Máýlen Áshim­baev IT-ortalyq jumysymen tanysty

Memlekettik baǵdarlamalardyń júzege asyrylýy jolynda qolǵa alynǵan sharalardyń kósh basynan tabylatyn «Nur Otan» partııasy aımaqtarda IT-synyp pen IT-orta­lyq ashyp, jastardy sıfrly ortaǵa beıim­deý men oqytý jumystaryn bastady.

Partııa tóraǵasynyń birinshi orynbasary Máýlen Áshimbaev Taldyqorǵan qalasynda ashylǵan osyndaı arnaýly oryndardyń jumysymen tanysty. Sapar barysynda ol oblys ákimi Amandyq Batalovpen birge birqatar áleýmettik nysandarda da bolyp, partııanyń oblystyq aktıvimen kezdesti. Buǵan deıin Taldyqorǵan qalasyndaǵy Agrotehnıkalyq jáne Polıtehnıkalyq kolledjderdiń bazasynda eki IT-ortalyq ashylyp, onda yntaly jastar tegin bilim alýdy bastap ketken edi. Al jaqynda taǵy bir ortalyq Oqýshylar saraıynda ashyldy. Bul ortalyqta jyl sońyna deıin 1000-ǵa jýyq mektep oqýshysy STEM oqytý júıesi boıynsha zamanaýı baǵ­dar­lamalaý tilderin úırenip, tegin bilim alady.

STEM oqytý baǵdarlamasyn «Bolashaq» baǵdarlamasynyń túlekteri, bir top óner­tapqyshtar oılap tapqan. Bul baǵdarlama boıynsha balalar komandalyq jumys boıynsha tájirıbelerin shyńdap, ǵylymı-tehnıkalyq bilimdi shynaıy ómirde qoldanýdyń qyr-syryn meńgeredi. Búginde bul baǵdarlamaǵa birqatar shet mem­leketter de qyzyǵýshylyq tanytyp otyr. Tipti jobanyń úlgilerin satyp alýǵa AQSh, Sıngapýr, Ulybrıtanııa, Aýstralııa, Qytaı, Ońtústik Koreıa jáne Izraıl elderinen usynys túsip jatyr. Jalpy Jetisý jerinde balalarǵa arnalǵan oqý ortalyǵynyń sany kóbeıip, aldaǵy úsh jylda 62 osyndaı synyp pen robot tehnıkasyna arnalǵan 19 kabınet ashylmaqshy.

– Qazirgi kezde tehnologııanyń qarqyndy damýyna baılanysty keıbir mamandyqtar óziniń mańyzdylyǵyn joǵaltyp, tipti birqatary múldem joıylýda. Al kerisinshe IT salasynyń bilgirlerine degen suranys ýaqyt ótken saıyn artyp keledi. Sondyqtan biz jastarymyzǵa bolashaǵy bar mamandyqtardy oqytýdy qolǵa aldyq. Mundaı jobalar arqyly partııa «Sıfrly Qazaqstan» baǵdarlamasyn júzege asyratyn bilikti mamandar daıarlap, onyń tıimdi oryndalýyna da óz úlesin qospaq, – dedi «Nur Otan» partııasy Tóraǵasynyń birinshi oryn­basary Máýlen Áshimbaev Oqýshylar sa­raıynda ashylǵan ortalyqtyń jumysymen tanysa kele.

Partııa Tóraǵasy birinshi orynbasarynyń aıtýynsha, aldaǵy úsh jylda elimizde tegin bilim beretin 1000 IT-synyp ashý josparda tur. «Sıfrly Qazaqstan» baǵdarlamasy aıasynda qolǵa alynǵan bul joba boıynsha jylyna 150 myń bala oqytylady. Al arnaýly bilim beretin oqý oryndarynda bilim alyp jatqan jastardyń IT-mamandyqty tereń ıgerýine jan-jaqty qoldaý jalǵasa beredi. Sondaı-aq elimizdegi jumyssyz jastardyń da jańa mamandyqqa beıimdelýi tegin júzege aspaqshy. Bul baǵyttaǵy jumystarǵa «Atameken» ult­tyq kásipkerler palatasy qoldaý kór­setedi. Bul jóninde partııa men palata arasynda ekijaqty kelisim bar eken.

Taldyqorǵandaǵy sapary barysynda Máýlen Áshimbaev óńirdiń kásipkerlerimen kezdesip, partııa tarapynan kásipkerlik salany qoldaý máselesin sóz etti. О́z kezeginde jergilikti kásipkerler partııanyń shaǵyn jáne orta bıznesti qoldaý maqsatynda qolǵa alǵan Biryńǵaı geoaqparattyq onlaın servıs portalyn qurý bastamasy týraly pikirlerin bildirip, bul joba kommer­sııalyq jer telimderine qatysty sybaılas jemqorlyqtyń aıtarlyqtaı azaıýyna jáne atalǵan jumystardyń ashyq ári ádil júrgizilýine úlken septigin tıgizetinine senim bildirdi.

– Kez kelgen memlekettiń turaqty damýynyń negizi shaǵyn jáne orta bıznes ekeni belgili. Memleketke túsetin salyq pen jumys oryndarynyń sany jaǵynan da bul salanyń mańyzy zor. Osy baǵytta Almaty oblysynda aýqymdy jumystar atqarylyp jatqanyn kórip otyrmyz. «Nur Otan» partııasy da Elbasynyń tikeleı tapsyrmasymen birqatar naqty jobalardy qolǵa aldy. Sonyń aıasynda kommersııalyq maqsattaǵy jer telimderi boıynsha kásipkerlerge qajetti barlyq aqparattar qoljetimdi bolatyn biryńǵaı portal qurylady, – dedi Máýlen Áshimbaev kásipkerlermen kezdesýde.

Sonymen qatar partııa Tóraǵasynyń birinshi orynbasary «Rýhanı jańǵyrý» baǵ­dar­lamasynyń oblystyq jobalyq keń­se­sinde bo­lyp, onyń jumysymen tanysty.

Qalmahanbet MUQAMETQALI,

«Egemen Qazaqstan»

Almaty oblysy