Qazaqstan Respýblıkasynyń Memlekettik hatshysy Gúlshara Ábdiqalyqova Azııadaǵy ózara yqpaldastyq jáne senim sharalary keńesine (AО́SShK) múshe elderdiń ulttyq-mádenı ortalyqtarynyń «Astanaǵa ystyq yqylaspen» atty azamattyq forýmyna qatysty, dep habarlaıdy Aqordanyń baspasóz qyzmeti.
Memlekettik hatshy forým qatysýshylaryna arnalǵan quttyqtaý sózinde Elbasy N.Á.Nazarbaevtyń Astana elimizge qýatty passıonarlyq serpin berdi jáne Qazaqstannyń kóp ultty halqyn óziniń ortaq tarıhı taǵdyrynyń biregeıligin sezinýge, óz kúshine senýge septigin tıgizdi degen sózine nazar aýdardy.
– Tarıhı ólshem turǵysynan alǵanda qysqa merzim ishinde Qazaqstannyń jańa elordasy el táýelsizdiginiń sımvolyna, Memleket basshysynyń strategııalyq baǵdarynyń júzege asyrylýynyń jarqyn mysalyna aınaldy, – dedi Gúlshara Ábdiqalyqova.
Memlekettik hatshy Azııadaǵy ózara yqpaldastyq jáne senim sharalary keńesiniń negizgi basymdyǵy Azııa memleketteri arasyndaǵy ózara qarym-qatynasty nyǵaıtý, turaqtylyqtyń ornyqty qurlyqtyq qurylymyn qalyptastyrý ekenin aıtty.
О́tken 25 jylda uıym qurlyqtaǵy qaýipsizdik pen yntymaqtastyqty qamtamasyz etýdiń senimdi tetigine aınaldy.
Memlekettik hatshy forýmda mádenıetaralyq yntymaqtastyqtyń jańa joldary, etnosaralyq kelisimdi nyǵaıtýdaǵy azamattyq qoǵamnyń róli jóninde ashyq ári tıimdi dıalog órbıtinine senim bildirdi.
Is-sharaǵa Qazaqstan Halqy Assambleıasy tóraǵasynyń orynbasary – Hatshylyq meńgerýshisi L.Prokopenko, Parlament depýtattary, dıplomatııalyq mıssııalar, memlekettik organdar, etnomádenı jáne jastar birlestikteri, elshilikter janyndaǵy ulttyq-mádenı ortalyqtar ókilderi, halyqaralyq sarapshylar, sondaı-aq ǵylymı jáne shyǵarmashylyq zııaly qaýym ókilderi qatysty.
Sondaı-aq, forým aıasynda Qazaqstan halqy Assambleıasy men О́zbekstan Respýblıkasy Mınıstrler kabıneti janyndaǵy Ultaralyq qatynastar men dostyq baılanystar jónindegi komıtet arasynda yntymaqtastyq týraly memorandýmǵa qol qoıyldy.
***
Azııadaǵy ózara yqpaldastyq jáne senim sharalary keńesine múshe elderdiń ulttyq-mádenı ortalyqtarynyń forýmy 2008 jyldan beri Qazaqstan halqy Assambleıasynyń qoldaýymen jyl saıyn ótkizilip keledi.
2014 jyly Azııadaǵy ózara yqpaldastyq jáne senim sharalary keńesi (AО́SShK) Atqarýshy komıteti men Qazaqstan Halqy Assambleıasy arasyndaǵy yntymaqtastyq týraly memorandýmǵa qol qoıyldy.
26 memleket (Aýǵanstan, Ázerbaıjan, Bahreın, Bangladesh, Vetnam, Egıpet, Úndistan, Irak, Izraıl, Iordanııa, Iran, Qazaqstan, Katar, Kambodja, Qytaı, Qyrǵyzstan, Monǵolııa, Pákistan, Palestına, Koreıa Respýblıkasy, Reseı, Birikken Arab Ámirlikteri, Tájikstan, Taıland, Túrkııa, О́zbekstan) Azııadaǵy ózara yqpaldastyq jáne senim sharalary keńesiniń múshesi bolyp tabylady.
12 el men halyqaralyq uıym (Belarýs, Indonezııa, Shrı-Lanka, Ýkraına, AQSh, Japonııa, Malaızııa, Fılıppın, Birikken Ulttar Uıymy, Eýropa Qaýipsizdik jáne Yntymaqtastyq Uıymy, TúrkPA jáne Arab memleketteri lıgasy) baıqaýshy mártebesine ıe.