Kezinde Qazaq eliniń astanasy bolǵan Qyzylorda qalasy da bıyl elordanyń 20 jyldyǵymen oraılas 200 jyldyq mereıtoıyn atap ótkeli jatyr. Arqa tósinde bastalǵan dúbirli toı Syr elindegi merekelik sharalarǵa ulasady.
Búgingi Astana – álemdegi ozyq otyz eldiń qataryna kirýdi maqsat etken Qazaq memleketiniń, Máńgilik Elge aınalýdy kóksegen ulttyń túp qazyǵy Astana toıy – barsha qazaqstandyqtardyń toıy. Osy oraıda elimizdiń barlyq óńirimen birge Qyzylorda da bas qala sáýletiniń artýyna úles qosýda.
Jyl basynda halyq aldynda esep berý kezdesýinde oblys basshylyǵy Astanaǵa tartý retinde ashyq aspan astynda ǵarysh mýzeıin salý týraly sheshim qabyldanǵanyn aıtqan edi.
«Baıqońyr ǵarysh aılaǵy – qazaq halqynyń ǵana emes, búkil adamzattyń maqtanyshyna aınalǵan tarıhı keshen. Sondyqtan Astananyń mereıtoıyna oraı elordada «Soıýz», «Proton», «Zenıt» zymyran tasyǵyshtary men «Boran» orbıtaaralyq kemesiniń maketterinen quralǵan zymyran-ǵarysh tehnıkasy mýzeıin salýdy uıǵardyq», degen-di aımaq basshysy.
Mýzeı ashyq aspan astynda ornalasady. Joǵaryda aıtylǵandaı, osy jyly Qyzylorda qalasynyń 200 jyldyǵy da joǵary deńgeıde atap ótiledi. Bul eki mereıtoıdyń qyzylordalyqtar úshin tarıhı mańyzy erekshe. Sebebi Astana táýelsiz elimizdiń elordasy bolsa, Qyzylorda – 1925-1929 jyldary elimizdiń tuńǵysh astanasy mártebesin ıelenip, ultymyzǵa resmı túrde qazaq degen ataýdy alyp bergen tarıhı sheshimder ordasy. Jyl boıy kóptegen halyqaralyq, respýblıkalyq jáne oblystyq is-sharalar uıymdastyrylyp, aýqymdy nysandar ashylady. Onyń biri – Qazaq ortalyq atqarý komıtetiniń baıyrǵy ǵımaratynyń úlgisinde salynǵan «Rýhanı jańǵyrý» ortalyǵy.
Syr óńiri Astanaǵa tartý etetin ekspozısııa elordadaǵy Turan dańǵyly boıyndaǵy «QazǴaryshSapary» AQ ulttyq ǵarysh ortalyǵy aýmaǵynda salyndy. Búginde qurylys-montaj jumystary qarqyndy túrde júrgizilip jatyr. Bul jumystarmen qatar ǵaryshtyq kemeler maketi salyndy. Ǵarysh mýzeıi elordanyń mereıtoıy qarsańynda el ıgiligine beriledi.
Baqtııar TAIJAN,
«Egemen Qazaqstan»
Qyzylorda oblysy