Elbasy Nursultan Nazarbaevtyń el astanasyn Almatydan Arqa tórine kóshirý ıdeıasy táı-táı basqan táýelsiz elimiz úshin kóptegen ıgilikterge jol ashty. Saryarqa saýyrynda kún sanap tolaǵaıdaı tolysyp kele jatqan Astananyń aıshyqty sáýleti, jahan aldyndaǵy bıik mártebesi jasampazdyqtyń jarshysyndaı kórinedi. Astanamyz alǵash Almatydan Aqmolaǵa kóshken sátte sol uly kóshtiń kerýeninde bolǵan azamattyń biri retinde ýaqyt bederinde qattalyp, sanamyzda saqtalyp qalǵan keıbir sátterdi qaǵaz betine túsirýdi jón kórdik.
Áli kúnge deıin esimde. 1995 jyldyń qyrkúıek aıynyń 15 juldyzynda el Prezıdentiniń «Qazaqstan Respýblıkasynyń astanasy týraly» Jarlyǵymen mınıstrler kabınetine jyl sońyna deıin astananyń qonys aýdarýynyń ýaqyty men soǵan baılanysty shyǵys kólemin anyqtaý tapsyryldy. Sonymen qatar joǵary jáne ortalyq bılik júıeleriniń kóship-qonýyn uıymdastyrý máselesin qamtamasyz etý úshin Memlekettik komıssııa qurylyp, oǵan ortalyq jáne jergilikti bılik uıymdarynyń jumystaryn úılestirý quqyǵy júkteldi. Úkimetke «Jańa astana» bıýdjetten tys qoryn quryp, elordany laıyqty abattandyrý isine qarjy jınaqtaý isi de tapsyryldy.
1996 jyldyń qazan aıynda sol kezdegi Aqmola qalasynda Prezıdent keńeıtilgen keńes ótkizip, onda áýejaı, temir jol vokzalyn retke keltirý, jol jóndeý, salý, kógaldandyrý, jaryqtandyrý jaıy talqylanyp, bas qalanyń ınfraqurylymyn jaqsartý isi jan-jaqty sarapqa salyndy. Aeroport, vokzaldar jáne joldar Kólik jáne kommýnıkasııa mınıstrliginiń quzyrynda bolǵandyqtan, birinshi bolyp kósh bastaý osy mınıstrlikke júkteldi. Sol ýaqyttarda bul salany Iý.I.Lavrınenko basqardy. Men mınıstrdiń birinshi orynbasary bolǵandyqtan, kóshýge baılanysty jumystardy uıymdastyrý isimen aınalystym.
Arqanyń alǵashqy qysy bárimizge úlken synaq boldy. Qyzylshunaq aıaz, alaı-túleı boran, ýaqytsha jataqhanadaǵy lekerlengen páterler, jupyny dúken sóreleri, tamaqtanatyn oryndardyń tapshylyǵy biraz adamnyń saǵyn syndyrardaı áser etip, keıbireýler tipti Almatyǵa qaıta oralyp jatty. Alaıda kópshilik azamattar bul mańyzdy is el bolashaǵyna asa kerek ekenin túsinip, qandaı qıyndyqqa bolsyn qarsy tura bildi. 1997 jyldyń shilde aıynda mınıstrlik tolyqtaı kóship, kadrlarmen qamtamasyz etilgennen keıin tamyz aıynan bastap óziniń jumysyna tolyqqandy kirisip ketti. Sol jyldyń ózinde atalǵan qurylym zor jumys atqardy dep aıtýǵa bolady. Qysqa merzimde aerovokzal ǵımaratynyń kúrdeli jóndeýden ótýi, ushyp-qoný jolaǵy zamanaýı jaryq belgi júıesimen qamtylyp, onyń 3000 metri iske qosylýy, jańa ushý jolaqtary aralyq burylys joldarynyń soǵylýy, VIP zal ǵımaraty kóleminiń ulǵaıtylýy syndy eleýli jumystar atqaryldy. Eń bastysy qalaaralyq joldyń keńeıtilý jumystary aıaqtalyp, alǵashqy aınalmaly jol salyndy.
Tyń temirjol basqarmasynyń kúshimen qalalyq temirjol vokzalynyń ǵımaraty jóndelip, vokzal aýmaǵy keńeıtildi, kóptegen ákimshilik ǵımarattar jóndeýden ótip, jańa ár aldy, qyzmet aýmaqtary ózgertildi. Temirjolshylar mádenıet saraıy da jańǵyrtylyp, «Kúlásh Baıseıitova atyndaǵy opera jáne balet teatry» (keıin Jastar teatry ataldy) qala turǵyndary men qonaqtaryna rýhanı azyq beretin irgeli mádenıet oshaǵyna aınaldy. Osy jumystardyń júıeli jolǵa qoıylýyna kósh-kerýenniń basy bolǵan Kólik jáne kommýnıkasııa mınıstrligi úlken úles qosty dep aıta alamyz. Ásirese Almatydan kóshirilgen qyrýar júk pen halyqty tasymaldaýda avtokólikshiler men temirjolshylardyń orasan eńbegin aıryqsha ataı ketken jón. Alǵashqy jyldary baılanys máselesi de aıtarlyqtaı qıyndyq týǵyzdy. Bar ATS-terdiń qural-jabdyqtary eski bolǵandyqtan, barlyq aýdandarmen turaqty baılanysty tolyqtaı qamtamasyz ete almady, telefon nómirleriniń tapshylyǵy sezilip turdy. Jańa qurylǵan «Qazaqtelekom» mekemesiniń kúshimen keıinnen bul másele oń sheshimin tapqanyn da kózimiz kórdi.
Talaı qıyndyq artta qaldy. Qazaq eli tarıh sahnasynda bıik beleske qaıta shyqty. Halyq óz Prezıdentin qoldap, ǵasyrlar boıy ańsaǵan tá- ýelsizdiginiń aıǵaǵyndaı bolǵan araıly Astanasyn maqtan etedi. Biz Kólik jáne kommýnıkasııa salasynyń ardagerleri eren eńbektiń nátıjeli bolǵanyna shyn júrekten qýanyshtymyz jáne Elbasynyń Astanamyzdyń 20 jyldyǵyn atap ótý jónindegi jarlyǵyn qýanyshpen qabyldadyq. Shyn máninde táýelsiz elimizdiń Tuńǵysh Prezıdentiniń tarıhı sheshimi ómir aǵymyn kúrt ózgertip, jańa qýat ákeldi, Elbasynyń óz bastaýymen, qadaǵalaýymen soǵylǵan jańa qala kóne dalanyń kórkine, álemdegi ásem shaharlardyń birine aınaldy. Aıbyndy Astana – beıbitshilik pen berekeniń qutty besigi, táýelsizdiktiń jemisi.
Serik ÁLIǴOJA, Qazaqstan Respýblıkasy Avtokólikshiler odaǵynyń basqarma tóraǵasy