О́tken jyldyń kúzinde Aqtóbe qalasynda qazaq kúı óneriniń teńdesi joq tulǵasy, óner zertteýshisi, qazaqtyń Qurmanǵazy atyndaǵy akademııalyq halyq aspaptar orkestrin óz qolymen qurǵan Ahmet Jubanov pen ol kiminiń perzenti, klassıkalyq mýzyka janrynda talaı tamasha týyndylar týǵyzǵan kórnekti kompozıtor Ǵazıza Jubanovanyń shyǵarmashylyq joldaryn dáripteıtin tamasha ortalyq ashylǵan edi. Sodan beri jańadan urylǵan mádenıet pen óner shańyraǵy óńirde shyǵarmashylyq áleýettiń tolysa túsýine uıtqy bolyp keledi. Munda «bulaq kórseń, kózin ash» degendeı jas daryndardyń órisin ósirý jóninde de biraz is-sharalar belgilengen.
Biz taıaýda osy ortalyqta taǵy bir ıgilikti istiń júzege asqanyna kýá boldyq. Ǵnı munda «Jubanovtar álemi» mádenıet ortalyǵy men Qurmanǵazy atyndaǵy Qazaq memlekettik akademııalyq halyq aspaptar orkestri arasynda shyǵarmashylyq jáne gastroldyq yntymaqtastyqty damytý jónindegi kelisimshe qol qoıyldy. Atalǵan óner men mádenıet ujymdarynyń basshylary Laýra Maıtekova men Nurǵısa Dáýeshevtiń aıtýynsha eki jaqty mádenı jáne rýhanı baılanystar kásibı sheberlikti shyńdaýǵa jáne shyǵarmashylyq tájirıbeni tolyqtyra túsýge negiz qalaıdy.
Elimizdiń mádenıet pen mýzykalyq baǵyttaǵy muralary meılinshe baı. Búgingi kezde «Jubanovtar álemi» ortalyǵy basa nazar aýdaryp otyrǵan basty máselelerdiń biri de onyń jaýhar úlgilerin dáripteý bolyp tabylady. Osyndaı ómirsheń ári keń kózqaras turǵysynan qarastyrǵanda bul jańa mádenı qurylymnyń qyzmeti tek bir ǵana Ahmet pen Ǵazıza Jubanovtardyń shyǵarmashylyq murasyn zertteýmen jáne nasıhattaýmen shektelip almaıtynyn aıqyn ańǵara alamyz.
Al ekinshi bir oı tarazysynan salmaqtasaq respýblkıamyzdaǵy orkestrler men dırıjerler, ansamblder men jeke oryndaýshylar ózderimen ózi, tomaǵa-tuıyq kúıinde qalyp qoımaýǵa tıis. Áıtpese mundaı jaǵdaıda óner men mádenıettiń órisi tarylmaı tura almaıdy. Kerisinshe ortaq rýhanı jobalar men aımaqtyq oryndaýshylyq mektepterdiń birlesken konsertteri buǵan deıin qalyptasqan qasań qaǵıdalardy yǵystyryp shyǵara alady. Mundaıda yntymaqtastyq arnalarynyń meılinshe keń bolýynyń mańyzy joǵary. Eń bastysy ózara tájirıbe almasý tártibin tereńdetý, óner ujymdarynyń bir-birinen úırenýi, ári birin-biri baıyta túsýi men tolyqtyrýy aldyńǵy kezekke shyǵýynyń tıgizer paıdasy mol. Ári mundaı shyǵarmashylyq baılanystar men qarym-qatynastar respýblıkamyzda fılarmonııalar birlestiginiń shynaıy shyǵarmashylyqbazasyn qurýǵa múmkindik beredi.
Máseleniń mundaı mánisinen kelgende de «Jubanovtar álemi» mádenıet ortalyǵy men Qurmanǵazy atyndaǵy qazaq memlekettik akademııalyq halyq aspaptar orkestriniń arasynda jasalǵan kelisim eki tarapqa da paıdaly áser koeffısıentin tıgize alary anyq. Bıylǵy shilde aıynyń alǵashqy on kúndiginde osy kelisimge sáıkes alǵashqy qadamdar jasaldy da. Onyń basty dáleli Nurǵısa Dáýeshev bastaǵan Qurmanǵazy orkestri músheleri «Jubanovtar álemi» mádenıet ortalyǵynyń dıretkory Laýra Maıtekovanyń shaqyrýyna sáıkes Almatydan arnaıy kelip, atalǵan ortalyqtyń zalynda úsh kún qatarynan konsert qoıyp, kúı men án ónerin pir tutqan aqtóbelikterdiń kóńilderin bir serpiltip tastaǵany. Keleshekte eki aradaǵy kelisimge sáıkes taraptar joǵaryda aıtylǵan maqsattar men mindetter aıasynda ózge de birlesken is-sharalardy júrgizip, ony mazmun jaǵynan da, túr jaǵynan da odan ári tolyqtyra túsýdi uıǵaryp otyr.
Temir Qusaıyn,
«Egemen Qazaqtan»
AQTО́BE