«Súıer ulyń bolsa, sen súı, súıinerge jarar ol» dep hákim Abaı aıtqandaı, mine, ulttyq biryńǵaı testileý naýqanynyń bel ortasyna kelgende eń joǵary ball jınaǵan oqýshynyń esimi de belgili boldy. Bıyl maksımaldy 140 baldy alǵash ret Almaty qalasyndaǵy 123 mektep-gımnazııasynyń túlegi Shıara Qudaıbergenova jınap otyr.
Biz almatylyq oqýshy Shıara Ábdirahymqyzymen telefon arqyly sóılesip, elimizdegi eń joǵary kórsetkishke qol jetkizýimen oqyrmandar atynan quttyqtaǵan edik. Shıara testileý synaǵyn Qazaq Ulttyq agrarlyq ýnıversıtetiniń bazasynda 25 maýsymda tapsyrǵanyn aıtty.
Úzdik bilim nátıjesin kórsetken túlek 2000 jyly Taraz qalasynda dúnıege kelgenin, alaıda ata-anasynyń Almatyǵa kóship kelýine baılanysty mektep tabaldyryǵyn alyp megapolıste attaǵanyn, bıyl bitirgen №123 mektep-gımnazııasynda 5-synyptan bastap oqyǵanyn jetkizdi.
– Otbasymyzda ákem – kásipker, anam – úı sharýashylyǵynda. Inimniń de sabaq úlgerimi jaqsy. Men 10 synypta bir-eki tórttik baǵa alyp qalyp, «Altyn belgi» ıegeri bola almadym. Al inim «Altyn belgi» alady dep oılaımyn. Testileý synaǵyna jan-jaqty, keshendi túrde ázirlendim. Qosymsha kýrstarǵa da bardym. Sonyń nátıjesinde joǵary balǵa qol jetkizdim dep oılaımyn. Býrabaıda ótken festıvalda bı ónerinen júldeger boldym, byltyr «Inabat» atty sulýlyq saıysynda jeńimpaz atandym. Bul saıysqa Áýezov aýdanynyń úzdik mektepteriniń arýlary qatysqan bolatyn. Jalpy ádebı kitaptardy oqyǵandy unatamyn. Poezııadan Muqaǵalıdyń jyrlaryn jaqsy kóremin, – deıdi Shıara.
Ol keleshek mamandyǵyn tańdap ta qoıǵan eken. Talapker Astanadaǵy L.N.Gýmılev atyndaǵy Eýrazııa ulttyq ýnıversıteti men Almatydaǵy Súleımen Demırel ýnıversıtetiniń birinde «Logıstıka» mamandyǵyna oqýdy josparlap otyrǵanyn aıtty.
«Memleket basshysyna elimizdiń jastary men bilimine aıryqsha qoldaý kórsetip otyrǵany úshin rahmet aıtamyn. Sondaı-aq ózimniń jáne ata-anamnyń atynan 11 jyl boıy bilim nárimen sýsyndatqan muǵalimderge, sonyń ishinde mektep dırektory Baǵıla Áshimbaevaǵa, synyp jetekshisi Saltanat Jangeldınaǵa jáne matematıka pániniń muǵalimi Gúlbarshyn Mamytovaǵa, «Araı-test» ortalyǵynyń ustazdaryna rızashylyǵymdy bildiremin», deıdi jas túlek.
Shıara Qudaıbergenova ózin shahar basshysy Baýyrjan Baıbektiń qabyldaǵanyn, Elbasynyń bastamasymen qazaq tiline aýdarylyp, jaryq kórgen Davostaǵy Dúnıejúzilik ekonomıkalyq forýmnyń negizin salýshy, belgili ekonomıst Klaýs Shvabtyń «Tórtinshi ónerkásiptik revolıýsııa» atty kitabyn syıǵa tartqanyn da jetkizdi.
Biz elimizdegi eń joǵary baldy jınaǵan jas túlekke sáttilik tiledik.
Aıta ketý kerek, bıyl almatylyq oqýshylar ortasha ball kórsetkishi boıynsha (101,2) elimizde alǵashqy orynda tur. Al joǵary balǵa jeteǵabyl 139 baldy №162 mektep-gımnazııadan Dáýlet Hamzın men №104 jalpy bilim beretin mektepten Áıgerim Ibaǵalıeva esimdi túlekter jınady. Almatylyq 314 mektep bitirýshiniń 130 ben 140 ball arasynda jınaýy da jaqsy kórsetkish ekeni anyq.
Dýman ANASh,
«Egemen Qazaqstan»