Stýdentterdi jataqhanamen qamtamasyz etýge baǵyttalǵan jumystar keıbir óńirde múldem qolǵa alynbaǵan. Bul týraly búgin Úkimet otyrysynda QR Premer-Mınıstri Baqytjan Saǵyntaev aıtty, dep habarlaıdy QazAqparat.
«Biz sońǵy aılarda kóp óńirlerge eskertý jasadyq. Kórip otyrmyz, jarty jyldyń qorytyndysy boıynsha ásirese sońǵy aıda úlken ózgerister boldy. Soǵan qaramastan mysaly úı qurylysyna keletin bolsaq kópqabatty úılerdi paıdalýǵa berý Almaty oblysynda - 20, Atyraý oblysynda - 45, Jambyl oblysynda - 35, Túrkistan oblysynda - 30, Almaty qalasynda 56 paıyzdy quraıdy. Qyzylorda oblysynda birde-bir úı joq. Jarty jyl ótti, sol 20-30 paıyzdyń sońynda júrmiz», - dedi Úkimet basshysy.
Sonymen qatar Premer-Mınıstr Elbasynyń 5 áleýmettik bastamasynda kóterilgen stýdentterdi jataqhanamen qamtý tapsyrmasyn oryndaýda da kemshilikter oryn alyp jatqanyn basa aıtty.
«Qajetti qarjy berilgen, jumystyń barlyǵy atqaryldy dep baıandap otyrsyzdar. Al Elbasynyń 5 áleýmettik bastamasyna kiretin jataqhana máselesine keletin bolsaq, 8 óńirde ǵana jataqhana berýge qol jetkizilgen. Olar: Aqmola, Almaty, Atyraý, BQO, Qaraǵandy, ShQO, Astana men Almaty qalalary. Basqa óńirlerde birde-bir jataqhana, birde-bir sharshy metr paıdalanýǵa berilmegen. Osyny eskerińizder», - dedi Baqytjan Saǵyntaev oblys ákimderine qarata.