25-29 maýsymda Strasbýrgte Eýropa Keńesiniń Parlamenttik Assambleıasynyń jyl saıynǵy sessııasynyń úshinshi bóligi boldy. Oǵan Qazaqstan Senatynyń depýtattary Tóleýbek Muqashev, Sáýle Aıtpaeva jáne Sergeı Plotnıkov qatysty, dep habarlady palatanyń baspsóz qyzmeti.
Sessııanyń kún tártibine Eýropa Keńesi elderindegi quqyq qorǵaýshylar quqyqtaryn qamtamasyz etý jáne úkimettik emes uıymdar qyzmetin shekteý, bosqyndarǵa baspana berý týraly usynymdardy aımaqtarda shuǵyl qarastyrý jáne qaýipsiz baspanalar qalyptastyrý, kóshi-qon saıasatyndaǵy syrtqy máselelerdiń adam quqyqtaryna áseri endi. Parlamentshiler sondaı-aq Sırııamen kórshi memleketterdegi bosqyndardyń gýmanıtarlyq jaǵdaıyn, Eýropadaǵy májbúrli nekelesýdegi ózekti máselelerdi jáne mádenı murany saqtaý taqyryptaryn da talqylady.
26 maýsymda senatorlar Eýropa saraıynda Eýropa Odaǵy men Eýropa Keńesiniń «Qazaqstan ádil soty júıesiniń sapasy men tıimdiligin jaqsartýda Qazaqstan bıligine qoldaý bildirý» birlesken baǵdarlamasyn iske asyrýdy aıaqtaý jónindegi dóńgelek ústel otyrysyna qatysty. Sharaǵa Ázerbaıjan, Grýzııa, Ispanııa, Nıderland, Shvesııa, Shveısarııa, Ýkraına parlamenttik delegasııalarynyń ókilderi qatysty. Dóńgelek ústelge Qazaqstan jaǵynan ishki ister mınıstrligi, Bas prokýratýra jáne Joǵarǵy sottyń ókilderi qatysty.
Sessııa aıasynda Qazaqstan senatorlary Ázerbaıjan jáne Shveısarııa delegasııalarynyń basshylary S.Seıdov jáne F.Lombardımen, Eýropa halyqtyq partııasy toby tóraǵasynyń orynbasary E.Zıngerıspen (Lıtva), Eýropa halyqtyq partııasy tobynyń depýtaty, Moldova Parlamenti tóraǵasynyń orynbasary V.Gıleskımen, Lıberaldar men demokrattar alıansiniń depýtaty H.Shýklamen (Ispanııa) kezdesti.