Ulttyq akademııalyq kitaphanada Qazaqstan halqy Assambleıasy múshelerine Qazaqstan Respýblıkasynyń memlekettik nagradalaryn jáne «Qazaqstan Respýblıkasynyń táýelsizdigine – 20 jyl» mereıtoılyq medaldaryn tapsyrý saltanaty ótti.
Assambleıa múshelerine el Prezıdenti, Ult kóshbasshysy jáne Qazaqstan halqy Assambleıasynyń Tóraǵasy Nursultan Ábishuly Nazarbaevtyń atynan nagradalardy QHA Tóraǵasynyń orynbasary – Hatshylyq meńgerýshisi Eraly Toǵjanov tapsyrdy.
Qazaqstan Respýblıkasynyń memlekettiligin qalyptastyrý men egemendigin nyǵaıtýǵa qosqan úlken úlesi, qoǵamdaǵy kelisimdi saqtaý salasyndaǵy jemisti qyzmeti, elimizdegi beıbitshilik, dostyq pen el birligin nyǵaıtýǵa sińirgen eńbegi úshin, sondaı-aq Táýelsizdiktiń 20 jyldyǵyna baılanysty Assambleıanyń 49 múshesi nagradtaldy, olardyń ishinde QHA Keńesiniń músheleri, respýblıkalyq jáne aımaqtyq etnomádenı birlestikter basshylary, Assambleıanyń Ǵylymı-saraptyq keńesiniń ókilderi bar.
E.Toǵjanov Táýelsizdiktiń eń basty qundylyq retindegi aýyspaıtyn mańyzyn kórsete otyryp, qonaqtardy Táýelsizdiktiń 20 jyldyq mereıtoıymen quttyqtady. Táýelsizdiktiń arqasynda, qoǵamnyń san qyrlylyǵy men polıetnostylyǵyn, halyqtyń damýdyń úzdik tájirıbesine beıimdiligi men erkindik súıgish minezin negizge ala otyryp, ulttyq saıasatty jańa memleket qurýǵa baǵyttaýǵa jol ashyldy, onyń basty jetistikteri – beıbitshilik, progress jáne etnosaralyq toleranttylyqqa qol jetkizýge múmkindik paıda bolǵanyn atap ótti.
E.Toǵjanov: «El birligi men qoǵamdyq kelisim elimizdiń jemisti damýyn qamtamasyz etti. Qazaqstan Táýelsizdiktiń 20 jylynda «qazaqstandyq jol» uǵymymen beınelenetin turaqtylyq pen áleýmettik-ekonomıkalyq progrestiń ózindik formýlasyn jasap shyqty», – dedi.
Sharada Táýelsizdiktiń 20 jyldyǵy merekesine arnalǵan mereıtoılyq is-sharalardy ótkizý boıynsha Qazaqstan halqy Assambleıasy jumysynyń qorytyndylary shyǵaryldy. Osy jumys aıasynda Assambleıa QHA-nyń Táýelsizdiktiń 20 jyldyǵyn ótkizý jónindegi arnaıy is-sharalar josparyna sáıkes 475 sharany iske asyrdy.
Respýblıka boıynsha aımaqtyq Qazaqstan halqy Assambleıalarymen taqyryptyq is-sharalar, qazaqstandyq qundylyqtar – beıbitshilik, etnosaralyq kelisim, otansúıgishtik, el birligin odan ári nyǵaıtýǵa baǵyttalǵan konferensııalar men «dóńgelek ústelder», etnomádenı birlestikter men Dostyq úıleriniń ashyq esik kúnderi, konkýrstar, shyǵarmashylyq kezdesýler, qaıyrymdylyq aksııalary, kórmeler, konsertter, óner jáne qoldanbaly týyndylar festıvaldary, sporttyq jarystar jáne t.b. ótkizildi.
«Egemen-aqparat».
Astana.