Bıyl óńirde atalyp ótken memlekettik qyzmetshilerdiń kásibı merekesi júrek tebirenter, kóńil tolqytar sátimen este qaldy. Este qalǵany sol, merekege oraı uıymdastyrylǵan saltanatty shara barysynda Shyǵys Qazaqstan oblysy boıynsha qazynashylyq departamentiniń ujymy О́skemendegi «Úmit» balalar úıiniń túlegi, 17 jastaǵy Dıana Bıǵalıevaǵa páter kiltin tabystady.
2011 jyly oblysta sol kezdegi ákim Berdibek Saparbaevtyń bastamasymen «Meıirim» atty aksııa bastalyp, aksııa aıasynda aımaqtaǵy uıymdar men kásiporyndar birneshe jetim balany óz qamqorlyqtaryna alyp, olar baspanaǵa qol jetkizý úshin «Turǵyn úı qurylys jınaq bankinen» arnaıy esepshottar ashylǵan edi. Sol ýaqytta saýaby mol sharaǵa Shyǵys Qazaqstan oblysy boıynsha qazynashylyq departamentiniń ujymy da atsalysýǵa bel baılaıdy. «О́ńirde ata-anasynyń qamqorlyǵynsyz jáne jetim balalarǵa demeý kórsetetin «Meıirim» aksııasy qarqyndy júrip jatqan kezi. Osy bir izgilikti iske biz de óz úlesimizdi qosaıyq, bir balanyń baqytty bolýyna qol ushyn bereıik dep júrgen edik. Birde kabınetime áriptesimiz, Glýbokoe aýdandyq qazynashylyq basqarmasynyń basshysy Darhan Qalıev keldi. Onyń otbasynda óte qaıǵyly oqıǵa bolǵan edi. Sodan bir jyl buryn ǵana áriptesimiz sábıinen aıyrylyp qalǵan-dy. Quldyrańdap shaýyp júrgen búldirshinniń aıaq astynan aıyqpas dertke shaldyqqanyn estigende, onyń emine ujym bolyp qarjy jınap bergen edik. Darhan baýyr eti balasyn sonaý Mınskiniń dárigerlerine deıin qaratyp, sol jaqqa ota jasaýǵa aparǵan-dy. О́kinishke qaraı, operasııa jasalǵanymen, sábıdiń ómirin saqtap qala almady. Kishkentaı Darynnyń shetinep ketkenin estip, ata-anasymen birge qamyqtyq. Darhan Qalıev osy kelisinde sábıine dep jınalyp, ustalmaǵan qarajatty ózimen birge alyp kelipti. «Áıelimiz ekeýimiz aqyldasa kelip, kishkentaı Darynymyzǵa dep jınalǵan qarjyny basqa da muqtaj balalardyń qajetine jumsasaq dep sheshtik. Ne aqyl qosasyz?» dedi. «Bul senderdiń otbasylaryńa dep jınaǵan kómegimiz, bir kerekterińe jaratyńdar» dep qansha aıtqanymmen, Darhan ılikpedi. Sodan ne kerek, aqyry ujymdy jınap, aqyldasa kele, bir jetim qyz balany qamqorlyqqa alaıyq dep uıǵardyq. Qalǵan qarajatty sol balanyń esepshotyna salyp, bolashaqta baspana alyp beremiz dep sheshtik», - dep eske alady departament basshysy Muhtar Tólegenuly.
Sodan birde «Úlbi» mádenıet úıinde ótken bir konsertte «Úmit» balalar úıiniń dırektory Maıra Baımuhanova bı ansambliniń quramynda óner kórsetken Dıanamen tanystyrady. Qoǵamdyq jumystarǵa belsendi, sabaq úlgerimi jaqsy, ónerli jetkinshekti ujym músheleri birden jaqsy kórip ketedi. Osylaısha, ıgilikti iske jınalǵan qarajat Dıananyń «Turǵynúı jınaq bankindegi» esepshotyna salynady. Sodan departament qyzmetkerleri, barlyǵy 103 adam, jyl saıyn bir kúndik jalaqylaryn osy esepshotqa aýdaryp otyrady. «Bul qarajat 7 jyl boıy jınaldy. Banktegi jınaǵan qarajatymyz bir bólmeli páterge jáne onyń ishin qajetti jıhazdarmen jabdyqtaýǵa tolyq jetti. Qyzmetkerlerimiz Dıanamen birge baryp, qujattaryn rásimdeýge kómektesti, kesheli beri úıiniń ishin jınastyryp júr. Aldaǵy ýaqytta qarjygerlik bilim alyp, bizdiń ujymǵa qosylsa degen de tilegimiz bar», - deıdi jetim qyzdy óz qamqorlyqtaryna alǵan ujym basshysy.
Al baspanaly bolǵan Dıana Bıǵalıeva qazir О́skemendegi qyzmet kórsetý salasy kolledjinde shashtaraz mamandyǵyn úırenip júr eken. «Úmit» balalar úıinde jeti jasynan tárbıelengen boıjetken osy ýaqytqa deıin Dınara esimdi ápkesimen jáne Danııar degen aǵasymen páter jaldap turypty. «Analyq, ákelik qamqorlyǵyn kórsetken departament ujymyna erekshe alǵysymdy bildiremin. Aǵamyz ekeýimiz keleshekte joǵary bilim alǵymyz keledi. Al ápkem óziniń shaǵyn kafesin ashýdy armandaıdy», - deıdi Dıana.
Azamat QASYM,
«Egemen Qazaqstan»
О́SKEMEN
Sýretterdi túsirgen Tileýbek ShAIаHMET