Gastroldik saparǵa shyqqan ánshiler kóbine oblys ortalyǵymen shekteledi. Alystaǵy aýyldarǵa baratyndary neken-saıaq. Sońǵy jyldary Atyraýǵa kelgen ónerpazdar aýdandardy da aralaı bastady. Oǵan oblys basshylyǵynyń qoldaý kórsetýi de oń yqpalyn tıgizip otyr.
Dástúrli ánshi, Qazaqstannyń eńbek sińirgen qaıratkeri Gúlmıra Sarına oblystyq mádenıet, arhıvter jáne qujattama basqarmasynyń qoldaýymen Mahambet, Isataı, Qyzylqoǵa aýdandaryna arnaıy baryp, konserttik baǵdarlama usyndy. Atyraý qalasyndaǵy Qurmanǵazy mádenıet saraıynda da mándi kesh ótti.
– Atyraý – rýh qonǵan batyrlar men jyr qonǵan aqyndardyń eli. Mundaı kıeli mekenge kelý úshin úlken daıyndyq kerek dep oıladym. Sáti endi túsip, Jaıyq jaǵasyndaǵy jurtpen jeke konsertimde alǵash ret júzdestim, – deıdi Gúlmıra Sarına. «Saǵynysh» dep atalǵan án keshinde Dına Nurpeıisova atyndaǵy Qazaq halyq aspaptar orkestriniń súıemeldeýimen jandy daýysta óner kórsetken ánshini atyraýlyqtar jyly qabyldady. Gúlmıra Aıymǵazyqyzy qur qol kelmeı, qazaq saltymen syıyn da ala kelipti. Ol – «Atyraý – aıbarym» dep atalatyn jańa án. Aqyn Álııa Dáýletbaevanyń sózine jazylǵan án konsertte alǵash ret oryndaldy. Tyńdaǵan jannyń rýhyn oıatyp, jiger beretin týyndyǵa kórermen de rıza boldy.
Sharada aqyndar «Daryn» memlekettik jastar syılyǵynyń ıegeri Qalqaman Sarın, Tólegen Aıbergenov atyndaǵy syılyqtyń ıegeri Juldyzaı Ysqaq óleń oqydy. Batys án mektebiniń beldi ókili Qaırat Kákimov ánin áýeletti. Jaıyq jaǵasyna «Saǵynyshyn» ala jetken ánshige el rıza bolyp, qoshemet kórsetti.
Baqytgúl BABASh,
«Egemen Qazaqstan»
ATYRAÝ