Qylmysty ashýmen, qylmyskerlerdi izdestirýmen aınalysatyn tártip saqshylary kúndelikti jumystarynda nebir qıyndyqpen betpe-bet kezigedi. Qandyqol qylmyskerlerdi der kezinde ustap, qylmystyń jedel ashylýyna muryndyq bolyp júrgen olardyń eńbegi orasan. Osy oraıda biz Qaraǵandy qalalyq IIB Ońtústik-shyǵys PB krımınaldyq polısııa bólimshesi bastyǵynyń orynbasary, polısııa maıory Murathan Maılaıaqov jaıynda áńgime órbitýdi jón kórdik.
«Qaı jumysty alyp qarasań da, árqaısysynyń óz qıyndyǵy bar. Ásirese qylmystyq izdestirý salasynda qyzmet etý kez kelgenniń qolynan kele bermeıdi», – deıdi keıipkerimiz Murathan Orazalyuly. Sebebi bul qyzmet asqan tabandylyq pen qaısarlyqty qajet etedi. Bastapqyda jedel qyzmette jumys istegisi kelip nıet tanytatyn jastar kóp bolady, birte-birte ómirdiń aǵymymen qyzmettiń aýyrlyǵyna tótep bere almaı, qatary seldireı beredi.
Murathan ishki ister organdaryndaǵy qyzmetin 2007 jyldan Qaraǵandy qalasy, Oktıabr polısııa bóliminiń ýchaskelik polısııa ınspektorynyń kómekshisi laýazymynan bastady. 2008-2013 jyldar aralyǵynda Ońtústik-shyǵys polısııa bóliminiń jedel ýákili, al 2013 jyldan beri qaraı Ońtústik-shyǵys polısııa bólimi krımınaldyq polısııa bólimshesi bastyǵynyń orynbasary bolyp qyzmet etýde. Murathan Orazalyulynyń ákesin biletin, kózkórgen aǵa áriptesteri oǵan «Orazalynyń uly» dep qurmetpen qaraıdy.
«Jaqsy áke balaǵa qyryq jyl azyq» demekshi, Murathannyń ákesi Orazaly Kókmanuly óziniń sanaly ǵumyryn ishki ister organdaryna arnady. Onyń osy adal qyzmeti men isin birge qyzmet istegen azamattar áli kúnge umytpaıdy.
Máselen, ol kisi Ońtústik-shyǵys polısııa bólimi bastyǵynyń kadr jumysy jónindegi orynbasary, polısııa podpolkovnıgi Erlan Temirhanulynyń ustazy bolǵan eken. «Kóp nárseni maǵan úıretip, kórsetken sol kisi. Ol kezde oń men solymyzdy jańa ǵana tanyp kele jatqan jas qyzmetkermiz. Árıne, kemshiliksiz adam bolmaıdy. Berilgen tapsyrmalardy oryndaýda qatelikterge boı aldyratynbyz. Sonda asa bir salmaqtylyq pen tózimdilik tanytyp, óziniń bilgenin aıtyp, jol siltep otyratyn», – dep eske alady Erlan.
Ońtústik-shyǵys polısııa bólimi bastyǵynyń orynbasary bolǵan Orazaly Kókmanuly keıin ákimshilik polısııa bóliminiń bastyǵy, al zeınetkerlikke shyǵar aldynda oblystyń ishki ister departamentinde bólim bastyǵy boldy. Qarap otyrǵanymyzdaı, Ońtústik-shyǵys polısııa bólimi Maılaıaqovtar áýleti úshin sondaı ystyq, sondaı jaqyn.
Polısııa maıory Murathan Orazalyulynyń kúndelikti qyzmeti qupııa is júrgizý, qylmyskerlerdi izdeý, máıitterdi anyqtaý, qyzmetti uıymdastyrý jáne baqylaý syndy mindetterden turady. Qaramaǵyndaǵy qyzmetkerlerdiń jumysyn qadaǵalap, ony durys uıymdastyrý basty mindeti bolsa, odan bólek tájirıbesin jas qyzmetkerlermen bólisip, tálimgerlik qyrynan da tanylyp júr.
Murathan Orazalyuly tek úlgili qyzmetker ǵana emes, sonymen qosa aıaýly jar, ardaqty áke, bir shańyraqtyń otaǵasy. Jubaıy Aıda ekeýi Dılıara men Danıal esimdi eki balany tárbıelep, baqytty ǵumyr keshýde.
Indıra ERDANQYZY
Qaraǵandy