Búgin bas basylym óziniń jas jýrnalısterge arnalǵan báıgesiniń jeńimpazdaryn marapattady. «Egemen Qazaqstan» gazetiniń jas jýrnalısterge arnalǵan syılyǵy bıyl «Elorda – eldiktiń aınasy» degen taqyryp aıasyndaǵy 3 nomınasııa boıynsha – «úzdik tanymdyq materıal», «úzdik jýrnalıstik zertteý» jáne «úzdik fotoreportaj» úshin jarııalanǵan bolatyn.
Úmitkerlerdiń maqalalary 20 jyldyǵy atap ótip jatqan Astana qalasy týraly, onyń ótkeni men búgini, keleshegi hám tutas el damýynda alatyn orny jaıynda tarıhı-tanymdyq turǵydan jazylyp, ózekti máselelerdi qozǵaǵan. Sonymen birge bas qalanyń elimizdi álemge áıgileýdegi róli jóninde de dáıekti oı tolǵaýlar boldy. Jalpy konkýrsqa otyzǵa jýyq materıal kelip túsken. Redaksııa quramynan jasaqtalǵan qazylar alqasy materıaldardy qarastyra kele, foto jumystar túspeýine baılanysty onyń ornyna Astana týraly taǵy bir úzdik materıaldy «úzdik esse» atalymynda marapattaýdy jón kórdi. Sonymen, konkýrstyq komıssııanyń sheshimine sáıkes, «úzdik tanymdyq materıal» nomınasııasy boıynsha «Ortalyq Qazaqstan» gazetiniń bólim meńgerýshisi Jánibek Álıman, «úzdik jýrnalıstik zertteý» nomınasııasynda «Aq jelken» jýrnalynyń bas redaktorynyń orynbasary Aslan Tilegen, al «úzdik esse» nomınasııasynda «Ulan» gazetiniń tilshisi Tańsholpan Tólegen jeńimpaz dep tanylyp, olardyń árqaısysyna arnaıy kádesyı jáne 200 000 (eki júz myń) teńge aqshalaı syılyq tapsyryldy.
Eske sala keteıik, «Egemen Qazaqstan» gazetiniń jas jýrnalısterge arnalǵan syılyǵy úshin konkýrsy osymen ekinshi ret uıymdastyrylyp otyr.
Baǵashar TURSYNBAIULY,
«Egemen Qazaqstan»