«QazTransOıl» AQ Astananyń 20 jyldyq mereıtoıyna arnap, qala turǵyndary men qonaqtaryna erekshe etnoaýyldy syıǵa tartty. «Rýhanı jańǵyrý» baǵdarlamasy aıasynda uıymdastyrylǵan etnoaýyl búginimiz ben ótkenimizden syr shertedi. Kompanııanyń merekege arnalǵan syıy munymen shektelmeı, osy kúnderi elimizdiń áleýmettik osal toptary úshin qaıyrymdylyq marafony ótkizildi.
Jalpy 5 kúnge sozylǵan etnoaýyl jumysyn 30 myńǵa jýyq adam tamashalady. Olardyń ishinde alys-jaqyn shetelderden, Reseıden, Qytaıdan, Ispanııadan kelgen qonaqtar da bar. Etnoaýyl Astana qalasy ákiminiń orynbasary Ermek Amanshaevtyń, «QazMunaıGaz» kompanııasynyń munaıdy tasymaldaý jónindegi basqarýshy dırektory Nurtas Shmanovtyń, «QazTransOıl» AQ bas dırektory Dımash Dosanovtyń, shyǵarmashylyq ujymdar men oryndaýshylardyń qatysýymen 3 shilde kúni ashyldy. Jalpy erekshe aýyl jumysyn uıymdastyrýǵa «QazTransOıl» kompanııasynyń 150-ge jýyq qyzmetkeri atsalysty.
Etnoaýyl kesheni kompanııanyń óndiristik nysandary ornalasqan elimizdiń 11 óńiri usynǵan san túrli eksponattarmen jabdyqtaldy. Sonyń ishinde Mańǵystaýdan kelgen kompanııa ókilderi atalǵan óńirdiń tarıhı jerlerine saıahattaýǵa múmkindik berse, aqtóbelik munaıshylar jabdyqtaǵan «Muǵaljar» elimizdiń ulttyq kıimderi men Qazaqstan halqy Assambleıasynyń qyzmetin kórsetti.
Sondaı-aq Qaraǵandy munaı qubyry basqarmasy uıymdastyrǵan «Saryarqa» kıiz úıinde Elbasy Nursultan Nazarbaevtyń eńbek joly, saıasattaǵy alǵashqy qadamdary men qoldanǵan zattary týraly qundy derekter qoıylǵan. Al Astananyń búgingi jarqyn kelbeti men ásem ǵımarattary pavlodarlyq munaıshylar jabdyqtaǵan «Baıanaýyl» kıiz úıinde kórinis tapty.
Sonymen qatar shymkenttik munaı qubyry basqarmasynyń qyzmetkerleri kelýshilerdi Uly Jibek joly týraly, sondaı-aq óńirdegi tarıhı jáne ejelgi eskertkishter týraly aqparattarmen tanystyrdy. Onyń ishinde Qoja Ahmet Iаsaýı jáne Arystan bab keseneleri, ejelgi qalalar Otyrar jáne Túrkistan týraly derekter bar. Al «Ulytaý» dep atalatyn Jezqazǵan óńiriniń munaıshylar jabdyqtaǵan kıiz úıi Altyn-Emel, Ile Alataýy, Sharyn, Býrabaı, Qarqaraly sııaqty ulttyq parkterdiń tarıhy týraly syr shertedi.
Al Mańǵystaý munaı qubyry basqarmasy kadr qyzmetiniń bastyǵy Danııar Shamjanov Mańǵystaý oblysy etnoaýyldy «Aspan astyndaǵy murajaı» degen taqyryp aıasynda kıiz úıdi jabdyqtaǵanyn atap ótti. «Qazaqtyń qasıetti jerleri men óńir tarıhyn tereńnen túsindiretin eksponattarmen jabdyqtadyq. Sherqala taýy men Túpqaraǵan túbegi, elimizdiń 1000 teńgesinde beınelengen Bozjyra taýynyń maketterimen jabdyqtadyq», dedi ol.
Sharany ashqan «QazMunaıGaz» kompanııasynyń munaıdy tasymaldaý jónindegi basqarýshy dırektory Nurtas Shmanov jınalǵandardy Astananyń 20 jyldyq mereıtoıymen quttyqtady. «Osy sharany ótkizýge atsalysqan barlyq kompanııa qyzmetkerlerine alǵys bildiremin. Shara barysynda Qazaqstannyń 11 aımaǵynan kelgen qyzmetkerler etnoaýyl kesheninde oblystardyń mádenı muralary týraly tereńnen áńgimelep, kelýshilerdi óńirlerdiń tarıhymen tanystyrdy. Sondaı-aq 500-ge jýyq áleýmettik turǵydan osal toptar úshin arnaıy qaıyrymdylyq jáne mádenı is-sharalar ótkizdi. Munyń barlyǵy da kompanııa qyzmetkerleriniń otansúıgishtik qasıeti men azamattyq paryzyna beı-jaı qaramaıtynyn kórsetedi», dedi N. Shmanov.
О́z kezeginde sóz alǵan «QazTransOıl» AQ bas dırektorynyń orynbasary Sábıt Arynov Astananyń 20 jyldyǵymen jáne «Keńqııaq» munaı beketiniń ashylýymen quttyqtady. «Astananyń 20 jyldyǵy qarsańynda, elimiz úshin aıtýly oqıǵalardyń biri «Keńqııaq» bas munaı aıdaý stansııasy qaıta iske qosyldy. Bul elimizdiń Qytaıǵa munaı tasymalyn 20 mln tonnaǵa deıin arttyrýǵa múmkindik beretin «Keńqııaq-Atyraý» munaı qubyry jobasyn júzege asyrýdaǵy aıshyqty qadam», dedi ol.
«QazTransOıl» AQ bas dırektorynyń orynbasary Shara Tańatarova da barsha qaýymdy Astananyń 20 jyldyǵymen quttyqtap, áriptesterine óz rızashylyǵyn bildirdi. «Etnoaýyl jobasy barshamyzǵa ultymyzdyń ótkeni men búginine, tarıhymyzǵa qaıta kóz júgirtýge múmkindik berdi. Osy oraıda barlyq áriptesterimdi etnoaýyldyń tabysty jumysymen quttyqtap, jańa jetistikter tileımin», dedi.
Sondaı-aq «QazTransOıl» AQ mereke kúnderi qaıyrymdylyqtan da shet qalǵan joq. Qaıyrymdylyq sharasy aıasynda keshenge az qamtylǵan otbasylardyń balalary men múgedekter, ardagerler sııaqty jalpy sany 500-den astam adam qamtyldy. Ardagerlerge arnalǵan qaıyrymdylyq aksııasyna 100-den asa ardager qatysyp, óńirler tarıhymen tanysty.
Kesh barysynda «QazTransOıl» AQ basshylyǵy Astana merekesine oraı jasaǵan syı, etnoaýyl men merekelik konsertterdi uıymdastyrýǵa atsalysqan munaı qubyry basqarmalary men ortalyq apparat departamentteri ujymdaryn marapattady. Gala-konsertte otandyq tanymal ánshiler án shyrqap, kesh sońy «QazTransOıl» AQ shyǵarmashylyq toptarynyń óner kórsetýimen aıaqtaldy.
Mádına JÁLELQYZY, «Egemen Qazaqstan»