...Oqý jyly aıaqtaldy. On aı boıy bilimmen sýsyndap, sharshaǵan balalardyń jańa oqý jyly aldynda demalyp, sergip, bos ýaqytynda sportpen shuǵyldanyp, sýǵa túsip, kúnge qyzdyrynǵandaryna ne jetsin?! Taıaýda Besqaraǵaı aýdanynyń ákimi Dáýlet Batyrbaevtyń muryndyq bolýymen kóne orman beldeýinde ornalasqan «Elim-aı» demalys bazasyna alǵashqy 60 bala demalýǵa keldi.
Qaraǵaı men samyrsyny jaıqalyp ósken ný orman ishindegi demalys bazasy alystan kóz tartady. Qaz-qatar ornalasqan aǵashtan órip salynǵan birneshe turǵyn úı, 250 adamǵa arnalǵan appaq shatyr, basseın, sport alańdary «Elim-aı» demalys bazasynyń kórki. Dırektory Sáýle Ospanova aýdannan kelgen oqýshylardy jyly qarsy aldy. Biz osy jerden aýdan ákimi Dáýlet Batyrbaevty, aýdandyq oqý bólimi bastyǵynyń mindetin atqarýshy Svetlana Haıdarova, Berezovka orta mektebiniń dırektory Erlan Qorǵanbaevty jolyqtyrdyq.
– Buryn aýdannyń oqýshylary 650 shaqyrym jerdegi Alakóldiń jaǵasyndaǵy «Úrjaraıym» demalys bazasynda demalýshy edi. Aýdandyq máslıhat depýtattarymen kelisip, taıaq tastam jerdegi Semeı qalasynyń mańyndaǵy ný ormanda qonys tepken «Elim-aı» demalys bazasynda tuńǵysh ret demalys lagerin uıymdastyrýdy sheshtik. Oǵan aýdandyq bıýdjetten 8 mıllıon teńge qarastyryldy. Osy joly 60 bala keldi. Kúzge deıin taǵy 250 bala demalady. Olarǵa bes ýaqyt taǵam beriledi. Demalys bazasynyń dırektory Sáýle Nesilhanqyzyna alǵysymyzdy aıtamyz, ol bizge túsinistikpen qarady. Bir kúngi bes ýaqyt taǵamy, tósek-orny, basseınge túsýine 5500 teńge tóleý kerek bolsa, ony 45 paıyzǵa azaıtty. Munda kúnkórisi tómen otbasylardyń balalary, múmkindigi shekteýli balalar, oqýda, sportta joǵary nátıjege jetip júrgender birinshi kezekte demalady, – dedi aýdan ákimi Dáýlet Baqytuly.
Elbasynyń Qazaqstan halqyna Joldaýynda týrızmdi damytý jóninde naqty tapsyrma berilgeni belgili. «Elim-aı» demalys bazasyna tek Semeı qalasy emes, oblystyń basqa aýdandarynan da demalýshylar kelmek. Aýasy taza, adam aǵzasyna paıdaly orman ishinde demalǵanǵa ne jetsin?! Sońǵy jyldary bul jerde adamdar demalatyn oryn, basseın, salyndy. Balalardyń alańsyz demalýyna barlyq jaǵdaı jasaldy. Voleıbol, basketbol, fýtbol alańdary bar. Búginge deıin ár otrıad voleıbol, basketbol, sýǵa júzýden jarys ótkizdi. Jeńimpazdarǵa syılyq berildi. Biz ár oqýshynyń bir kúndik demalysyna 3 myń teńgeden aldyq, – deıdi «Elim-aı» demalys bazasynyń dırektory S. Ospanova.
Ár otrıadtyń balalaryna tegin kıim berilgen. Aq, kók, sary tústi kıim kıgen balalarǵa qarap, olardyń qaı mektepten kelgenin anyqtaýǵa bolady. Olar aǵylshyn tilin úırenip, sporttyq jarystarǵa qatysýda. Ár otrıadtyń balalary spektakl qoıyp, óz ónerlerin ortaǵa salady. Orman ishinde serýendeý janǵa shıpa. Aýdandyq bilim bólimi bastyǵynyń mindetin atqarýshy S.Haıdarovanyń aıtýynsha, on kún saıyn mekteptiń dırektorlary, aǵylshyn tiliniń mamandary aýysyp turady eken. Oqýshylar tańerteń saǵat 9.00-de uıqysyn qandyryp turǵan soń dene qımylyn jasaıdy. Basseınge túsedi. Balalardyń densaýlyǵyn tekserip turatyn dárigerler bar.
Besqaraǵaı aýdanyndaǵy 21 mektepte 3600 oqýshy bar. Árıne olardyń barlyǵynyń demalys bazasynda demalýyna múmkindik shamaly. Alaıda, ata-analar óz qarjylaryna balalaryn demaldyryp jatyr. Oqýshy jazy kóńildi ótse, shákirtterdiń jańa oqý jylyna tyń kúshpen keletini sózsiz. Ońdasyn ELÝBAI, jýrnalıst
Shyǵys Qazaqstan oblysy, Besqaraǵaı aýdany