Táýelsizdik saraıynda «Aqanaevtar áýleti» atty kórmesiniń saltanatty ashylýy ótti.
Kórme «Nur Otan» partııasynyń qoldaýymen sýretshi Amandos Aqanaevtyń 70 jyldyq mereıtoıy men shyǵarmashylyǵynyń 50 jyldyǵyna jáne Astananyń 20 jyldyq torqaly toıyna oraı «Rýhanı jańǵyrý» baǵdarlamasy aıasynda uıymdastyrylyp otyr. Aqanaevtar áýletinen shyqqan sýretshiler men basqa da qylqalam sheberleriniń eńbekteri qoıylǵan kórmege «Nur Otan» partııasy Tóraǵasynyń birinshi orynbasary Máýlen Áshimbaev, Astana qalasy ákiminiń orynbasary Ermek Amanshaev, elimizge belgili sýretshiler men óner qaıratkerleri qatysty.
Is-shara barysynda «Nur Otan» partııasy Tóraǵasynyń birinshi orynbasary halqymyz úshin mádenıet pen ónerdiń alar orny qashanda erekshe ekenin aıtty. Sol sebepti de Elbasymyz bul salaǵa aıryqsha mán berip, onyń qarqyndy damýyna barlyq jaǵdaıdy jasap keledi.
– Elbasynyń «Rýhanı jańǵyrý» baǵdarlamasy ulttyq kodymyzdy saqtaı otyryp, álemniń ozyq tájirıbelerinen úlgi alyp, bolashaqqa batyl qadam jasaýǵa baǵyttalǵan. Odan bólek, Memleket basshysy aldymyzǵa álemniń eń damyǵan 30 eliniń qataryna qosylý jóninde naqty mindet qoıyp otyr. Bul jerde tek ekonomıka ǵana emes, rýhanı jáne mádenı salanyń da órkendeýine basa mán beriledi. Osy turǵydan kelgende, Amandos Átibekulynyń eńbekteri halqymyzdyń ulttyq kodyn saqtap, ony óskeleń urpaqqa nasıhattaýǵa jáne damyǵan eldermen terezesi teń dárejede turýǵa mol múmkindik beredi, dedi Máýlen Áshimbaev.
Kórmege «Meniń zamandastarym» atty janrlyq portretter toptamasyna 20-dan astam tanymal tulǵalar beınelengen óner týyndylary kirgen. Sýretshi osy joba boıynsha on jyldan astam ýaqyttan beri jumys isteýde jáne ony aldaǵy jyldarda jalǵastyrýǵa nıettengen. Portretter sıkli Amandos Aqanaev pen onyń otbasy músheleri – «Aqanaevtar sýretshiler áýleti» atty shyǵarmashylyq jobasymen tolyqtyrylǵan. Sonymen qatar kórmege Qytaı Sýretshiler odaǵynyń múshesi Sıýı Inlıdiń de týyndylary qoıylǵan.
Kórmege ártúrli tehnıkamen jasalǵan 70-ten astam týyndy kenep, kollaj, releftik keskindeme, grafıka, qabyrǵa sýretteri men qondyrǵylarynyń eskızderi árqıly beınelengen.
Mádenıet pen rýhanı qundylyqtardyń damýy ekonomıkalyq ósim men halyqtyń turmysyn jaqsartý sııaqty eń mańyzdy máselelermen qatar turady. Sol sebepti de elimizde ekonomıkalyq, saıası, áleýmettik jáne rýhanı jańǵyrý bastamalary júıeli júzege asyrylýda. Osylaısha búginde qazaqstandyq mádenıetti álemdik mádenı muranyń ajyramas bóligine aınaldyrýǵa aıryqsha mán berilip otyr. Ol úshin ónerdiń damýyna tyń serpin beretin osyndaı is-sharalardy jıi ótkizip, talanttardy qoldaýdyń bereri mol ekeni anyq.
Kórmeniń ashylýynda Astana qalasy ákiminiń orynbasary Ermek Amanshaev, belgili dıplomat, Kórkemóner akademııasynyń akademıgi Jeken Qalıuly, Qazaqstan Sýretshiler Odaǵynyń tóraǵasy Januzaq Músápir, Qazaqstannyń eńbek sińirgen qaıratkeri Erlan Aıtýarov jáne taǵy basqa qoǵam belsendileri men belgili sýretshiler sóz alyp, is-sharanyń mańyzyna nazar aýdardy.
«Amandos Aqanaev – beıneleý óneriniń jańa dástúrin qalyptastyrǵan sýretshi. Búgingi áńgime Aqanaevtar áýleti týraly bolýy kerek. О́ıtkeni Aqanaevtar otbasynyń barlyǵy sýretshi jáne óner álemine ózindik erekshelikterimen tanylǵan. Elordamyzdyń 20 jyldyǵyna arnalǵan bul kórme naǵyz beıneleý óneriniń shyńyn kórsetetin kórme dep aıtýǵa bolady. Sýretshiler otbasy az emes, biraq Aqanaevtar otbasy – biregeı. О́zgege úlgi, urpaqqa ónege», – dedi Januzaq Músápir. Amandos Aqanaev barsha ónersúıer qaýymǵa jáne kórmeniń ótýine atsalysqan azamattarǵa alǵysyn bildirip, erekshe rızashylyǵyn jetkizdi.
Amandos Aqanaev – tek elimizde ǵana emes, Ortalyq Azııada keńinen tanymal sheber sýretshi. Onyń qaıtalanbas, ózine ǵana tán órnekteri tutas túrki jurtynyń ańyz-ápsanalarynan syr shertedi. Onyń kartınalaryna qarap kóshpeli túrki halyqtarynyń mádenıetimen jaqynyraq tanysýǵa múmkindik týady.
Qylqalam sheberiniń eńbekteri osyǵan deıin álemniń birqatar elderinde ótken kóptegen kórmelerge qoıylǵan. Sonyń ishinde AQSh, Ispanııa, Germanııa, Reseı sııaqty elderdi erekshe atap ótken jón. Odan bólek, Shveısarııa, Fransııa, Italııa, Japonııa jáne taǵy basqa ondaǵan elderdiń jeke kolleksııalarynda sýretshiniń shyǵarmalary saqtaýly tur.
Baǵashar TURSYNBAIULY, «Egemen Qazaqstan»