Búgin L.N.Gýmılev atyndaǵy Eýrazııa ulttyq ýnıversıtetinde Baılanys jáne aqparat qyzmetkerleri kúnine oraı saltanatty shara ótti.
Dástúrli jıynda ýnıversıtet rektory Erlan Sydyqov tanymal medıamenedjerler men jetekshi jýrnalısterdi marapattady. Qazaqstandaǵy jetekshi joǵary oqý oryndarynyń biri sanalatyn ýnıversıtettiń eń joǵary «Kúltegin» tósbelgisimen «Egemen Qazaqstan» RG» AQ basqarma tóraǵasy Darhan Qydyráli marapattaldy. Sondaı-aq EUÝ-diń bas marapatymen «Qazaqstan» RTRK AQ basqarma tóraǵasy Erlan Qarın, «Habar agenttigi» AQ basqarma tóraǵasynyń orynbasary Rınat Dýmanuly, qazaq jýrnalıstıkasynyń has sheberi Qaınar Oljaı, kórnekti telejýrnalıst Álimjan Sabyrjanuly da marapattaldy. Sonymen qatar ýnıversıtettiń «Gýmılev» tósbelgisimen «Kazahstanskaıa pravda» gazeti AQ basqarma tóraǵasy Vıacheslav Pashenko, «Kazkontent» AQ basqarma tóraǵasy Evgenıı Kochetov jáne jýrnalıstıka máselelerin zertteý ınstıtýtynyń dırektory, professor Namazaly Omashuly marapattaldy.
Saltanatty keshte bilim ordasynyń jaǵymdy jańalyqtary men jemisti jetistikterin jarqyratyp kórsetip júrgen «Habar 24», «Qazaq radıosy», «Qazaqparat», «Baq.kz», «Astana aqshamy» sekildi aqparat quraldarynyń bir top ókilderine rektordyń «Alǵys haty» tapsyryldy. Mundaı marapattan EUÝ Jýrnalıstıka jáne saıasattaný fakýltetiniń professor-oqytýshylary da shet qalmady.
Merekelik shara aıasynda L.N.Gýmılev atyndaǵy Eýrazııa ulttyq ýnıversıteti men «Kazkontent» AQ arasyndaǵy qarym-qatynasty nyǵaıtý maqsatynda memorandýmǵa qol qoıyldy. Baspasóz merekesi qarsańynda jyl saıyn bılıardtan ótetin Aqseleý Seıdimbek atyndaǵy týrnır qorytyndylanyp, tastaıaq jarysynyń bas jeńimpazdary Seken Turysbek pen Álimjan Sabyrjanulyna kýbok jáne dıplom tabys etildi.