Baspanaly bolý – ár adamnyń armany. Sol armandaǵan baspanasyna qol jetkizý úshin bireýler qajetti qarajatty jyldap jınaıdy. Ekinshi bireýler nesıe alady, qaryzdanady. Al úshinshi bireýler tez arada baspanaly bolǵysy kelip jeńil jol izdeıdi. Alaıda osy adamdardyń qaısybiri alaıaqtar quryǵyna túsip qalyp jatady. Ásirese jeńil jol izdeıtinder memlekettik baǵdarlama arqyly páter alyp beremiz deıtin adamdarǵa aldanady. Osy oraıda mundaı alaıaqtardyń arbaýyna túsip, qapyda qalmas úshin neni bilip, ne isteý kerek degen suraqqa advokat Seıfýlla ShYŃǴYS jaýap beredi.
– Rasy kerek, bul másele búginde ýshyǵyp tur. «Memlekettik baǵdarlama arqyly páter alyp beremin» deıtin alaıaqtar kez kelgen adamnyń senimine ońaı kiredi. Osy oraıda jyldap jınaǵan bar aqshasynan aıyrylyp qalyp, san soǵyp júrgender qatary azaıar emes. Qarjysyn qaıtarý úshin ishki ister bóliminiń tabaldyryǵyn tozdyryp júrgender qanshama. Biraq, ókinishke qaraı, kóp jaǵdaıda alaıaqtar jaýapkershilikten qutylyp ketedi. Buǵan ne sebep deısiz ǵoı? Oǵan sebep, polısııanyń qaýqarsyzdyǵy emes, alaıaqtardyń aldyn ala ustalmaý amalyn jan-jaqty qarastyryp, qandaı tyǵyryqtan da shyǵýdyń jolyn taýyp qoıǵandyǵynda jatyr. Qalaı deısiz ǵoı. Olar jábirlenýshiden aqshany qolhat nemese qaryzǵa aqsha berý týraly notarıýspen bekitilgen kelisimshartpen alady. Sóıtip qylmysty azamattyq qarym-qatynasqa aýystyryp, sútten aq, sýdan taza bolyp shyǵa keledi. Al Bas prokýratýranyń jalpy qylmys týraly aryz-shaǵymdardy tirkeý tártibine sáıkes, olardyń ishinde qolhat nemese kelisimsharttar negizinde týyndaǵan qarym-qatynastar boıynsha aryzdarǵa qylmystyq is qozǵalmaıtyny bekitilgen. Alaıaqtardyń osy amalyna kóp adamdar mán bere qoımaıdy.
Endeshe alaıaqqa jem bolýdyń birden-bir sebebi, kúmándi usynystarǵa aldaný eken. Alaıaqtar usynǵan amaldyń zańǵa sáıkes emestigi barshaǵa málim. Kezekten tys baspana alamyn dep nıettengender, munyń zańsyz ekenin bilip tursa-daǵy táýekelge barady. Al onyń aqyry kóp jaǵdaıda nemen aıaqtalatynyn aıtpasa da túsinikti. Sondyqtan baspana satyp alarda alaıaqqa jem bolǵyńyz kelmese, joǵarydaǵydaı kúmándi amaldarǵa jolamaǵan durys. Bul qarajatyńyzdy únemdeýdiń birden-bir joly. Baspanaǵa qol jetkize almasańyz da, aqshańyz ózińizde qalady. Al aqyry, alaıaqqa aldanyp, onyń qylmysyn dáleldeý kerek bolsa, biraz ter tógýge týra keledi.
Aryzdanbas buryn, aıǵaqtardy jınastyryńyz. Alaıaqpen kezdeskenińizdi, oǵan aqsha bergenińizdi kórgen kýálardy tabý qajet. Qolyńyzdaǵy kelisimshart nemese qolhat jáne basqa da aıǵaq bolar qujattardy jınaý kerek. Eger alaıaqpen telefon arqyly sóıleskende áńgime barysy, jiberilgen qysqa habarlar jazylyp qalǵan bolsa, tipten durys. Sonymen qatar alaıaqtyń áreketinen japa shekken basqa adamdardy tabýǵa áreket jasaǵan jón. Al onyń bir ǵana sizdi aldap qoımaǵany anyq.
Jazyp alǵan
Aleksandr TASBOLAT, «Egemen Qazaqstan»