Qazaqstannyń qol jetkizgen básekege qabilettilik deńgeıin qoldaý jáne onyń odan ári keńeıýi úshin agroónerkásiptik keshendi memlekettik retteýdiń tásilderi qaıta qaralyp, ishki naryqtyń qorǵalýyna, syrtqy saýda naryǵyn keńeıtýge, saýda-logıstıkalyq ınfraqurylymdy damytýǵa jáne agroónerkásiptik keshen sýbektilerin qarjylandyrýdyń qoljetimdiligin arttyrýǵa basa nazar aýdaryldy.
Bul týraly búgin Qazaqstan Respýblıkasy Aýyl sharýashylyǵy birinshi vıse-mınıstri A.Evnıev turǵyndarmen eseptik kezdesýdiń qorytyndysy týraly brıfıngte málimdedi.
Shyǵarylǵan jalpy aýyl sharýashylyǵy ónimderi 3,9%-ǵa, óndirilgen tamaq ónimderi 6,3%- ǵa artty. Aýyl sharýashylyǵy ónimderiniń eksporty 3 aıda 47%-ǵa, onyń ishinde óńdelgen ónimder eksporty 26%-ǵa ulǵaıdy. Aýyl sharýashylyǵyna salynǵan ınvestısııalar kólemi 1,4%-ǵa ósip, 88 mlrd. teńgeni qurady. 2018 jyly egistik jerler kólemin 50,2%-ǵa (11,4 mln. ga) qysqartý josparlanyp otyr.
Mal sharýashylyǵynda ótken kezeńde mal men qus sany orta eseppen 4,1%-ǵa ulǵaıdy. Sondaı-aq, óndirilgen et kólemi 4,8%-ǵa (345,1 myń tonnadan 361,6 myń tonnaǵa deıin), sút 2,5%-ǵa (1942,9 myń tonnaǵa 1992,5 myń tonnaǵa), jumyrtqa 15,7%-ǵa (1896,1 mln. danadan 2194,4 mln. danaǵa deıin) artty.
Qazirgi ýaqytta azyq-túliktiń negizgi 30 túriniń 25-i boıynsha qamtamasyz etilýi 80%, al keıbir túrleri boıynsha 100% qurap otyr. Ishki naryq osy ónim túrlerimen qamtamasyz etilýde. Importqa táýeldi qus eti, alma, irimshik jáne súzbe, shujyq, qant, balyq bul tizimge kirmeıdi.
Elbasy halyqqa Joldaýynda agroónerkásiptik keshen aldynda eńbek ónimdiligin túbegeıli ulǵaıtý jáne qaıta óńdelgen aýyl sharýashylyǵy ónimi eksportynyń ósimin 5 jyl ishinde keminde 2,5 esege arttyrý mindetin qoıdy. Bul mindetti sheshý salany damytýda múlde jańa kózqarasty talap etedi.
Osy tapsyrmany oryndaý maqsatynda Qazaqstannyń eksporttyq áleýeti joǵary pozısııalary anyqtaldy. Bul, eń aldymen, et ónimderi, sıyr jáne qoı eti.
Sonymen qatar, sút ónimderi, qus eti, jemister men kókónister boıynsha ımporttan arylýymyz kerek.
Osy máselelerdi sheshý salany damytýda jańa ádisterdi talap etedi. Joǵaryda atalǵan mindetterdi eskere otyryp, Qazaqstan Respýblıkasy Aýyl sharýashylyǵy mınıstrligi agrobıznes jáne úkimettik emes uıymdardyń ókilderin tarta otyryp, 2017-2021 jyldarǵa arnalǵan Qazaqstan Respýblıkasy agroónerkásiptik keshenin damytýdyń memlekettik baǵdarlamasyna túzetýler engizý boıynsha jumys júrgizdi.
Baǵdarlamanyń túıindi kórsetkishteri men is-sharalary negizinde, jobalyq basqarý standarttaryna sáıkes agroónerkásiptik keshenniń negizgi baǵyttary boıynsha uzaq merzimdi salalyq baǵdarlamalar ázirlendi, olardy iske asyrý merzimi 10 jáne odan da kóp jyldy quraıdy.
Bul et jáne sútti mal sharýashylyǵyn, qus sharýashylyǵyn, sýarmaly jerlerdi damytý baǵdarlamalary.
Sonymen qatar, Memlekettik baǵdarlama aıasynda salany sıfrlandyrýǵa, tehnıkalyq retteýge, aýyldyq aýmaqtardy damytý jáne salyq salý máseleleri qarastyrylatyn bolady.
Jalpy Memlekettik baǵdarlamada 10 mindetti oryndaý kózdelgen. Bul – azyq-túlik qaýipsizdigin qamtamasyz etý, qarjylandyrýdyń qoljetimdiligi, tıimdi salyq salý, jer jáne sý resýrstaryn tıimdi paıdalaný, naryqtarǵa qol jetkizý jáne eksportty damytý, agrarly ǵylym, tehnıkalyq jabdyqtaý men óndiristi jandandyrý, memlekettik qyzmet kórsetý sapasy men sıfrlandyrý, aýyldyq jerlerdi damytý.