Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda Kásipkerlik qyzmetti retteýdi jetildirý týraly zańdy iske asyrý jónindegi sharalar qaraldy, dep habarlaıdy primeminister.kz.
Bıyl 24 mamyrda Memleket basshysy bıznes-ortany túbegeıli jaqsartý jáne keńeıtýge, sondaı-aq ákimshilik kedergiler men bıznes shyǵyndaryn qysqartýǵa baǵyttalǵan Kásipkerlik qyzmetti retteýdi jetildirý máseleleri týraly zańǵa jarııa túrde qol qoıdy.
Ulttyq ekonomıka birinshi vıse-mınıstri R. Dálenov jalpy Zańdy iske asyrý úshin 146 zańǵa táýeldi aktini qabyldaý qajettigin aıtty. Onyń ishinde «Doing Business» reıtıngisindegi Qazaqstannyń pozısııalaryn jaqsartý maqsatynda 24 NQA qabyldaý úlken mańyzǵa ıe.
Birinshi vıse-mınıstrdiń aıtýynsha, zańǵa táýeldi barlyq aktiler ázirlenip, olardyń kóbisi qazirgi kezde memlekettik organdarda kelisý rásimderinen ótý satysynda tur.
Zańdy keńinen túsindirý maqsatynda 8 maýsymnan bastap Pavlodar, Kókshetaý, Almaty, Aqtóbe qalalarynda jaqyn jerdegi óńirlerdi tarta otyryp, kásipkerler arasynda aqparattyq-túsindirý is-sharalary júrgizildi. Atalmysh jumysqa jergilikti atqarýshy organdardyń, QR UKP-nyń jáne onyń óńirlik palatalarynyń ókilderi, bıznes-qaýymdastyqtar, sondaı-aq bıznes ókilderi qatysty.
«Osy jyldyń shilde aıynda retteýshilik yqpaldy taldaý ınstıtýtyn óńirlik deńgeıge deıin keńeıtýge baılanysty, jergilikti atqarýshy organdar úshin birqatar kóshpeli semınarlar ótkizý josparlanyp otyr. Bul semınarlarda jergilikti organdar engiziletin retteýdiń shyǵyny men paıdasyn taldaý jáne baǵalaý tártibin oqytýdan ótedi», — dep túıindedi R. Dálenov.
Investısııalar jáne damý mınıstri J. Qasymbek, óz kezeginde, IDM qyzmetiniń jańa baǵytyn — aeronavıgasııa jáne áýejaı boıynsha tabıǵı monopolııalar salasyn quqyqtyq retteý maqsatynda — tutynýshylarǵa qyzmet kórsetý standarttary; ınvestısııalyq baǵdarlamalardyń jobalaryn qalyptastyrý jáne baǵalaý ádistemesi; kórsetiletin qyzmetterge arnalǵan tarıfter boıynsha ýaqytsha tómendetý koeffısentiniń deńgeıin esepteý ádistemesi; kórsetiletin qyzmetterdiń, taýarlardyń, jumystardyń tarıfterin nemese olardyń shekti deńgeılerin kemitpeı esepteý ádistmesi; azamattyq avıasııa salasyndaǵy tarıftik saıasat jónindegi saraptamalyq keńes bóliginde normatıvtik-quqyqtyq aktiler ázirlengenin málimdedi.
Qurylys salasynda qurylys jobalaryna «bir tereze» qaǵıdaty boıynsha portaldy jáne aqparattyq júıelerdi engizý tártibin aıqyndaıtyn erejelerdi qabyldaý vedomstvodan tys keshendi saraptama júrgizý men uıymdastyrýdy jetildirýdi kózdeıdi.
«UEM birlesken 10 buıryq táýekeldilik dárejesin baǵalaý krıterıılerin jáne qurylys, ónerkásiptik qaýipsizdik, tehnıkalyq retteý, geologııa men kólik salalarynda tekserý talaptaryn azaıtý úshin túzetýge jiberildi. Olardy qabyldaý qarasha aıyna belgilenip otyr», — dep naqtylady J. Qasymbek.
Energetıka mınıstri Q. Bozymbaevtyń aıtýynsha, munaı-gaz, elektr energetıkasy men atom ónerkásibi jáne qorshaǵan ortany qorǵaý salasy týraly zańnyń qosymsha aktilerin táýekelderdi baǵalaý ólshem shartyna úılestirý úshin jeti bıyl qarashada NQA qabyldanady. Budan ózge, 2018 jyldyń maýsymynan bastap, munaı-gaz salasynyń lısenzııalanǵan qyzmet túrleri tiziminen munaı-hımııa óndiristerin jobalaý alynyp tastalady. NQA tıisti jobasy ázirlenip, múddeli memlekettik organdar men uıymdarǵa kelisýge jiberilgen.
«Qorshaǵan ortany qorǵaý salasynda eki memlektetik qyzmetti biriktirý arqyly qorshaǵan ortaǵa emıssııa berý ruqsatymen memlekettik ekologııalyq saraptamanyń qorytyndysyn berý endi «bir tereze» sheńberinde júzege asyrylady. Memlekettik qyzmet kórsetý merzimi 150 jumys kúninen 45 jumys kúnine deıin qysqarady. ON jumys kúni ishinde memlekettik ekologııalyq saraptama júrgizý kezindegi eskertýlerdi joıýy úshin «E-lısenzııalaý» jáne «Keshendi emes vedomstvolyq saraptamalyq biryńǵaı aqparattyq júıesi» memlekettik derekter bazasynyń portaly arqyly tabıǵat paıdalanýshylarymen ashyq dıalog júrgiziledi», — dedi energetıka mınıstri.
Sonymen qatar Zańda Ekologııalyq kodekske túzetýler engizilgen, oǵan sáıkes ókiletti organ apellıasııalyq komıssııa quryp, reglamenti, erejesi men quramyn bekitedi. Apellıasııalyq komıssııa qabyldaǵan sheshim usynymdyq sıpatta bolady.
Ádilet mınıstri M. Beketaevtyń aıtýynsha, bul zań jyljymaıtyn múlikti tirkeý fýnksııalaryn «Azamattarǵa arnalǵan úkimet» Memlekettik korporasııasyna beredi. Atalǵan fýnksııany berýmen qatar, Memlekettiń korporasııanyń senimdi basqarýyna «Jyljymaıtyn múlik regıstri» GBD beriledi. Baqylaý jáne quqyqtyq qamtamasyz etý fýnksııalary ádilet organdarynyń qaraýynda qalady.
Budan ózge, atqarýshylyq óndiris prosedýralaryn ońtaılandyratyn túzetýler engizilgen. Intellektýaldy menshik máselesinde kásipkerlik sýbektilerin baqylaýynan alynyp tastaldy: avtorlyq quqyq, ónerkásiptik menshik, seleksııalyq jetistikter nysandaryn, ıntegraldy mıkroshemalar topologııasyn paıdalaný.
Taýarlyq belgini, qyzmet kórsetý belgisin, taýardyń shyǵý ornynyń ataýyn nemese fırmalyq ataýyn paıdalanýdy jáne ujymdyq negizde múliktik quqyqtardy basqaratyn uıymdardyń qyzmetin baqylaý Ádilet mınıstrliginiń qaraýynda qaldy.
«Ádilet mınıstrligi zańǵa táýeldi NQA tıisti túzetiler ázirledi. Olar tıisti memlekettik organdar men uıymdarǵa kelisýge jiberildi», — dedi M. Beketaev.
Júrgizilip jatqan jumystar týraly aýyl sharýashylyǵy birinshi vıse-mınıstri A. Evnıev baıandady. Kásipkerlik qyzmetti retteýdi jetildirý týraly Zań aıasynda AО́K salalaryn qamtıtyn 3 kodeks pen 10 zańǵa ózgertýler engizildi. Engizilgen ózgeristerge baılanysty AО́K salasyndaǵy 16 zańǵa táýeldi aktini bekitý qajet. Qazirgi kezde atalǵan zańǵa táýeldi aktilerdi Mınıstrlik ázirlep jatyr, ony a.j. qarasha aıynda bekitý kózdelip otyr.
Otyrys barysynda sonymen qatar «Atameken» UKP basqarma tóraǵasy A. Myrzahmetov sóz sóıledi.
Máselelerdi qarastyrý qorytyndysy boıynsha QR Premer-Mınıstri Baqytjan Saǵyntaev óńirlerde qabyldanǵan Zańǵa zor qoldaý bildirip otyrǵanyn aıtty. Kásipkerler qajetti normatıvtik-quqyqtyq aktilerdi jyldam qabyldanýyn asyǵa kútip otyr.
Osyǵan baılanysty mınıstrlikterge qajetti NQA qabyldaýdy jedeldetý já»ne olardyń joǵary sapaly bolýyn qamtamasyz etý tapsyryldy. Bul oraıda, B. Saǵyntaevtyń óńirlerge sapary barysynda bildirilgen «Atameken» UKP jáne kásipkerlerdiń barlyq eskertpelerin eskerý qajet.
Baqylaý Premer-Mınıstrdiń orynbasary E. Dosaevqa júkteldi.