Qyzylorda oblysynda Tuńǵysh Prezıdent saıabaǵynda Patrıottar forýmy ótti.
Oblys turǵyndaryn Astana kúnimen quttyqtaǵan aımaq basshysy Qyrymbek Kósherbaev: «Qazaq tarıhynda halqyna qorǵan bolsam, alǵa jetelep, armanyna jetkizsem, táýelsiz el qylyp, bıikke kótersem degen tulǵalar az bolmaǵan. Qasym hannyń qasqa joly, Esim hannyń eski joly, áz-Táýkeniń Jeti jarǵysy sodan qalǵan. Abylaı hannyń arpalysy, Ábilqaıyr hannyń jantalasy qazaqty qalaı da qazaq qylsam degen armannan týǵan. Al sol babalardyń armanyn asqaq, maqsatyn murat etken búgingi Kóshbasshymyz – Tuńǵysh Prezıdentimiz Nursultan Ábishuly Nazarbaev boldy. Biz endi Elbasymyzdy sasqanǵa saıa desek te, asqanǵa tosqan desek te, ultqa uran, urpaqqa ustaz desek te, eldiń ıesi, jerdiń kıesi dep qansha aıtsaq ta artyq bolmaıdy! О́ıtkeni, búgingi Qazaqstan – bolashaǵy bekem, keleshegi kemel el!», dedi.
Búginde «Memleket maǵan ne berdi deme, men memleketke ne berdim de» degen oı kóbirek aıtylady. Iаǵnı, endi alda ne bolar eken dep ketpenniń sabynan qaraýyl qaramaı, óz eńbegimen úles qosýyń kerek. El basyna kún týǵanda, qasyndaǵy qarýlastary pýlemettiń jańbyrsha jaýǵan oǵynan orǵan bıdaıdaı japyrylyp jatqanda Sultan Baımaǵambetov ajal shashqan dzotty keýdesimen japty. Júzdegen jaýyngerdiń ómirin saqtap qaldy. Al osyndaı erlik beıbit zamanda da bolady. Olar qıyn jaǵdaıda abdyrap qalmaıdy, erlik kórsetedi. Máselen, oblystyq ishki ister departamentiniń jyldam qımyldaıtyn arnaıy jasaǵynyń ınspektory Baýyrjan Nurjanov órtke oranǵan kóp qabatty úıdi kórgende aldymen órt sóndirý qyzmetine habar bergen. Sodan soń oılanbastan jalyn qushqan úıge kirip, bes jáne alty jastaǵy eki baldyrǵandy alyp shyqqan.
On bir jastaǵy Arýjan Bısenbaevanyń úıinde eresekter bolmaǵan kezde órt shyqqan. Úıinde eki sińlisi men inisi bolǵan. Sol kezde barmaqtaı ǵana qyz bala esh abdyramastan baýyrlaryn tereze arqyly órtten alyp shyqty.
Al kólik apatyna ushyrap belden qalǵan Saǵatbek Sııýov «taǵdyr saldy men kóndim» dep úıinde otyryp qalmapty. Múgedekter arbasyna tańylǵan ol – «Jyly júrekti jastar» eriktiler tobynyń jetekshisi. Qaıyrymdylyq sharalaryna qatysyp júrgen Saǵatbek – «frıstaıl» sportynan elimiz chempıonatynyń jeńimpazy.
«Erlik» úılestirý keńesiniń jáne «Aýǵanstan soǵysy ardagerleri uıymy» qoǵamdyq birlestiginiń tóraǵasy Qaıraddın Baımahanov kóp jyl boıy jas urpaqty patrıottyqqa tárbıeleý boıynsha belsendi jumys júrgizip keledi. Aýǵan soǵysy ardagerlerimen kezdesýler ótkizip, birneshe áskerı-patrıottyq joba jasaǵan.
Sofııa Aýjarova – 25 jyl eńbek ótili bar dáriger, oblystyq jedel járdem stansasynyń bólim meńgerýshisi. 19 jyl alǵashqy medısınalyq qyzmet kórsetý brıgadasynda qyzmet atqarǵan Sofııa Tursynbaıqyzy – klınıkalyq ólim jaǵdaıyndaǵy, aýyr koma ústindegi, jol jaraqattary, sýyq qarýmen ólim jaǵdaılarynda ajalmen arpalysyp jatqan naýqastardy aman alyp qalǵan batyl dáriger.
Mine, tizim osylaı jalǵasa beredi. Qyrymbek Eleýuly Patrıottar forýmynda olardy marapattap, aldaǵy ómirlerine aq tileý aıtty.
Otanynyń jarqyn bolashaǵy úshin beıbit kúnde erlik kórsetken azamattar Táýelsiz Qazaqstannyń tuǵyry bıik bolýy úshin úles qosýy kerektigin aıtady.
Dúrkirep ótken Astana toıy búkil alash jurtynyń merekesine aınaldy. Álemdik kıkiljińderde qos taraptardy bitistirý úshin ortaq dıalog jasap otyrǵan elordanyń mártebesi asqaqtaı bersin, deıdi olar.
Baqtııar TAIJAN, «Egemen Qazaqstan»
Qyzylorda oblysy