın Mýzalevskıı