Shymkentten Astanaǵa qaraı saparlaıtyndar sany búginde kóbeıe túsken. Jolǵa shyqqandardyń muraty – mereıtoıǵa jetý, elorda turǵyndarynyń qýanyshyna ortaqtasý. Jyldam jetkisi keletinder ushaqqa, asyqpaıtyndar poıyz ben avtobýsqa aldyn ala bılet alyp qoıǵan. Búginde jolaýshy tasymaldaıtyn poıyz ben ushaqqa bılet tabý qıyn. Al Túrkistan oblysynyń taýar óndirýshileri Astana qalasynyń 20 jyldyq merekesine oraı, elordada aýyl sharýashylyǵy ónimderiniń jármeńkesin ótkizip jatyr.
Alǵashqy jármeńkege qatysqan 50-den astam kásipker, jalpy quny 122,8 mln teńge bolatyn 286 tonna aýyl sharýashylyǵy ónimderin arzan baǵamen saýdalady. Atap aıtqanda, 65 tonna et ónimderi, 101 tonna kókónis, 18 tonna sút ónimderi, 23 tonna jemis-jıdek, 18 tonna kartop, 20 myń dana jumyrtqa, 6 tonna balyq, 5 tonna keptirilgen jemis, 4 tonna túrli konserviler, 41 tonna basqa da ónimder satylymǵa shyǵarylǵan. Oblys mereke aıasynda 5 ret jármeńke ótkizbek. Osy aralyqta túrkistandyq sharýalar elordaǵa 14 753 tonna bolatyn aýyl sharýashylyǵy ónimderiniń 28 túrin jóneltedi. Bul oraıda oblystan 35 iri jáne qosalqy sharýa qojalyqtary men kásiporyndary iriktelip, daıyndyq jumystary kúsheıtilgen. Sondaı-aq oblysta «Astananyń 20 jyldyǵyna – 20 nysan» aksııasy ótýde. Iаǵnı mereke qarsańynda oblysta 20 nysan ashylyp, el ıgiligine beriledi. Mysaly, «Ońtústik» ındýstrııalyq aımaǵynda ornalasqan «Shymkent Temir» JShS-nyń bolat quıý zaýyty iske qosylady. Jalpy quny 4,2 mlrd teńge bolatyn kásiporyn jylyna 240 myń tonna ónim shyǵarýǵa qaýqarly. О́ndiris orny iske qosylǵanda 150 azamat jumyspen qamtylmaq. Sonymen qatar Shymkentte ulttyq tennıs ortalyǵy, zoobaqtyń «Safarı» bóligi men Astana dańǵylynyń boıynda gúlzardyń ashylý rásimi ótti. Budan basqa mereıtoı qarsańynda el ıgiligi úshin oblys aýmaǵynda 4 balabaqsha, Shardara aýdanynda 10 páterli eki qyzmettik turǵyn úı men Tóle bı aýdanynda 20 páterli bes qabatty turǵyn úı, al Báıdibek aýdanynda 1 páterli 20 kommýnaldyq turǵyn úı qurylysy paıdalanýǵa beriledi. Al 1-6 shilde aralyǵynda Túrkistan qalasynda «Iаssy qus» sharýa qojalyǵynyń ekinshi kezeńi, syıymdylyǵy 200 tonna bolatyn kókónis jáne jemis-jıdek saqtaıtyn servıstik ortalyq ashylady. 200 oryndyq mádenıet úıi men 600 oryndyq mektep, 60 balaǵa shaqtalǵan «Aqken» emdeý-saýyqtyrý lageri jáne sport nysandary men demalys oryndary da «Astana qalasynyń 20 jyldyǵyna – 20 nysan» aksııasy barysynda el ıgiligine tapsyrylmaq.
Mundaı ıgi iske Shymkent qalasy da óz úlesin qosýda. Jýyrda «Astana» shaǵyn aýdany men «Astana» gúlzary ashyldy. Turǵyndarǵa shaǵyn aýdannan jańa páterlerdiń kilti tapsyryldy. «Nurly jer» baǵdarlamasy boıynsha salynǵan bul úıdiń páterleri áleýmettik az qamtylǵan otbasylar men jetimderge jáne uzaq ýaqyttan beri turǵyn úı kezeginde turǵan azamattarǵa berildi. Jalpy, qalanyń ákimshilik-iskerlik ortalyǵynda osy ýaqytqa deıin 90 myń sharshy metr turǵyn úı paıdalanýǵa berilgen bolatyn. Qazirgi tańda munda kóp qabatty 27 úı salynýda. Endi bul shaǵyn aýdan «Astana» dep atalady. Al aýmaǵy bir gektarǵa jýyq «Astana» gúlzarynda shynar, kashtan, qaıyń aǵashtary men túrli gúlder egilip, oryndyqtar men jaryqshamdar, balalarǵa arnalǵan oıyn alańshalary ornatylǵan.
Ǵalymjan ELShIBAI, «Egemen Qazaqstan»
Túrkistan oblysy