Aqtóbede múmkindigi shekteýli balalarǵa arnalǵan О́ner mektebi esigin aıqara ashty. Munda balalar dombyra men bı úıirmelerine qatysyp, aǵylshyn tilin úırenedi. Erekshe bilim berýdi qajet etetin balalar ortalyqqa aqysyz qabyldanady. Sondaı-aq, dene kemistigi bar balalar da úıirmelerge qatysa alady. Olar saý balalarmen qatar aqyly bólimde bilim alady.
«Mýzykanyń adam densaýlyǵyna oń áser etip, ásirese, balalardyń este saqtaý qabiletin damytyp, kóńil-kúıiniń jaqsarýyna yqpal etetini barshaǵa aıan. «О́ner-jandy emdeý quraly» dep aıtady emes pe? Erekshe balalarǵa dombyra aspabyn meńgertý arqyly densaýlyǵyn jaqsartýǵa septigimdi tıgizsem degen maqsatym bar. Estý qabileti nashar balalarǵa dombyra úıretýdiń arnaıy ádistemesin oılap taptym. Dombyrada oınaýdy notamen emes, túster arqyly úıretemin»,-deıdi ortalyq basshysy Gúlsana Maǵzymbetova.
Gúlsana - kásibı mýzykant, mektepte mýzyka páninen sabaq bergen tájirıbeli ustaz. Qazirgi kezde ol súıikti isin jeke kásippen ushtastyrýdy maqsat tutyp, óz óner ortalyǵyn ashty. О́ner mektebiniń jumysy erekshe kútimdegi balalardyń qoǵamǵa beıimdelýine, olardyń densaýlyǵyn jaqsartýǵa baǵyttalǵan. Ortalyqta 3 muǵalim jumys isteıdi. Búginde mektepte 13 oqýshy bilim alýda. Olardyń jeteýi- múmkindigi shekteýli balalar. Úıirmege qatsysýshylardyń jas ereksheligine shekteý qoıylmaıdy. Ortalyqqa kelýshilerdiń eń jasy – tórt jasta, eresek adamdar da dombyra úırenýge yqylas tanytýda.
«О́ner mektebin ashýǵa óńirlik «Atameken» kásipkerler palatasynyń kómegi kóp tıdi. Bıznes-jospardan bastap, kásipti qalaı júrgizý kerektigin úıretti. Avtorlyq quqymdy alsam, franshıza ashyp, basqa qalalardan bólimsheler ashsam deımin. Bul rette de kásipkerler palatasy járdemdesip jatyr»,-deıdi Gúlsaıan.
О́ner mektebiniń jumysy –áleýmettik kásipkerlik baǵytyna jatady. Bul sala elimizde endi-endi damyp keledi. Áleýmettik kásipkerler bir jaǵynan qoǵamnyń álsiz tobyna jatatyn múmkindigi shekteýli jandarǵa kómek kórsetse, ekinshi jaǵynan turǵyndardy jumyspen qamtıdy. Alaıda, mundaı kásipkerlerdi zańmen qoldaý, salyqtyq jeńildik berý qarastyrylmaǵan. Osy baǵytta zań shyǵarylatyn bolsa, áleýmettik kásippen aınalysatyn jandardyń qatary kóbeıer edi,- deıdi kásipkerlik palata mamandary.
Temir Qusaıyn,
«Egemen Qazaqstan»